Ẹksọdọs 12 - Edo Bible (E Baibol Ẹdo) Version 1996

Alagberra

¹ E Nọyaẹnmwa keghi tama e Mosis kevbe Errọn vbe otọ Igipt wẹẹ,

² “Uki na ọre ọ khian gha re uki nokaro vbe ukpo ne uwa.

³ Tama ivbi Izrẹl hia wẹẹ: Vbe ikpẹdẹ ne ogigbe ọghe uki na, edọmwadẹ ọghọe ghi hannọ oteghe ohuan ọkpa ra ovbi ẹwe ọkpa ye otọ ne ẹgbẹe ọre, oteghe ohuan ọkpọkpa ne igiowa ọkpọkpa.

⁴ Adeghẹ ẹgbẹe ọkpa kanmwa gbe ne ọ gha sẹtin rri ikun aranmwẹ fo, rẹn vbe ẹdogbo ẹre ne ọ diake sẹ sẹtin gba mu aranmwẹ ọkpa, sokpan vbene iran bun sẹ ọre ọ gha ya gha yerriọ vbene uwa gha ya mwamwa ẹn yọ ọrọre vbene dọmwadẹ ọghọe gha sẹtin re sẹ.

⁵ Ọkere ne ọ gha re aranmwẹ ne ọ ma bun obọ, a ma kuan ẹre egbe, ọwẹe ne ọ rre ukpo ọkpa, wa sẹtin mu ohuan ra ẹwe.

⁶ Wa ghi muẹn hin rre khẹ ikpẹdẹ ne ne ogiwenẹ ọghe uki na, ẹghẹ ne ivbi Izrẹl hia gha ya gbele aranmwẹ.

⁷ “Iran ghi rhie vbe esagiẹn ọnrẹn ya vin urho kevbe odukhunmwu onurho owa ne a ra na rri avbe aranmwẹ nii.

⁸ Vbe asọn nii, te a gha tọn ẹn vbe erhẹn, a ghi ye ebrẹd ne ọ ma huẹ kevbe oriwo rriọe.

⁹ Wa ghẹ rri ọre ọghọgbọn ra na a le ẹe, sokpan a ghi wa tọn ikun ẹnrẹn vberriọ, kevbe uhunmwu ẹnrẹn kevbe inu rẹn ke emwi ni rre ọre uwu egbe hia.

¹⁰ Wa ghẹ sẹrae vbọ ne ẹdẹ gbe, a deghẹ ọ kẹrre vbọ, wa ghi giẹn ọnrẹn uan.

¹¹ Te uwa ra mu egbe okhian ya rriọe. Wa ghi gba ukpọn uwa ukugba ginna ẹkun, wa ghi viọ ibata ye owẹ, wa ghi viọ ọkpọ utuaotọ uwa mwẹ obọ, wa ghi rriọe okhirhikhirhi, Evbare Alagberra ọghe uyi mẹ ne Nọyaẹnmwa nọ.

¹² “Vbe asọn nii, I gha la otọ Igipt gberra, I ghi gbele emọ ọdiọn ni re ikpia hia vbe otọe nii, kevbe ọghe emwa nagbọn kevbe ọghe emwirri. I gha rri avbe ẹbọ nii rre Igipt oya. Mẹ ọrọre Nọyaẹnmwa.

¹³ Esagiẹn ni rre onurho ọre ọ gha re ama ne a gha ya gha rẹn owa ne uwa ye, I gha bẹghe esagiẹn, I ghi rhie gberra evba, ọfuan ne irria ikhi na mu khian, i ra sẹ uwa egbe vbe ẹghẹ ne I gha na fi ivbi Igipt emwi.

¹⁴ Ẹdẹ na ghi gha re ẹdẹ ne a gha yerre ne uwa. Wa ghi gha ru emwi ukpo ẹre ne I ya ye emwi ne imẹ ne Nọyaẹnmwa ru rre. Wa ghi gha ru ẹe ke orre ya sẹ orre zẹ vbe emwiukpo ẹdẹdẹmwẹdẹ.

¹⁵ “Wa ghi ya ẹdẹ ihinrọn rri ebrẹd ne ọ ma hue. Vbe ikpẹdẹ ne okaro, wa ghi viọ ebrẹd ne ọ huere hin owa rua rre, rhunmwuda ọmwaikọmwa ne ọ rri ebrẹd ne ọ huere ke ikpẹdẹ nokaro ya sẹ ikpẹdẹ ne okiekie, a gha kan ẹn fua hin ọbuohiẹn emwa mwẹ rre.

¹⁶ Vbe ikpẹdẹ nokaro kevbe ikpẹdẹ ne ne ogihinrọn, wa ghi do iko ugamwẹ. Wa ghẹ winna iwinna rhọkpa vbe avbe ẹdẹ nii, sokpan wa sẹtin le evbare.

¹⁷ Wa ghi ru emwiukpo ọghe ebrẹd ne ọ ma hue na rhunmwuda ẹdẹ na ọrọre ẹdẹ ne I viọ ivbiyokuo rua lahin otọ Igipt rre. Ke orre ya sẹ orre, wa ghi zẹ ẹdẹ nẹrẹ kọ zẹ vbe emwiukpo.

¹⁸ Wa ghi suẹn gha rri ebrẹd ne ọ ma hue ke ota ikpẹdẹ ne ogiwenẹ ọghe uki nokaro kpao ya sẹ ota ikpẹdẹ ọkpa yan ugie.

^19-20 Wa ghẹ ghi miẹn ebrẹd ne ọ huere vbe owa uwa, rhunmwuda, a deghẹ a miẹn ọmwa ne ebrẹd ne ọ huere gue, a gha kan ẹn fua hin uwu ọbuohiẹn emwa mwẹ rre, ọre ọrriọvbe nọ ra ọmọ otọ nọ. Wa ghẹ rri ebrẹd ne ọ huere hiehiere vbe owa uwa.”

Alagberra Nokaro

²¹ E Mosis keghi tie avbe ọkaolotu ivbi Izrẹl hia, ọ tama iran wẹẹ, “Wa ya hannọ ovbi ohuan ra ovbi ẹwe ne ẹgbẹe uwa ne uwa gha gbe vbe emwiukpo Alagberra.

²² A ghi rhie abọ hisọp, wa ghi fi ẹe ye esagiẹn ne ọ rre ọkpan, wa ghi ya ẹe wo ẹkhu kevbe egbaha onurho uwa, wẹ ne ọmwa rhọkpa ghẹ kpa vbe owa ọ te ya sẹ owiẹ.

²³ E Nọyaẹnmwa gha la Igipt gberra ne ọ ya gbele ivbi Igipt, ọ gha bẹghe esagiẹn ne ọ rre ẹkhu kevbe egbaha onurho, ẹ i ghi vbe gie ọfuan la owa uwa gbe emwi.

²⁴ Wa ghi gha ru emwi na zẹ vbe iyi etẹbitẹ ne uwa kevbe ivbi uwa.

²⁵ Wa ghẹ ghi sẹ otọe nii ne Nọyaẹnmwa ra mu ne uwa, wa ghi ru emwiukpo na.

²⁶ Ivbi uwa gha nọ uwa wẹẹ, ‘De emwi ne a ya emwi ukpo na kha?’

²⁷ Wa ghi wanniẹn wẹẹ, ‘Izọese Alagberra ọghe Nọyaẹnmwa nọ, ọ rhie gberra owa ivbi Izrẹl vbe Igipt vbe ẹghẹ ne ọ na gbele ivbi Igipt vbene ọ na sẹ owa ima rae.’ ” Emwa nii keghi diguẹ, iran na ru ugamwẹ.

²⁸ Ivbi Izrẹl kegha khian ya ru zẹ vbene a khare. Iran keghi ru zẹ vbene Nọyaẹnmwa tama e Mosis kevbe Errọn.

Uwulomwẹ Avbe Emọ Ọdiọn

²⁹ Ọ ghi sẹ ogiasọn, e Nọyaẹnmwa keghi gbele avbe emọ ọdiọn nii rre Igipt, ke egbe ovbi ọba Igipt ne ọdiọn ne ọ ra rriọba lele ẹe kpao, sẹ egbe ọmọ ọdiọn ọghe oleghan ne ọ rre uwu ẹwẹdọ uhae, emọ ne avbe aranmwẹ ka biẹlẹ, a kevbe gbele ehia a.

³⁰ Vbe asọn nii ọba Igipt ke ẹe kevbe ekhaẹmwẹ ọnrẹn kevbe ivbi Igipt hia keghi gua kpao vbe asọn nii, eve keghi gba ehe hia vbe Igipt, rhunmwuda a ma miẹn owa ọkpa ne ọmọ okpia ma na wu.

³¹ Vbe asọn ọkpa nii ọba keghi gie na tie Mosis kevbe Errọn, ọ wẹẹ, “Ke uwẹ kevbe emwa ruẹn, wa zẹgiẹ ladian, wa sẹ ẹvbo mwẹ rae, wa ya ga Nọyaẹnmwa zẹ vbene uwa kha re.

³² Wa viọ ohuan uwa kevbe ẹwe kevbe ẹmila zẹ vbene uwa nọ rẹn, ne uwa kpao. Wa ghi vbe nọ afiangbe ne imẹ ba ẹre.”

