Ebe Rut 4 - Edo Bible (E Baibol Ẹdo) Version 1996

E Boaz Rhie Rut Rọnmwẹ

¹ E Boaz kegha rrie ehe ne a na ko vbe onurho ẹvbo nii, ọ na tota. Uwu ẹghẹ nii zẹẹ, ọtẹn Ẹlimẹlẹk ne ọ sikẹ ọre sẹẹ ne Boaz gha a kha keghi wa rre, e Boaz na tama rẹn wẹẹ. “Ọse mwẹ, larre ne u do tota vbe edinran.” Rẹn keghi gele bu ẹre, ọ na ya tota.

² Ẹre Boaz na viọ iran igbe vbe uwu avbe ediọn ẹvbo nii, ọ keghi kha wẹẹ, “Wa tota vbe emwa.” Iran na tota.

³ Rẹn keghi tama ọtẹn ne ọ sikẹ ọre sẹẹ ni wẹẹ, “Vbene Naomi ghi na ke Moab werriegbe sẹ owa nẹ nian, ọ ho ne ọ khiẹn ugbo ọtẹn mwa ighẹ Ẹlimẹlẹk.

⁴ Ọ re I na wẹ I gha mu ẹẹn ma ruẹn. Rhunmwuda onii nian, a deghẹ ọ yẹ ruẹ, sirra avbe emwa ni tota ye emwa na kevbe avbe ediọn emwa ima dẹ ọe, sokpan a deghẹ ẹ i yẹ ruẹ, gun mwẹ rẹn, rhunmwuda, wẹ ọ re ọ ka khẹke ne ọ dẹ ọe ọ ke do sẹ imẹ egbe.” Ọmwa ni keghi kha wẹẹ, “I gha dẹ ọe.”

⁵ Ẹre Boaz na tama ọmwa nii wẹẹ, “U gha gu e Naomi dẹ ugbo nii, e Rut ne ovbi Moab ne ọ dẹgbẹ ghi vbe khian amwọn ọn. Ne ugbo nii ghẹ miẹn ehe na lahin ẹgbẹe ọmwa ne ọ wu nii rre.”

⁶ Ẹre ọmwa nii na kha wẹẹ, “A deghẹ erriọ nọ, a gha rhe miẹn wẹ mẹ ọ re ọ khẹ ke ne ọ dẹ ugbo nii, mẹ i ra ru vberriọ, rhunmwuda ọ gha rhie maa ighẹ ivbi mwẹ i ra sẹtin rri ọe vbe ukhu. I mu asẹ mwẹ ne uẹn ne uwẹ dẹ nene ugbo, mẹ i ra dẹ ọe.”

⁷ Ẹghẹ nii vbe otọ Izrẹl, a gha mu ẹmwẹ emwi ne a ho ne a ya rọ rre, vbene iran ya ru ẹe ọna khin: ọmwa ne ọ khiẹn ọẹn ghi yuo ibata ne ọ rre owẹ ọre viọ ne ọmwa ne ọ ra dẹ ọe. Erriọ a ya rhie maa vbe Izrẹl wẹ a ta ọfo yọ nẹ.

⁸ Rhunmwuda ọnii, ọmwa nii ghi tama e Boaz wẹẹ, “Wẹ tobọọ dẹ ọe,” rẹn keghi yuo ibata ne ọ rre owẹ ọre, ọ na viọ ne Boaz.

⁹ Ẹre Boaz na khama avbe ediọn kevbe emwa nekpa wẹẹ, “Wa hia ọrọre osẹe ẹrẹna wẹ I gu e Naomi dẹ emwi hia ni te re ọghe Ẹlimẹlẹk kevbe Kiliọn kevbe Malọn ne ivbi ẹre ne ikpia.

¹⁰ Ye vbe sẹ ọnii, e Rut ne ovbi e Moab ne okhuo ne Malọn wu sẹ rae, vbe khian ọvbokhan mwẹ, ne ọ miẹn ehe na gha gbearoghe emwi ọmwa ne ọ wu nii vbe uwu ẹgbẹe ọre, ne eni ẹnrẹn miẹn ehe na ye gha khian vbe uwu ẹbu ẹgbẹe ọre kevbe ẹvbo ẹre. Wa ọrọre osẹe ẹrẹna.”

¹¹ Emwa ni keghi wanniẹn wẹẹ, “Ẹn, ma ọrọre osẹe.” Avbe ediọn keghi kha wẹẹ, “Te Nọyaẹnmwa gha gie okhuo nii ne ọ die owa ruẹ ẹrẹna gha yevbe Rakiẹ kevbe Lia ni biẹlẹ emọ ni bun ne Jekọb. Te u gha khian ọmwa ne ọ fee vbe ẹwae Efrata kevbe ọmwa ne ọ hin usi vbe Bẹtlẹhẹm.

¹² Te emọ ne Nọyaẹnmwa gha la obọ uvbi nii viọ guẹ gha ye ẹgbẹe ruẹ do gha yevbe ẹgbẹe ọghe Pẹrẹs ne ovbi e Juda kevbe Tama.”

E Boaz Kevbe Ivbi Uniẹn Ọnrẹn

¹³ Ẹre Boaz ghi na rhie Rut gha rrie owa zẹ vbe amwẹ ọnrẹn, rẹn keghi gue ẹe ru emwi ọdọ vbe amwẹ, E Nọyaẹnmwa keghi gie ẹe hanmwa, ọ na biẹ ọmọ okpia.

¹⁴ Avbe ikhuo keghi tama Naomi wẹẹ, “Rho e Nọyaẹnmwa! Ọ rhie e eyẹ ọmọ okpia ne uẹn ẹrẹna ne ọ gha gbearoghe ruẹ. Te ọmọ okpia na gha khian ọkhae vbe otọe Izrẹl.

¹⁵ Te ọ gha rhie ẹdagbọn ọgbọn gie uẹ kevbe ne ọ gha re eke ne a ya egbe gọ yan vbe ẹghẹ ọmaẹn ruẹn. Amwẹ ovbi uẹ ne ọ biẹ ọe wa ho ẹmwẹ ruẹn, ọ gha vbe ru nuẹn sẹ emọ ikpia ihinrọn.”

¹⁶ E Naomi keghi mu ọmọ nii, ọ keghi gba ẹe ginna egbe, ọ na gha gbearoghe ẹre.

¹⁷ Ikhuo ni rre ẹdogbo nii kegha tie ọmọ ni Obẹd, iran wẹẹ, “A bie ọmọ okpia ne Naomi.” Obẹd ọ re ọ gha re erha Jese ne ọ do biẹ Devid.

^18-22 Uniẹn ọghe Pẹrẹs do sẹ Devid ọ re ọna khin: Pẹrẹs, Hẹzrọn, Ram, Aminadab, Nasiọn, Salmọn, Boaz, Obẹd, Jese, Devid.