Ebe Rut 2 - Edo Bible (E Baibol Ẹdo) Version 1996

E Rut Winnaẹn Vbe Ugbo Ọghe Boaz

¹ E Naomi keghi mwẹ ọmwa ọkpa ne a tie ẹre Boaz, ọmwa ne ọ fe ne ọ vbe hin usi ẹsẹse, ọ ke gha re ẹgbẹe ọghe Ẹlimẹlẹk ne ọdọ ẹre.

² Ẹdẹ ikẹtin e Rut keghi tama Naomi wẹẹ, “Gunmwẹ gha rrie ugbo ne I ya gha rhọ vbe erhan ọka ne iran ni rhọ emwiokọ rhọ sẹrae. I gha rhọ ẹre lele ikpia eso nẹ, ọ gha kue yọ ne I gha rhọ ẹre.” E Naomi keghi wanniẹn wẹẹ, “Gha khian ovbi mwẹ.”

³ Ẹre e Rut na gha rrie ugbo, ọ na ya gha rhọ ẹre lele iran ni rhọ emwiokọ ni odieke khian. Emwi ghi wa vbe ho aro, ugbo ọghe Boaz ne ọtẹn Ẹlimẹlẹk ọ re ọ vbe gha rrie.

⁴ E Boaz tobọ ẹre keghi ke Bẹtlẹhẹm rre, “Ọ keghi tue emwa iwinna wẹ Nọyaẹnmwa deba uwa.” Iran keghi wanniẹn wẹẹ, “Nọyaẹnmwa fiangbe uwẹ.”

⁵ E Boaz keghi nọ ọguọmwadia ẹre ne ọ gbe aro ghe iran ne iwinna nẹẹn wẹẹ, “Gha ọ yan ovbi okhuọba na yi?”

⁶ Eguọmwadia ẹre keghi wanniẹn wẹẹ, “Ọmọ okhuo orhunmwuyẹn ne ọ lele Naomi ke Moab rre nọ.

⁷ Rẹn nọ rẹn wẹẹ, ‘Wa lahọ wa gun mwẹ gha koko ọka lele iran ni winna na iyeke khian.’ Ẹre a na miẹn wẹ ke ne owiẹ rẹ gha dee, ọ re ọ kegha winna do sẹ wanwan na ne ọ na ya hẹwẹ vbe irhu.”

⁸ Ẹre Boaz na khama e Rut wẹẹ, “Danmwẹ ehọ ovbi mwẹ. Ghẹ ghi yo ehe ọvbehe ya gha rhọ ọka gberra ugbo na, gha deba eguọmwadia mwẹ ni ikhuo winna.

⁹ U ghi gbe aro kotọ ne u miẹn ehe na rẹn ehe ne iran na fian ọka, ne u gha deba iran winna. I tama ikpia ni winna mẹ nẹ ne iran ghẹ kpokpo uẹ hiehiere, ovbamẹ gha gbe uẹ, u ghi ya gha wọn vbe akhe amẹ ne iran sa rre.”

¹⁰ E Rut keghi vbokho egbe rriotọ ya uharo kan otọ, ọ keghi tama Boaz Wẹẹ, “Vbe ua na dẹghe mwẹ ya tohan mwẹ vberriọ hẹ, egbe ne I ya re ọrriọvbe?”

¹¹ E Boaz keghi wanniẹn wẹẹ, “Iran kpa itan emwi hia ne u he ru ne iye ọdọ ruẹ ke ne ọdafọn ọn ya wu gha dee. I rẹn vbe ne u sẹ erha a, iye uẹ kevbe ẹvbo ruẹ rae hẹ, u na do tota ke emwa ne u ma rẹn ẹdẹ.

¹² Te Nọyaẹnmwa gha san ruẹn ẹse emwi ne u he ru hia, te Nọyaẹnmwa Osanobua Izrẹl ne u do lẹ gbinna gha san ruẹn ẹse fo fẹẹrẹ.”

¹³ E Rut keghi wanniẹn wẹẹ, “Enọwanrẹn, u kakabọ tohan mwẹ. Vbene u vbe gun mwẹ guan khuẹrhẹ, wa vbe rhie igiẹdu mẹ, mẹ ne ọguọmwadia ruẹ, a gha rhe miẹn wẹ I ma vba ọkpa vbe uwu avbe eguọmwadia ruẹ.”

¹⁴ Ọ ghi sẹ ẹghẹ ne a ya rri evbare, e Boaz keghi khama e Rut wẹẹ, “Larre vbe edinran; miẹn ebrẹd, do ya rhanmwẹ vbe ọkpan na.” Ẹre irẹn na ghi tota ba avbe emwa iwinna, e Boaz keghi rhie ọka ne a tọn ẹn nẹẹn. Ọ keghi re ne ẹko vuọn, eso ke ye vbe kẹrre.

^15-16 Ọ ghi guakpao ne ọ ya rhọ ọka, e Boaz keghi tama avbe eguọmwadia ẹre wẹẹ, “Wa gie ẹe gha rhọ ọka, a gha rhe miẹn wẹ ehe ne ititi ẹre he ye nọ; wa ghẹ yagha ẹe hiehiere. Wa gha silo vbọlọ vbe ititi ọka kherhe, wa ghi sẹ ni dekẹe rae nẹẹn ne ọ rhọ ẹre, wa ghẹ guẹe gui.”

¹⁷ Ẹre Rut na rhọ ititi ọka vbe ugbo ọ te do sẹ ẹghẹ ota. Ọ keghi khuọn inu ne ọ rhọ re, ọ te ra sẹ omwa uwan ekesọgban.

¹⁸ Ọ keghi mu ọka ẹre, ọ na gha rrie owa, ọ na ya mu ọka ne ọ rhọ re ma iye ọdọ ẹre, ọ kevbe mu evbare ne ọ re ke ẹe ladian, ọ na mu ne ẹẹn.

¹⁹ E Naomi keghi tama rẹn wẹẹ, “De ehe ne u na ya rhọ ọka ẹrẹ yi? De ugbo ọmwa ne u na ya winna? Te Osanobua gha fiangbe ọmwa ne ọ zẹ ye uwa re.” E Rut keghi tama Naomi ighẹ ugbo ọmwa ne a tie ẹre Boaz rẹn na ya winna.

²⁰ E Naomi keghi tama rẹn wẹẹ, “Te Nọyaẹnmwa ne ọ mu eyan rẹn sẹ ne ne ọ wu kevbe ne ọ rre agbọn gha fiangbe Boaz.” Rẹn keghi tama rẹn wẹẹ, “Okpia nii, ọmwa ne ọ wa sikẹ ima vbe ọtẹn ọ re nọ, usun iran ne ọ ghi gbe aro ghe ima na.”

²¹ Ẹre Rut na kha wẹẹ, “Yevbe sẹ ena hia, ọ tama mwẹ ne I gha deba avbe eguọmwadia ẹre winna rhinrin iran te do rhọ emwiokọ fo.”

²² E Naomi ne tama e Rut wẹẹ, “Ẹmwata nọ ovbi mwẹ, iran sẹtin yagha a, a deghẹ u yo ugbo ọmwa ọvbehe, u rre ehe ne avbe eguọmwadia ẹre ye ọ re ọ fu egbe sẹẹ.”

²³ Ẹre Rut ghi na deba eguọmwadia Boaz gha winna, ọ na vbe gha rhọ ọka, iran te do rhọ avbe ọka kevbe ọka irhuarhua fo, ọ na ye gha tota ke iye ọdọ ẹre.