Diuteronomi 6 - Edo Bible (E Baibol Ẹdo) Version 1996

Uhi Nọkhua

¹ “Ena ọrọre avbe uhi ne Nọyaẹnmwa Osanobua tama mwẹ ne I ma uwa ẹre. Wa ghi gha ya iran ru emwi vbe otọe ne uwa ra lao ne uwa ya yin na.

² Wa ghi gha mu ohan e Nọyaẹnmwa Osanobua uwa, ne uwa vbe gha rhie uhi ẹre ne I ma uwa re lẹre, vbe ẹdẹ agbọn uwa hia, wa kevbe avbe ivbi uwa, ne uwa miẹn ehe na tọ vbe evba.

³ Wa rhie ehọ yọ wa ne ivbi Izrẹl, ne uwa vbe gha ya iran ruemwi! Ẹghẹ nii, agbọn gha ma uwa, wa ghi do khian okpẹvbo nọkhua, wa ghi vbe gha yin otọe esiesi ne ọ ma emwi okọ, zẹ vbene Nọyaẹnmwa ne Osanobua avbe erha mwa odede yan rẹn.

⁴ “Izrẹl, ye ọna rre! E Nọyaẹnmwa, awẹ e Nọyaẹnmwa ọkpa kẹkan ọrọre Osanobua mwa.

⁵ Ye ekhọe ruẹ hia ho ẹmwẹ Nọyaẹnmwa Osanobua ruẹ, kevbe orhiọn ruẹn hia kevbe ẹtin ruẹn hia.

⁶ Ghẹ mianmian avbe uhi ne I viọ ne uwa na ẹdẹnẹrẹ na ẹdẹ.

⁷ Ma avbe ivbi uwa ẹre. U ghi gha ta ẹe vbe u a gha rre owa kevbe u a kpa hin owa rre, vbu a gha hẹwẹ kevbe u a gha winna.

⁸ Gbalọ ẹe ginna obọ, u ghi vbe dele ẹe ye uharo ruẹ ne u ya gha ye ẹre rre,

⁹ wa ghi gbẹnnẹ ọẹn ye ẹkhu kevbe onurho owa uwa, kevbe onurho ẹvbo uwa.

Ibude Vbekpa A I Họn Ẹmwẹ

¹⁰ “E Nọyaẹnmwa Osanobua mwa tama avbe erha mwa odede ighẹ Ebraham, Aizik kevbe Jekọb wẹ rẹn gha mu otọe ne avbe okpẹvbo ni kọnkọn kevbe ne emwi ẹfe ye ne uwa ma bọ, ne uwa.

¹¹ Avbe owa ni rrọọ ghi vuọn ne emwi esiesi ne uwa ma viọ yọ, avbe uhae ne uwa na fian, deba ugbo azara kevbe ọghe ọliv ne uwa ma kọ. E Nọyaẹnmwa ghẹ ghi viọ uwa sẹ otọ na nẹ ighẹ te uwa ghi miẹn emwi ne uwa a rhirhi gha ho gha re.

¹² Wa ghi gie aro uwa da ẹe we wa ma mianmian e Nọyaẹnmwa ne ọ viọ uwa ke Igipt ladian vbe ehe ne uwa na te re eviẹn.

¹³ E Nọyaẹnmwa Osanobua rua ọkpa ọ re uwa gha mu ohan rẹn, rẹn ọkpa wa gha vbe gha ya gha yan eyan.

¹⁴ Wa ghẹ ga ẹbọ ọvbehe, wa ghẹ ga ẹbọ avbe iran ni lẹga uwa.

¹⁵ Wa gha danmwẹ ọẹn, ohu e Nọyaẹnmwa gha hihiẹ yan uwa zẹ vbe erhẹn, ọ ghi fuẹn uwa a fẹẹrẹ rhunmwuda, e Nọyaẹnmwa Osanobua mwa ne ọ gu uwa rrọ, a i gu ẹe ta ekpẹn.

¹⁶ “Wa ghẹ danmwẹ Nọyaẹnmwa Osanobua rua ghe, zẹ vbene uwa ru vbe Masa.

¹⁷ Gia miẹn wẹ wa ya uhi ne ọ viọ ne uwa ru emwi.

¹⁸ Wa gha ru ne Nọyaẹnmwa khare ighẹ ọgbae, ọ vbe kei, agbọn gha maa uwa. Wa gha sẹtin yan otọe ni ne ọ ma emwi okọ ne Nọyaẹnmwa ve avbe erha uwa odede re.

¹⁹ Wa gha sẹtin khulo avbe eghian uwa ladian zẹ vbene irẹn khare.

²⁰ “Ẹdẹnakhuẹ, ivbi uwa gha nọ uwa wẹẹ, ‘Vbọzẹ ne Nọyaẹnmwa Osanobua mwa na wẹ ne ima gha ye avbe uhi na hia ru emwi yi?’

²¹ Ẹghẹ nii, wa ghi tama iran wẹẹ, ‘Eviẹn ọba Igipt ma te gha khin, e Nọyaẹnmwa keghi ya ẹtin ẹnrẹn nọkhua miẹn ima fan.

²² Ma keghi ye aro ima miẹn iwinna ọyunnuan ne ọ winnaẹn, ọ na ru ivbi Igipt ọ yan aro ua, kevbe ọba iran kevbe ekhaẹmwẹ iran.

²³ Ọ keghi miẹn ima fan vbe obọ Igipt ne ọ viọ ima gha die edinran, ọ mu otọe na ne ima, zẹ vbene ọ ve avbe erha mwa odede ẹre.

²⁴ Ẹre Nọyaẹnmwa ne Osanobua ima, na tama ima ne ima gha ye avbe uhi na hia ru emwi kevbe ne avbe gha mu ohan irẹn. Adeghẹ ma ru vberriọ, ọ gha gbe aro ghe ẹvbo mwa, ọ ghi ye ẹfe kpọ vbọ.

²⁵ Osanobua gha mwẹ ẹko ne ọ rhiẹnrhiẹn ghe mwa a deghẹ ma ye ẹko ata ru emwi hia ne ọ khama mwa.’