Ẹksọdọs 1 - Edo Bible (E Baibol Ẹdo) Version 1996

A Ya Obọ Dan Mu Ivbi Izrẹl Vbe Igipt

¹ Eni avbe ivbi e Jekọb ni lele ẹe gha rrie Igipt ke iran kevbe ivbi iran ẹre ena khin:

² Riubẹn, Simiọn, Livai, Juda,

³ Isaka, Zebulọn, Bẹnjamin.

⁴ Dan, Naftali, Gad kevbe Asia.

⁵ Inu iran ne ọ wa re ivbi urho e Jekọb taara kagha re ekigbesiyenẹ. E Josẹf ne ovbi ẹre kagha rre Igipt nẹ.

⁶ E Josẹf kevbe etiọnrẹn keghi do wulo, erriọ zẹ orre iran hia ba ere.

⁷ Sokpan ivbi Izrẹl kegha mwẹ emọ nibun, iran bun sẹrriọ, iran vbe wegbe sẹrriọ wẹ, iran keghi wa gba otọe nii hia.

⁸ Ọba ọgbọn ne ọ ma zẹdẹ rẹn emwikemwi vbe ekpa Josẹf kegha rre asẹ vbe Igipt.

⁹ Ọ keghi tama emwa rẹn wẹẹ, “Wa ghee, avbe emwa na ighẹ ivbi Izrẹl bun sẹrriọ, iran vbe wegbe sẹrriọ wẹ te ima rhie uhunmwu mwẹ atataobọ.

¹⁰ Rhunmwuda ọnii, wa danmwehọ, te ima gha ya ẹwaẹn ya obọ mu iran ne iran ghẹ ghi muan sayọ. Okuo i ghẹ rre, iran sẹtin wa deba avbe eghian ima gu ima gbinna, iran ghi lẹkua vbe ẹvbo na.”

¹¹ Ivbi Igipt keghi rhunmwuda ọnii zẹlẹ avbe emwa ni su oleghan ne iran, ne iran gha ya ẹtin ya iran miẹn ẹsọn ne a wiẹn iran an. Avbe ivbi Izrẹl ẹre ọ bọlọ ẹvbo ne a tie ẹre Pitọn kevbe Ramesis ne ọba, ne ọ gha re ehe ne a si evbare gboo yi.

¹² Sokpan vbene ivbi Igipt ya wiẹn iran an, erriọ ivbi Izrẹl ye gha bun yọ vẹ gba ehe hia. Ohan iran kegha mu ivbi Igipt.

¹³ Iran keghi ya iran khian eviẹn edanmwidan.

¹⁴ Iran keghi ya ẹdagbọn iran khian ọghe orriara vbe ne iran na ya iran gha mannọ obuẹ kevbe ibiriki, deba iwinna a gha wu a rrie ni ghi rre ugbo hia. Iran keghi ya ẹtin munọ iran gha miẹn ẹsọn ike ẹsọn ne ọ rhirhi gha khin. Iran ma vbe mwẹ itohan ghe ivbi Izrẹl.

¹⁵ Ẹre ọba na tama avbe ikhuo ni mu ivbi e Hibru ubiẹmwẹ, a tie ọkpa vbọ Sifra, a keghi tie nọkpa Pus wẹẹ,

¹⁶ “Wa gha mu ikhuo Hibru emwi ubiẹmwẹ, iran gha biẹ okpia wa ghi gbe ẹe rua, sokpan ọ gha re okhuo, wa ghi sọrae.”

¹⁷ Sokpan iran ni mu ikhuo emwi ubiẹmwẹ ni keghi mu ohan Osanobua, iran ma ru vbene ọba khare sokpan iran kegha sẹ avbe emọ ikpia rae.

¹⁸ Ọba keghi gie ne a tie ikhuo ni mu emwi ubiẹmwẹ nii, ọ nọ iran wẹẹ, “Vbọzẹ ne uwa na ru emwi na yi, ne uwa na sẹ avbe emọ ikpia nii rae ye agbọn.”

¹⁹ Iran keghi wanniẹn wẹẹ, “Ikhuo Hibru i yevbe ikhuo Igipt, iran wa rherhe biẹ, ọmwa ne ọ mu emwi ubiẹmwẹ te sẹ ehe ne iran ye, iran biẹ nẹ usin.”

²⁰ Osanobua kegha ru ikhuo ni mu emwi ubiẹmwẹ nii ẹse, ivbi Izrẹl kegha muan yọ, iran na vbe wo vbe egbe.

²¹ Osanobua keghi viọ emọ ne avbe ikhuo ni mu emwi ubiẹmwẹ nii biẹlẹ rhunmwuda ne iran na mu ohan Osanobua.

²² Ẹghẹ nii ọre ọba ghi na yi iyi ne emwa irẹn hia wẹẹ, “Emọ ikpia ne emwa Hibru a rhirhi biẹ, wa gha filo iran ku ẹzẹ Nail, sokpan wa sẹ avbe emọ ikhuo ni rrọọ rae ye agbọn.”