Ẹfisọs 4 - Edo Bible (E Baibol Ẹdo) Version 1996

Akugbe Ọghe Egbe

¹ Rhunmwuda ọnii, I mobọ yatua uwa, mẹ ne ọre oleghan rhunmwuda ighẹ I ga Nọyaẹnmwa, wa gha ru emwi zẹ vbene ọ sikẹ ukpo ne Osanobua mwa ne uwa, vbe ẹghẹ ne ọ na tie uwa.

² Wa gha mu egbe rriotọ, wa vbe fu, ne uwa vbe gha mwẹ i ziengbe vbe ẹghẹ hia. Wa gha rhie maa ighẹ wa ho ẹmwẹ egbe, vbe ekpa ne a na ru iyobọ ne egbe.

³ Wa lo ẹtin uwa hia, ne uwa ya da ẹe yi ighẹ akugbe ne Orhiọn rhie ne ọmwa, vbe ekpa ọfumwegbe ne ọ dee uwa hia kugbe.

⁴ Egbe ọkpa ọre ọ rrọọ kevbe Orhiọn ọkpa, zẹ vbe ne a vbe miẹn wẹ, idaehọ ọkpa ọre ọ rrọọ ne Osanobua tie uwa yi.

⁵ Nọyaẹnmwa ọkpa ọre ọ rrọọ, iyayi ọkpa, isamẹ ọkpa.

⁶ Osanobua kevbe Erha mwa hia ọkpa, ọre ọ rrọọ, rẹn ọ vbe yan ehia, ne ọ ya ehia winna, kevbe ne ọ rre uwu ehia.

⁷ Dọmwadẹ ọghọe vbe uwu ima mwẹ emwi ne a ya wẹẹ, zẹ vbe ne emwi ne Kristi rhie ne ọmwa vbe sẹ.

⁸ Zẹ vbene ebe khare, “Ẹghẹ ne ọ na hin ukhunmwu gha rrie ehe ne ọ yo sẹẹ, ọ keghi viọ oghunmwu ni bun ba egbe gha khian, ọ na ya emwi ru emwa ẹse.”

⁹ De emwi ne a mobọ ya “ọ hin ukhunmwu” kha? Ọ rhie maa wẹ, ọ ka tuorre gha di otọe nẹ, ọnii nọ wẹ, vbe ototọ vbe uwu otọ.

¹⁰ Ọnii nọ wẹ, ọmwa ne ọ tuorre, ọre ọ vbe hin odukhunmwu vbe odukhunmwu kevbe gberra avbe, ẹrinmwi ne ọ miẹn ehe na ya aguọmwarrọ ọghọe vuọn agbọn kevbe ẹrinmwi.

¹¹ Rọẹn nii ọre ọ ya emwi ne emwa, ọ keghi zẹ eso ne iran gha re ukọ, eso, akhasẹ, eso iran ni kpe orhu iyẹn ne ọ maa, eso avbe ohẹn, kevbe avbe ọmamwaemwi.

¹² Te ọ ru ọna ne ọ miẹn ehe na mu emwa Osanobua egbe ye otọ ye iwinna ugamwẹ enọya Kristi yi, ne a miẹn ehe na de ẹre igie ighẹ ikinnegbe Kristi.

¹³ Erriọ, ma hia gha koko gha die a re ọkpa vbe uwu iyayi mwa, kevbe uwu vbene ima rẹn ovbi Osanobua, ma ghi do khian ikpia ni sẹ ihe okpia, ma te do sẹ uyomwẹ uvuọnmwẹ omwa vbe ne Kristi ye.

¹⁴ Ẹghẹ nii, ma i ghi ra gha re emọ obọ ne ulẹmwẹ ẹzẹ mu yo mu rre, kevbe ne ẹhoho ẹziza, ọghe iruẹmwi emwa erẹrẹ, bi yo bi rre, emwa ni ya ero ne ọ ke ẹko iran zọ rre de emwa ọvbehe odẹ.

¹⁵ Sokpan ọ kere ne ima gha la odẹ hia wan bu vbene ọ khin ighẹ Kristi, ne ọ re ọdia ọghe ehia vbe ekpa ne ima gha na gha ya orhiọn aho ẹmwẹ ọmwa ta ẹmwata.

¹⁶ Vbe ototọ asẹ ọghọe, ọre ina ni rre egbe hia na mama kugbe, vbene iran na vbe gu egbe ro, dọmwadẹ akhuẹn ne a rhie ne iran, keghi de ikinnegbe hia kugbe. Rhunmwuda ọnii a deghẹ dọmwadẹ ọghọe vbe uwu iran ghi winna vbene ọ kere ne ọ gha ru, egbe hia ghi do wan, ọ ghi vbe la ekpa aho ẹmwẹ ọmwa do de igiẹ

Arrọọ Ọgbọn Vbe Uwu Kristi

¹⁷ Rhunmwuda ọnii, eni Nọyaẹnmwa ọre I ya ta ẹmwẹ na, te I wa vbe tua unu muẹn wẹ, wa ghẹ gha ru vbene avbe iran ne enigẹbọ ru, emwa ne iziro ekhọe iran i mwẹ esa ne ọ ye.

¹⁸ Ekhọe iran keghi vbe rre uwu ebiebi. Iran i mwẹ oghae vbe ẹdẹ agbọn ne Osanobua ya ru ọmwa ẹse, rhunmwuda iran ma zẹdẹ rẹn ne a ye, iran keghi vbe ze vbe udu.

¹⁹ Iran i ghi rẹn emwi ne a tie ẹre ekhue, iran wa fan egbe iran fi uwu iba ne a zẹ, iran keghi vbe yin uyinmwẹ osọnnọ hia vbe ne a i na vbe ghe iyeke.

²⁰ Wa ma ruẹ emwi vberriọ vbe ehe ne Kristi ye.

²¹ Vbe ne a i na gbe awẹawẹ, wa họn ẹmwẹ ọnrẹn, kevbe zẹ vbe emwa ni lele ẹe khian, a vbe ma uwa ẹmwata ne ọ rre uwu Kristi.

²² Rhunmwuda ọnii wa muẹn fua ighẹ emwi ne uwa guẹe nẹdẹ, ne ọ ye uwa gha ru emwi ne uwa te ka ru nẹdẹ nii, ne emwi erẹrẹ ne ọ ho te ya rrie.

²³ Ọ kere ne orhiọn kevbe ekhọe uwa wa khian ọghẹ ọgbọn fẹẹrẹ.

²⁴ Wa ghi mu ẹn yọ ighẹ egbe ọgbọn nii ne a yi zẹ vbe ama ọghe Osanobua, ne ọ vbe rhie egbe ma vbe a rrọọ ọghe ẹmwata ne ọre ne ọ mudia ẹse kevbe ne ọ huanrẹn.

²⁵ Rhunmwuda ọnii nian, ohoghe ne a ta i ghi rrọọ, dọmwadẹ ọghọe ghi gha ta ẹmwata ma ọtiọnrẹn, rhunmwuda otu ọkpa ma hia koko khin vbe uwu egbe Kristi.

²⁶ Deghẹ ohu muẹn, ghẹ gie ohu ne ọ muẹn ya a ru orukhọ, ghẹ vbe mu ohu la ẹdẹ hoho.

²⁷ Ghẹ rhie ẹghẹ ne Esu.

²⁸ Ọmwa ne ọ te ka rha yi, wẹ ne ọ dobọ oyi ne a rha yi, ne ọ suẹn gha winna, ne ọ miẹn ehe na gha khuan okhuan ne ai gbe ikhan yi ọghe obọ ẹre, kevbe ne ọ sẹtin vbe gha ye ne ẹ i mwẹ obọ.

²⁹ Wa ghẹ gha fi obi unu gie egbe, wa gha ta ẹmwẹ ne ọ yi ọmwa obọ, egbe ne ọ rhie ẹtin ye ọmwa iwu, ọ ghi vbe rhie emwi ne ẹ i te rrọ rre, vbene a gha na miẹn wẹ, ẹmwẹ ne u ye unu ruẹn ta, ghi gha ru ọ maa ne iran ni ya ehọ họn ẹn.

³⁰ Ghẹ rhia Orhiọn Ne Ọ Huanrẹn ọghe Osanobua ekhọe rua, rhunmwuda nene Orhiọn ọrọre ama ọghe mẹ ọ yan rẹn, ne Osanobua yi ye uẹ egbe, ama ne aro ya dae wẹ, ẹdẹ dee ne Osanobua gha faan ye otọ.

³¹ Wa gbe ukhu ẹre ua ighẹ ẹkorriaramwẹ, owowo, kevbe ohu, wa ghẹ ghi vannọ okan, ra ne a gha tie ihẹn, wa gie ẹkokhọmwẹ fo, ke ẹe kevbe emwi ni ye rriọ hia.

³² Sokpan, wa gha mwẹ itohan kevbe ekhọe agiẹngiẹn da egbe, wa vbe gha ya bọ egbe, zẹ vbene Osanobua vbe la ekpa Kristi yabọ uwa.