³³ Ivbi Igipt keghi ya tua iran wẹ ne iran kpao ẹgiẹgiẹ wẹẹ, “deghẹ wa ma kpao, ma hia gha wulo.”

³⁴ Ẹre emwa nii na viọ irhuarhua iran ne eyist i ye, iran keghi ya ukpọn gbalọ ehia viọ ye ọkpan ne iran ya fian ebrẹd hẹ yan izabọ.

³⁵ Ivbi Izrẹl keghi ru vbene Mosis tama iran, iran keghi mọmọ ivbi Igipt ikpẹ ẹrọnmwọ kevbe esiliva kevbe igoru ke ukpọn.

³⁶ E Nọyaẹnmwa keghi gie ivbi Igipt mu ọghọ ye emwa nii egbe, iran na viọ emwi ne iran nọ iran re hia ne iran. Erriọ ọre ivbi Izrẹl ya viọ ẹfe ivbi Igipt gha rrie.

Ivbi Izrẹl kpao Vbe Otọ Igipt Rre

³⁷ Ivbi Izrẹl keghi kpao vbe Ramesis rre, iran na mu aro da Sukọt. Ikpia nii ya owẹ khian kegha re arriaisẹn uri eha (600,000), vbe ne a i na ke ikhuo kevbe ibiẹka.

³⁸ Emwa nibun ọvbehe deba ohuan nibun, ẹwe kevbe ẹmila kevbe lele iran.

³⁹ Iran kegha ya irhuarhua ne iran mu ke Igipt ladian fian ebrẹd ne ọ ma hue rhunmwuda ne a na khulo iran ke Igipt ladian ẹgiẹgiẹ. Iran ma miẹn ẹghẹ ya le evbare ne egbe iran, ra ne iran fian ebrẹd ne ọ huere.

⁴⁰ Ukpo ọgban yan uri eva (430) ọre ivbi Izrẹl ya vbe otọe Igipt.

⁴¹ Vbe ikpẹ ẹdẹ ne ọ wa gba vbe ọgban yan uri eva zẹ, ivbi ẹwae emwa e Nọyaẹnmwa hia keghi kpao vbe otọ Igipt rre.

⁴² Asọn ne Nọyaẹnmwa ya khẹ odẹ nọ ne ọ ya viọ iran ladian vbe otọe Igipt, nene asọn na keghi ra ne a ya fiohan ne Nọyaẹnmwa ke orre ya sẹ orre zẹ vbe asọn ne ivbi Izrẹl gha na vbe gha khẹ odẹ.

Ilele Vbe Ẹmwẹ Alagberra

⁴³ E Nọyaẹnmwa keghi tama e Mosis kevbe Errọn wẹẹ, “Ilele ẹmwẹ Alagberra ọre ena khin: A ghẹ gie ọrriọvbe rrie evbare alagberra.

⁴⁴ Sokpan avbe eviẹn ne a dẹlẹe sẹtin rriọe vbe uwa a ghi rhuẹ ọre nẹ.

⁴⁵ A ghẹ gie ne ọ yakọ vbe okhian ne ọ gberra khian, ra ọmwa ne a rhie re vbe iwinna rriọe.

⁴⁶ Owa ọkpa ọre a gha na gha rriọe, wa ghẹ rhie ladian vbọ, wa ghẹ guọghọ ugboloko aranmwẹ nii.

⁴⁷ Emwa nii re ivbi Izrẹl hia ọre ọ gha rri evbare na, sokpan a ghẹ gie ukpikolo rriọe.

⁴⁸ A deghẹ ọrriọvbe ne ọ rre ehe ne uwa ye wẹ rẹn gha le evbare Alagberra na ne Nọyaẹnmwa, wa ghi ka rhu uẹ ikpia hia nii guẹe nẹ, iyeke ọnii ọ ghi ye gbe ba emwa ru emwiukpo nii, obọ ne a ya mu ovbi Izrẹl ne ọre ne a biẹe vbe owa, ọre a gha ya muẹn.

⁴⁹ Erriọ vbe nọ ne ivbi Izrẹl ne a biẹlẹe vbe owa kevbe orhunmwuyẹn ne ọ yin uwa ẹvbo.”

⁵⁰ Ivbi Izrẹl hia na wa ru vbene a kha re, iran keghi ru vbene Nọyaẹnmwa tama e Mosis kevbe Errọn.

⁵¹ Vbe ẹdẹ ne ẹdẹrriọ zẹ e Nọyaẹnmwa keghi viọ ẹwae ivbi Izrẹl ladian vbe otọe Igipt rre.