Ẹfisọs 6 - Edo Bible (E Baibol Ẹdo) Version 1996

Emọ Kevbe Evbibiẹ Iran

¹ Wa ne emọ, iwinna uwa nọ, zẹ vbe ivbi iyayi Kristi, ne uwa gha họn ẹmwẹ ne evbibiẹ uwa, rhunmwuda, ọna ọre emwi ne ọ kere ne uwa ru.

² “Ye ọghọ ne erha a kevbe iye uẹ” ọrọre uhi ne okaro ne a rhie eyan te:

³ “Ne u miẹn ehe na maa kevbe ne u vbe tọ vbe otọe nii.”

⁴ Evbibiẹ emọ, wa ghẹ gha ru ivbi uwa emwi ne ọ gha ya ohu mu iran, sokpan wa dia iran ye odẹ, ne uwa vbe gha ma iran emwi zẹ vbe ọmwa ne ọ ya Kristi yi.

Avbe Eviẹn Kevbe Arowa Iran

⁵ Eviẹn ọmwa, wa gha họn ẹmwẹ ne arowa uwa ne agbọn vbe ohan kevbe uguọmwẹ, wa gha ya ekhọe ẹmwata ru ẹe vbene a miẹn wẹ Kristi ọre uwa ru ẹe na.

⁶ Ẹ i re vbe iran a gha dẹghe uwa ọkpa, wa gha na gha ru vberriọ, ne iran miẹn ehe na tian uwa, sokpan, wa gha ya ekhọe uwa hia ru vbene Osanobua ho, zẹ vbe eviẹn Kristi.

⁷ Rhunmwuda ọnii, wa gha ya ẹko rhiẹnrhiẹnmwẹ winna iwinna uwa, vbene a miẹn wẹ Nọyaẹnmwa ọre uwa ga ighẹ ẹ i re emwa ne agbọn kẹkan.

⁸ Wa yerre wẹ Nọyaẹnmwa gha san edọmwadẹ ọghọe ẹse ye iwinna ne ọ winnaẹn, ọre ọviẹn nọ ra ẹ i re ọviẹn.

⁹ Wa ne arowa, wa vbe gha yin ghe eviẹn uwa vberriọ, wa da obọ aro ne a zẹ mu iran yi. Wa yerre wẹ, ke uwa kevbe eviẹn uwa, arowa ọkpa ọre uwa mwẹ vbe ẹrinmwi, obọ ọkpa ọre irẹn ya mu emwa hia.

Ẹwu Igbinna Hia Ọghe Osanobua

¹⁰ Vbe okiekie ehia, wa ruẹ iwegbe uwa ba Nọyaẹnmwa, vbe ekpa ẹtin ẹnrẹn nọkhua.

¹¹ Viọ emwi igbinna okuo ne Osanobua hẹ nuẹn hia ye egbe, ne egbe ruẹ miẹn ehe na rrọọ emwi ero ne Esu ru.

¹² Rhunmwuda ẹ i re emwa ne agbọn kẹkan ma gu vẹn, sokpan iran nọ ighẹ avbe ẹtin ni wo ni re avbe ẹrinmwi, avbe ọdakha, avbe enikhaemwisẹ, avbe eniwanrẹn asọn, ọ ghe orre ne ọ so ebiebi na.

¹³ Rhunmwuda ọnii, wa viọ ẹwu igbinna Osanobua ye egbe nian. Ẹghẹ nii, ogha ghi sẹ ẹdẹ ukpọba, wẹ ghi sẹtin khẹ emwi ne oghian ni fi, u gha ghi gbinna ya sẹ ufomwẹ nẹ, u ghi ye gha re ne ọ ya ika tua otọ.

¹⁴ Rhunmwuda ọnii, khẹ ye egbe, ya ẹmwata ru ugbẹkun rhie gba, ya aruemwiata ru uhanhan ẹwẹe.

¹⁵ Kevbe amuegbe ne a ya kpe orhu Iyẹn Ne ọ maa ọghe ọfumwegbe, ru ibata hẹ ye owẹ.

¹⁶ Dada iyayi ya ru asa mu mwẹ vbe ẹghẹ hia, ọnii ọre u gha ya sẹtin rrọ ẹre ighẹ avbe ifẹnmwẹ erhẹn ne ọka ẹrhia Nii filo.

¹⁷ U ghi rhan obọ miẹn imiẹnfan ya ru ẹrhu ematọn, kevbe ẹmwẹ Osanobua zẹ vbe umozo ne nene Orhiọn rhie nuẹn.

¹⁸ Erhunmwu ọre u gha ya ru emwi na hia, u ghi rinmwian wẹ ne Osanobua yi uẹ obọ. Gha na erhunmwu vbe ẹghẹ hia, zẹ vbene nene Orhiọn rhie yi uẹ ekhọe. Rhunmwuda ọnọna, rhie vbẹẹ, ghẹ zẹ obọ vbọ, gha na erhunmwu ne emwa Osanobua vbe ẹghẹ hia.

¹⁹ Vbe gha na erhunmwu ne imẹ, ne Osanobua gha rhie ẹmwẹ yọmwẹ unu, ya gie mwẹ uhunmwu, vbe i a khian guan, ne I miẹn ehe na gha guan vbe ne a i na mu ohan, ne i vbe rhie oro ne ọ rre iyẹn ne ọ maa ladian.

²⁰ Iyẹn ne ọ maa na ọre I rhunmwuda ẹre re ukọ, a gha rhe miẹn ighẹ uwu eghan ọre I ye banbanna. Rhunmwuda ọnii, na erhunmwu, ne I gha guan vbe ne a i na fian afianma, zẹ vbe ne ọ kere ne I gha ru.

Igiotuẹ Ne Okiekie

²¹ Taikikọs ọtẹn mwa ne ọ ghan kevbe ọguọmwadia ne ekhọe esi vbe uwu iwinna Nọyaẹnmwa, ọre ọ ghi na iyẹn vbene I ye hẹ ma uwa ne uwa miẹn ehe na rẹn vbene I ghi ye egbe khian hẹ.

²² Ọnii ọ si ẹe ne I na gi ẹe bu uwa dee ne ọ miẹn ehe na tama uwa vbe ne ima hia ye hẹ vbe edinran, ne ọ vbe rhie ẹtin ye uwa iwu.

²³ Te Osanobua ne Evbavba kevbe Nọyaẹnmwa Jesu Kristi, gha rhie ọfumwegbe kevbe aho ẹmwẹ ọmwa ne avbe etẹn hia, ba iyayi.

²⁴ Te ẹsọhẹ Osanobua gha gu emwa hia ni mwẹ aho ẹmwẹ ọmwa ne ẹ i worua ghe Nọyaẹnmwa Jesu Kristi gha rrọọ.