Ebe Rut 1 - Edo Bible (E Baibol Ẹdo) Version 1996

Ẹlimẹlẹk Kevbe Ẹgbẹe Ọre Kpao Gha Rrie Moab

^1-2 Vbe ẹghẹ ne ọ kpẹe fua, ẹkpo ne Izrẹl i na he mwẹ ọba, ukhunmwu keghi do fi vbe ẹvbo nii. Ẹre okpia ọkpa ne a tie ẹre Ẹlimẹlẹk ne ọ re ovbi ẹwae Ifrat, ne ọ gha rre Bẹtlẹhẹm vbe Juda na rhie amwẹ ọnrẹn ighẹ Naomi kevbe ivbi iran ne ikpia eva e Malọn kevbe Kiliọn iran na ya gha rre Moab.

³ Ẹlimẹlẹk keghi wu sẹ Naomi kevbe ivbi ẹre ne ikpia eveva rae.

⁴ Iran keghi viọ ivbi e Moab rọnmwẹ, a kegha tie ọkpa vbọ Ọfa, kevbe nọkpa e Rut. Iran gbe sẹ ukpo igbe nẹ vba.

⁵ E Malọn kevbe Kiliọn kevbe wulo, ọ na do kẹ Naomi ọkpa vbe ne ivbi ẹre ne ikpia eveva kevbe ọdọ i ghi na rrọọ.

E Naomi Kevbe Rut Dọlegbe Gha die Bẹtlẹhẹm

⁶ E Naomi keghi họn wẹ e Nọyaẹnmwa ye emwa rẹn obọ, vbene ọ na gie emwiokọ maa ne iran ẹsẹse. Rẹn keghi do mu egbe ne ọ kpao vbe Moab rre ke irẹn kevbe avbe amwẹ ivbi ẹre.

⁷ Rẹn keghi kpao, ọ na gha die Juda vbene ọ na viọ iran mwẹ obọ.

⁸ Sokpan, ọ ghi sẹ odẹ, ọ tama iran wẹẹ, “Wa werriegbe gha rrie owa ne uwa ya tota ke iye uwa. Obọ ne ọ maa ne uwa ya mu mwẹ kevbe iran ni wulo nẹ, ọ re Nọyaẹnmwa gha vbe ya mu uwa.

⁹ E Nọyaẹnmwa ne ọ lahọ ne ọ gie uwa miẹn ọdọ rọnmwẹ ne uwa vbe gha mwẹ owa.” Ẹre Naomi na mu iran unu hiẹnhiẹn ya gbe ọ khian ẹdẹ hia ne iran. Sokpan, iran keghi kpe rua a.

¹⁰ Iran tama rẹn wẹẹ, “Ẹn o, te ima ra lele uẹ gha rrie ọghe emwa ruẹn.”

¹¹ E Naomi keghi wanniẹn wẹẹ, “Ivbi mwẹ ni ikhuo, wa werriegbe. Vbọzẹ ne uwa na ho ne uwa lele mwẹ gha dee yi? Mẹ gha ye sẹtin biẹlẹ emọ ikpia ne uwa rọnmwẹ ra?

¹² Wa werriegbe gha rrie owa. Mẹ khian ọmaẹn gbe nẹ ne ọ gha ye rọnmwẹ ọdọ; gia kha ighẹ te I kue rọnmwẹ ọdọ asọn na, I na vbe biẹlẹ emọ ikpia,

¹³ wa gha ziengbe ne iran wan rre nẹ wa ke rọnmwẹ ọdọ ra? Ọnii gha wẹ ne uwa ghẹ ghi rọnmwẹ ọdọ ọvbehe ra? Ivbi mwẹ, wa rẹnrẹn ighẹ ọ na i gia ru. Nọyaẹnmwa mu aro ne ọ khọ da mwẹ nẹ, ọ kakabọ da mwẹ ne uwa.”

¹⁴ Iran keghi vbe dọlegbe gha viẹ; ẹre Ọfa ghi na mu iye ọdọ ẹre unu hiẹnhiẹn ya gbe ọkhian ẹdẹ hia nẹẹn, ọ na kpao bu emwa irẹn, sokpan e Rut ma sẹ ọe rae.

¹⁵ E Naomi keghi khama e Rut wẹẹ, “Ghẹ ọrue ruẹ kpao nẹ, ọ bu avbe emwa rẹn kevbe evbibiẹ ọe, wẹ vbe lele ẹe werriegbe gha rrie owa.”

¹⁶ Sokpan, e Rut keghi wanniẹn wẹẹ, “Ghẹ ghi tama mwẹ wẹ ne I kpao sẹ uẹ rae, ghẹ tama mwẹ wẹ ne I ghẹ lele uẹ. Ehe ne u rhirhi a gha rrie ọ re imẹ gha vbe yo, ehe ne u rhirhi a dia ọ re imẹ gha vbe dia. Emwa ruẹn ọ re ọ ra gha re emwa mwẹ. Osanobua ruẹ ọ re ọ ra vbe gha re Osanobua mwẹ.

¹⁷ Ehe ne u wu yi ọ re I gha vbe wu yi, evba ọ re a ra vbe re mwẹ yi. Te oya ne ọ ghi wegbe sẹ ne Nọyaẹnmwa rri ọmwa re gha hihiẹ yan mwẹ, a deghẹ I gie emwi ọvbehe ya mwẹ kpao sẹ uẹ rae vbe ẹ i re uwu!”

¹⁸ E Naomi ghi miẹn wẹ te Rut wa kha ighẹ rẹn ra lele irẹn, ọ ma ghi ta ẹmwẹ ọvbehe.

¹⁹ Iran na ghi gha khian iran te do sẹ Bẹtlẹhẹm. Iran ghi sẹ evba, emwa hia keghi ye yeye ẹe, avbe ikhuo nii na kha wẹẹ, “E Naomi ọna gele khin ra?”

²⁰ Rẹn keghi wanniẹn wẹẹ, “Wa ghẹ ghi tie mwẹ Naomi, wa gha tie mwẹ Mara rhunmwuda Osanobua ne Udazi ye obọ ne ọ tọn mu mwẹ nẹ.

²¹ Ẹghẹ ne I na kpao, ọbọbọ I si gha khian, sokpan I ghi dee, mẹ vbe ikpakpa uhunmwu mwẹ ọkpa ọ re Nọyaẹnmwa ghi rhie werriegbe rre. De emwi ne uwa gha gu gha tie mwẹ Naomi ẹko ne ọ sẹ ọyẹnmwẹ, vbe Osanobua ne Udazi bu abe gbe mwẹ nẹ, ọ na vbe ye sẹ mwẹ usẹ?”

²² Erriọ ọ re Naomi ya ke Moab gha dee ke ẹe kevbe Rut, ne ovbi e Moab ne amwẹ ovbi ẹre. Ẹghẹ ne a ya fian ọka irhuarhua ọre iran ya sẹ Bẹtlẹhẹm.