Diuteronomi 34 - Edo Bible (E Baibol Ẹdo) Version 1996

Uwu Ọghe Mosis

¹ E Mosis keghi ke otọe ne ọ rriẹe ọghe Moab gha rrie oke Nebo vbe uhunmwu Oke Pisga vbe odẹ ọghe Jẹriko, evba e Nọyaẹnmwa na rhie otọe Kenan hia ma rẹn: otọe Giliad rhinrin ya sẹ Dan vbe odẹ okun.

² Otọe Naftali hia, otọe Ifreim kevbe Manasẹ, otọe Juda rhinrin ya sẹ Okun Meditