Ẹfisọs 3 - Edo Bible (E Baibol Ẹdo) Version 1996

Iwinna Ne Pọl Winnaẹn Ne Iran Ni I Re Ju

¹ Rhunmwuda ọnọna, mẹ ne Pọl ne oleghan Kristi Jesu rhunmwuda uwa ne ẹ i re Ju, na erhunmwu ghe Osanobua.

² Vbe ne a i na gbe awẹawẹ, wa họn nẹ wẹ, vbe ekpa ẹsọhẹ ọghọe, Osanobua waa iwinna na mẹ, ne I winnaẹn ne uwa ne ẹ i re Ju.

³ Osanobua mu emwamwa ẹkhokho ẹre ladian, ọ keghi mu ẹn ma mwẹ. (I ka gbẹn ekherhe vbe ekpa ọna nẹ,

⁴ a deghẹ wa gha vbe tie emwi ne I gbẹn na, wa gha rẹn vbe ne I rẹn otọ oro Kristi sẹ hẹ.)

⁵ Vbe ẹghẹ ne ọ gberra, a ma ta oro na ma ọmwa rhọkpa, sokpan banbanna nian, Osanobua la ekpa Orhiọn we ẹre ma avbe ukọ kevbe avbe akhasẹ ọre ni huanrẹn.

⁶ Nene oro ọ na khin wẹẹ, rhunmwuda iyẹn ne ọ maa, iran ne ẹ i re Ju, vbe gu iran ne Ju ghae vbe afiangbe Osanobua ina egbe ọkpa nii ọre iran hia khin, iran vbe mwẹ oghae vbe emwi ne Osanobua la ekpa Kristi Jesu ve.

⁷ Emwi ne Osanobua la ekpa iwinna ẹtin ẹnrẹn ya we mwẹ, ọre ọ ya ya mwẹ khian ọguọmwadia nene iyẹn ne ọ maa.

⁸ Mẹ kanmwa sẹ ne ọ ghi kanmwa sẹẹ vbe uwu avbe emwa Osanobua, sevba, Osanobua keghi ya ọna ru mwẹ ẹse wẹ, ne I rhie Iyẹn Ne ọ maa ọghe ẹfe Kristi ne ẹ i mwẹ okhiẹ bu iran ne ẹ i re Ju gha khian.

⁹ Kevbe ne I ma emwa hia vbene a ra ya mu ẹn sẹ hẹ ighẹ emwamwa ẹkhokho ne Osanobua mwamwa ẹn. Osanobua ne Ayi ne ọ yi emwi hia keghi rhie emwamwa ẹkhokho ọghọe na lẹre ke ne ẹkpo mwẹ arria gha dee.

¹⁰ Ne a miẹn ehe na miẹn wẹ, ọ gha ghi sẹ ẹghẹ na, avbe ọdakha, odibosa, kevbe avbe ẹtin ni rre ẹrinmwi, ghi la ekpa esọsi do rẹn ẹwaẹn Osanobua vbe dọmwadẹ ihe ne ọ wa egbe yi.

¹¹ Vbene Osanobua mwamwa ẹn ke ne a bu agbọn tua agbọn gha dee ọre ọ ru ẹe, rẹn keghi la ekpa Kristi Jesu Nọyaẹnmwa ru ẹre ne a ru fo.

¹² Vbe uwu a ku egbe mwa gbe ba irẹn nẹ, kevbe rhunmwuda iyayi ne ima mwẹ vbe uwu irẹn, te ima ghi sẹtin sẹ odaro Osanobua nian vbe ne a i na fian afianma.

¹³ Rhunmwuda ọnii nian, I rinmwian uwa, wa ghẹ gi ẹe gbe uwa orhiọn ighẹ oya ne I re ne uwa na, ọyọ ọghe uwa nọ.

Ahoẹmwọmwa Kristi

¹⁴ Rhunmwuda ọnii, ọna ọre ọ si ẹe ne I na defi igue vbe odaro Evbavba.

¹⁵ Ọmwa ne ọ he ẹgbẹe hia ni rre ẹrinmwi kevbe agbọn eni ne eni.

¹⁶ I ghi rinmwian Osanobua wẹ, vbe ekpa ukpọlọmwẹ uyi ẹre, ne ọ la ekpa Orhiọn ẹnrẹn rhie ẹtin ne uwa ne uwa ya wo vbe egbe vbe uwu egbe uwa.

¹⁷ Kevbe, wẹ ne Kristi la ekpa iyayi bọ owa ẹre ye uwu uwa, I vbe na erhunmwu wẹ, ne uwa gbe inian, kevbe ne uwa gbe ẹyotọ uwa yan aho ẹmwẹ ọmwa.

¹⁸ Ne uwa kevbe emwa Osanobua hia, sẹtin rẹn vbe ne ọ ye hẹ ighẹ uvbẹmwẹ, utanmwẹ, uyomwẹ kevbe udinmwimwẹ ọghe aho ẹmwẹ ọmwa Kristi.

¹⁹ Ẹn, te uwa gha do rẹn aho ẹmwẹ ọmwa rẹn, a gha rhe miẹn ighẹ a i sẹtin rẹn ọnrẹn fo ne a miẹn ehe na ya uvuọnmwẹ ne ọ gbae ọghe Osanobua vuọn uwa fẹẹrẹ.

²⁰ Ne irẹn ni ne ọ sẹtin ru gberra vbene ima nọ rẹn, ra vbe ne a mu roro vbe ekhọe, vbe ekpa ẹtin ẹnrẹn ne ọ winna vbe uwu ima.

²¹ Osanobua ọre uyi gha rrọ na vbe uwu esọsi kevbe uwu Kristi Jesu, la ẹghẹ hia fẹẹrẹ, rhinrin ẹdẹdẹmwẹdẹ. Isẹ.