Ebe Rut 3 - Edo Bible (E Baibol Ẹdo) Version 1996

E Rut Miẹn Ọdọ Rọnmwẹ

¹ Ọ ghi kpee fua kherhe, e Naomi na tama e Rut wẹẹ, “Ovbi mwẹ, I gha gualọ ọdọ rhie ne uẹn ne u miẹn ehe na gbe ẹkun sẹ otọ vbe owa obọ ruẹ.

² Yerre wẹ e Boaz ne u winna lele eguọmwadia ẹre khian ke ẹghẹ nii gha dee, ọtẹn ima nọ. U ghi danmwehọ nian, ota na, ọ gha khuọn ọka.

³ Rhunmwuda ọnii, ya khuẹ ye ori ne ọ winhin wuo, ne u viọ ukpọn ruẹn ni maa sẹẹ ye egbe, ne u gha rrie ehe ne ọ na khuọn ọka, sokpan, ghẹ gie ẹe rẹn ighẹ u rre evba ọ te do re ke ne ọ vbe da fo.

⁴ Ọ ghẹ ghi ya lovbiẹ, u ghi yi ehe ne ọ lovbiẹ yi ẹro, u ghi gha khian, u ghi kie ukpọn hin odẹ owẹ ọre rre ne u lovbiẹ vbe evba. Ẹghẹ nii, ọ gha tama ruẹn emwi ne u gha ru.”

⁵ E Rut keghi wanniẹn wẹẹ, “I gha ru emwi hia zẹ vbene u khare.”

⁶ Ẹre Rut na gha rrie ehe ne a na khuọn ọka nii, ọ keghi ru emwi hia ne iye ọdọ ẹre tama rẹn.

⁷ E Boaz ghi rri evbare nẹ, ọ na vbe da, egbe kegha mu ẹẹn. Ọ kegha rrie ọkpẹn ehe ne a si ọka gboo yi, ọ na ya lovbiẹ. E Rut keghi rẹnrẹn la evba. Ọ na wee ukpọn hin ẹre owẹ rre, ọ na lovbiẹ.

⁸ Ọ ghi sẹ asọn, rẹn keghi runran rhiọrre, ọ keghi fi egbe werriẹ, ọ keghi wa yan ẹre unu uan vbe ọ miẹn wẹ okhuo ọkpa lovbiẹ ye irẹn odẹ owẹ.

⁹ Rẹn keghi nọ rẹn wẹẹ, “Gha ọna khin yi?” Rẹn na wanniẹn wẹẹ, “E Rut ne ọguọmwadia ruẹ nọ. Vbe ne a ghi na miẹn nian wẹ ọmwa ne ọ sikẹ ima u khin, kevbe wẹẹ, wẹ ọ re ọmwa ne a rhie mwẹ ne ẹẹn gha su, wa rhie mwẹ rọnmwẹ.”

¹⁰ Rẹn keghi wanniẹn wẹẹ, “Te Nọyaẹnmwa gha fiangbe uẹ, ovbi mwẹ. Uwa ya emwi ne u ru na rhie maa wẹ ọmwa ne ọ guobọ mwa u khin, ọna vbe sẹ ne u ru ne iye ọdafọn ọn rhunmwuda, u gha sẹtin gualọ igbama rọnmwẹ, ọ re ne ọ fe nọ ra ne ọ ma fe, sokpan u ma ru vberriọ.

¹¹ Wanwanna nian, ghẹ fian afianma e Rut, emwa ni rre ẹvbo na hia rẹn ruẹn ye okhuo esiesi. I gha ru emwikemwi ne u a rhirhi nọọn.”

¹² Emwata nọ wẹ ọmwa ne ọ sikẹ ruẹ ọ re I khin kevbe wẹ mẹ ọ re a ka a ye ọre obọ sokpan, ọmwa ọkpa rrọọ ne ọ sikẹ ruẹ sẹ mwẹ.

¹³ Gha rre emwa ẹdẹ te gbe, ọ gha ghi sẹ owiẹ, ma gha ya nọ adeghẹ ọmwa nii gha gbe aro ghe ruẹ, ọ gha ye rriọ ọ maa, a deghẹ ọ ma ghi vbe gha yerriọ, I ye Osanobua nọ rrọọ vẹn ihẹn wẹ, I gha mudia ye emwi hia. Banbanna nian, ya lovbiẹ.

¹⁴ Rẹn keghi lovbiẹ ye odẹ owẹ ọre ẹdẹ te gbe, sokpan, ọ keghi kpaegbe vbe ẹdẹ ma he wan sẹ ne emwa gha na bẹghe ẹre. Rhunmwuda, e Boaz kha re wẹẹ, “Ọma kei ne ọmwa rhọkpa rẹn ighẹ ọ rrie emwa na.”

¹⁵ Ẹre Boaz na khama rẹn wẹẹ, “Mu ẹwu ọkokhunmwu ne u yọe rre ne u rhan rẹn yotọ.” Rẹn keghi gele ru vberriọ. Rẹn keghi rhurhẹ ọka ne ọ sẹ omwa uwan ekigbesiyeha yọọ, ọ na mu nẹẹn, rẹn na mu gha rrie owa.

¹⁶ Ọ ghi sẹ owa ẹre, iye odọ ẹre na nọ rẹn wẹẹ, “Vbe ua ghi khian hẹẹ, ovbi mwẹ?” E Rut keghi ta emwi hia ne Boaz ru nẹẹn ma rẹn.

¹⁷ Ọ na vbe kha wẹẹ, “O kevbe viọ avbe ọka na hia mẹ, rhunmwuda, ọ kha re wẹẹ, ‘Ọ ma kei ne I fi abọ bu ruẹ gha dee.’ ”

¹⁸ E Naomi keghi tama rẹn wẹẹ, “U ghi ziengbe nẹ e Rut, u te do rẹn vbene emwi hia ra de hẹẹ; rhunmwuda, e Boaz i ra hẹ wẹ ẹrẹna vbe ẹ i re te a ghi rẹn vbene a ta nene ẹmwẹ mu kọ yi nẹ.”