Diuteronomi 8 - Edo Bible (E Baibol Ẹdo) Version 1996

Otọe Esiesi Ne A Ra Yaẹn

¹ “Wa ghi ye ẹko ata gha ru emwi hia e I tama uwa ẹrẹna ne uwa miẹn ehe na gha rre agbọn, ne uwa vbe gha muan yọ, ne uwa vbe yin otọe nii ne Nọyaẹnmwa ve avbe erha mwa odede ẹre.

² Wa ghi yerre vbene Nọyaẹnmwa Osanobua uwa su uwa vbe okhian ne ọ taẹn la uwu ato nii vbe ukpo iyeva ni gberra na, ọ na vbe gie ọlọghọmwa gie uwa ne ọ ya danmwẹ uwa ghe, ne ọ miẹn ehe na rẹn emwi ni rre uwa ekhọe, nẹ ọ miẹn ehe na vbe rẹn adeghẹ wa gha ya uhi ẹre ru emwi.

³ “Ọ ye ovbamẹ gbe uwa, ọ na do rhie mana ne uwa re, evbare ne uwa kevbe avbe erha uwa odede ma he re ẹdẹ. Te ọ ru ọna rhie ma uwa wẹ evbare ọkpa ma sẹ ne ọmwa ye egbe yan ne ọ ya gha rre agbọn, emwi ne ọ khẹ ke ọmwa ọrọre ẹmwẹ ne Osanobua ta ẹe.

⁴ Ukpon ruan ma khian ọmaẹn, owẹ rua ma hinmwian vbe ukpo iyeva nii.

⁵ Wa ye rre wẹ te Nọyaẹnmwa gha dia rua, ọ na vbe gha rri uwa oya zẹ vbene erha gbele ivbi ẹre hin ọkhọ rre zẹẹ.

⁶ Rhunmwuda onii khekherriọ, wa gha ru vbene uhi e Nọyaẹnmwa khare, ne uwa vbe gha mu ohan rẹn.

⁷ Otọe esiesi ẹre Nọyaẹnmwa viọ uwa rrie, otọe ne avbe ẹzẹ nekhua kevbe ne giẹrẹ ye, ke ẹzẹ ni le la uwu otọ ni vbe ya gha vẹ ladian vbe iya kevbe oke.

⁸ Otọe ne ọka ẹsin kevbe ọka irhuarhua na maa ẹsẹse, alimo, erhan ohọ, kevbe ọmọ erhan ne ẹ i kpọ, ọliv kevbe owọn.

⁹ Ohanmwẹ i ra gbe uwa vbe evba, wa i ra vbe vbabọ emwikemwi. Ematọn rre uwu okuta ni rrọọ, wa gha vbe miẹn oze gha zẹ vbe oke ni rrọọ.

¹⁰ A gha miẹn egbe evbare ne uwa a rhirhi gha ho ne uwa re, wa ghi kpọnmwẹ Nọyaẹnmwa Osanobua rua ye otọe esiesi ne ọ mu ne uwa.

A Wẹ Ne A Ghẹ Mianmian E Nọyaẹnmwa

¹¹ “Wa gie a miẹn wẹ wa ma mianmian e Nọyaẹnmwa Osanobua rua, wa ghẹ mwẹ wa ma gha ya uhi ẹre ne I ma uwa ẹre ẹrẹna ru emwi.

¹² Wa gha mwẹ emwi hia ne uwa ho ne uwa re nẹ, wa na vbe bọlọ owa ne uwa ra gha ye nẹ.

¹³ Ẹmila uwa kevbe ohuan uwa, esiliva kevbe igoru uwa gha ghi muan nẹ ẹsẹsẹmwẹse.

¹⁴ Wa ghẹ gie a miẹn wẹ te uwa ghi tọn egbe mu ne uwa ya mianmian e Nọyaẹnmwa Osanobua rua ne ọ viọ uwa ke Igipt ladian rre vbe ehe ne uwa na te re eviẹn.

¹⁵ Rẹn ọ re ọ su uwa la ato nọkhua ne ọ mu ohan nii, ehe ne avbe ẹyẹn ni mwẹ obi dan ye deba ekpakpahuangan, vbe otọe ne ọ kakae ne hiohioohio nii, ọ keghi tue amẹ ke uwu okuta ladian ne uwa.

¹⁶ Ọ rhie mana ne uwa re vbe uwu ato, egbe evbare ne avbe erha uwa odede ma re ẹdẹ. Ọ keghi gie ọlọghọmwa gie uwa ne ọ miẹn ehe na danmwẹ uwa ghe, ne ọ miẹn ehe na ya emwi ne ọma fiangbe uwa vbe okiekie.

¹⁷ Rhunmwuda ọnii, wa ghẹ ro ighẹ ẹtin kevbe iwegbe obọ uwa ọ re uwa ya họn ẹfe ne egbe rua.

¹⁸ Wa yerre wẹ e Nọyaẹnmwa Osanobua rua, ọ re ọ rhie ẹtin ne uwa do ya fe. Ọ ru ọna rhunmwuda, ọ ho ne ọ mu ile ne ọ gu avbe erha uwa odede ta sẹ. Te irẹn wa rhie ile ni mwẹ do sẹ ẹdẹnẹrẹ na.

¹⁹ Wa ghẹ ya mu aro da ẹbọ ọvbehe gha gho, ra ne uwa gha ga iran vbene uwa na mianmian e Nọyaẹnmwa Osanobua rua. Wa gha danmwẹ ọẹn, ne I tama uwa ẹrẹna wẹ ta a ra fuẹn uwa a.

²⁰ Deghẹ wa ma họn ẹmwẹ ne Nọyaẹnmwa, te a ra vbe fuẹn uwa a, zẹ vbe avbe okpẹvbo ni ne a ra fuan zẹ vbene uwa ya nana ghe odaro na.