Diuteronomi 5 - Edo Bible (E Baibol Ẹdo) Version 1996

Uhi Igbigbe

¹ E Mosis keghi tie ivbi Izrẹl hia si koko, ọ tama iran wẹẹ, “Wa ne ivbi Izrẹl, wa danmwẹ ehọ uhi hia ne I ra viọ ne uwa ẹrẹna. Wa ruẹ iran ne uwa vbe miẹn wẹ wa ya iran gha ru emwi.

² E Nọyaẹnmwa Osanobua mwa keghi gu ima ta ile vbe Oke Sainai.

³ Ẹ i re avbe erha mwa odede ọkpa ọ re ọ gu ta ile na, sokpan kevbe ima nọ, ma hia fẹẹrẹ ni rre agbọn ẹdẹnẹrẹ na.

⁴ E Nọyaẹnmwa keghi gu uwa guan ke uwu erhẹn ni rre, vbe ghe aro mwẹ ghe aro uẹ.

⁵ Ẹghẹ nii, mẹ keghi mudia ye ẹkpo Nọyaẹnmwa kevbe uwa ne I miẹn ehe na gha tama uwa hia vbene ọ kha hẹ, rhunmwuda ohan erhẹn nii mu uwa, wa ma vbe ho ne uwa hin uhunmwu oke nii. “E Nọyaẹnmwa keghi kha wẹẹ,

⁶ ‘Mẹ ọrọre Nọyaẹnmwa Osanobua ruẹ, ne ọ fan uwa vbe irri lahin otọ Igipt ne uwa na te re eviẹn rre.

⁷ “ ‘Ghẹ ga osa ọvbehe vbe ẹ i re imẹ.

⁸ “ ‘Ghẹ ma amazẹ emwikemwi ni rre iso ra ni rre otọ ne egbe ruẹ ra ọghe ni rre amẹ ni rre ototọ otọe.

⁹ Ghẹ ya uhunmwu rhanmwẹ otọ ne amazẹ rhọkpa ra ne u vbe ga iran, rhunmwuda mẹ ọ re Nọyaẹnmwa Osanobua ruẹ, a i gun mwẹ mwa ẹrrẹe. I rri iran ni khuiwu mwẹ oya kevbe ivbi iran ya sẹ orre ne ogieha kevbe ne ogienẹ.

¹⁰ Sokpan I ghi rhie ahoẹmwọmwa mwẹ ma inu arriaisẹn ne ọ khin vbe uwu iran ni ho ẹmwẹ mwẹ, ni vbe ya uhi mwẹ ru emwi.

¹¹ “ ‘Ghẹ so eni mwẹ ya gha ziba rhunmwuda mẹ ne Nọyaẹnmwa ne Osanobua ruẹ gha rri ọmwa ne ọ rhirhi lo eni mwẹ ọ ghe ihan oya.

¹² “ ‘Gha zẹ Ẹdẹ ikẹtin kọ ne u ya fi ohan mẹ zẹ vbe ne imẹ ne Nọyaẹnmwa Osanobua ruẹ tama ruẹn.

¹³ Ya ikpẹdẹ ehan winna iwinna ruẹn,

¹⁴ sokpan ikpẹdẹ ne ogihinrọn, ẹdẹ ikẹtin ne a ya fiohan mẹ nọ. Ọmwa rhọkpa ghẹ winna vbe ẹdẹ nii, ọ re uwẹ tobọ ruẹ nọ, ra avbe ivbuẹ. ra eviẹn ruẹn ra emwirri ruẹ ra orhunmwuyẹn ni rre ẹvbo ruẹ.

¹⁵ Yerre we eviẹn wa te vbe gha khin vbe otọ Igipt, kevbe wẹ mẹ ne Nọyaẹnmwa Osanobua ruẹ ọ re ọ ye ẹtin kevbe iwegbe mwẹ nọkhua fan uwa vbe irri. Ọnii ọ zẹe ne I na wẹ ne uwa gha zẹ nene ẹdẹ kọ ya hẹwẹ.

¹⁶ “ ‘Gha ya ọghọ ne erha a kevbe iye uẹ zẹ vbene imẹ ne Nọyaẹnmwa Osanobua ruẹ tama ruẹn, ne agbọn miẹn ehe na ma ruẹn kevbe ne u vbe tọ vbe otọe ne imẹ ra mu nuẹn.

¹⁷ “ ‘Ghẹ de izigha.

¹⁸ “ ‘Ghẹ ghẹẹ.

¹⁹ “ ‘Ghẹ rha.

²⁰ “ ‘Ghe ba ọmwa ifi ẹzọ ohoghe.

²¹ “ ‘Ghẹ yaro ye amwẹ ọmwa ọvbehe. Ghẹ yaro ye owa ẹre, ra otọe ẹre, ra eviẹn ọnrẹn, ra ẹmila ẹre ra ekẹtẹkẹtẹ ọ re ra emwikemwi ni ghi re Ọghe ọe.’

²² “E Nọyaẹnmwa keghi viọ uhi na ne iran hia ni si egbe koko ye ototọ oke nii. Avbe uhi na ọ re ọ viọ ne iran, ọ ma vbe sẹ ọnii, ọ keghi ye urhu nọkhua guan ke uwu erhẹn rre kevbe uwu okuku ne ọ mwẹ imi rre. Ọ keghi gbẹnnẹ avbe uhi na ye uhanhan okuta eva, ọ na viọ mẹ.”

Ohan Mu Avbe Emwa Nii

²³ “Ugbẹn vbe erhẹn ghi baa vbe uhunmwu oke ni hia, vbe uwa ghi vbe họn urhu nii guan ke uwu ebiebi ni rre, avbe olotu uwa kevbe avbe ekhaẹmwẹ emwa uwa keghi bu mwẹ gha dee.

²⁴ Iran keghi kha wẹẹ, ‘E Nọyaẹnmwa Osanobua ima rhie ukpọlọmwẹ ọnrẹn kevbe uyi ẹre ma mwa, ẹghẹ ne ima na họn vbe ọ guan ke uwu erhẹn nii rre! Ma miẹn ọẹn ẹrẹna nian wẹ ọmwa sẹtin ye gha rre agbọn vbe Osanobua gu ẹe guan nẹ.

²⁵ Sokpan vbe ima a ghi ra na vbe dọlegbe rhie uhunmwu da uwu hẹ nian? Erhẹn ugborrirri nii gha fuẹn ima an. Te ima wulo a deghẹ ma dọlegbe họn vbe e Nọyaẹnmwa ne Osanobua gu ima guan.

²⁶ De emwa ne ọ he ka họn vbe Osanobua ne ọ rrọọ guan ke uwu erhẹn rre ẹdẹ, ọ na ye vbe gha rre agbọn?

²⁷ Dọlegbe gha khian e Mosis, ne u danmwẹ ehọ ẹmwẹ hia ne Nọyaẹnmwa Osanobua mwa gha ta. U ghi dọlegbe bu mwa gha dee do tama mwa, ma gha danmwehọ ne a vbe ya ẹe gha ru emwi.’

²⁸ “E Nọyaẹnmwa ghi họn ọna, ọ keghi tama mwẹ wẹẹ, ‘I họn vbene iran na kha hẹ, ẹmwata iran ta ẹe.

²⁹ Vbọ rrọọ nian akpawẹ erriọ ekhọe iran ra gha ye ẹdẹ, vbọrrọ akpawẹ iran gha lohan mwẹ ne iran vbe gha rhie uhi mwẹ mwẹ! Ne agbọn miẹn ehe na ma iran kevbe uniẹn ivbi iran ẹdẹdẹmwẹdẹ.

³⁰ Ya khama iran ne iran werriegbe gha rrie uwu owa ukpọn iran.

³¹ Sokpan e Mosis, wẹ mudia ke mwẹ vbe emwa, I gha viọ avbe uhi ke iyi mwẹ hia ma ruẹn. Ma avbe emwa ni re, ne iran miẹn ehe na gha ya iran ru emwi vbe otọ ne I ra mu ne iran.’

³² “Ivbi Izrẹl, wa gie a miẹn wẹ wa ru emwi ne Nọyaẹnmwa Osanobua ruẹ tama ruẹn. Ghẹ i rra uhi ẹre rhọkpa.

³³ Gha ye ehia ru emwi, ne agbọn miẹn ehe na ma uwa, wa ghi miẹn ehe na gha rre otọ ne uwa ra ya yin khian rhinrin.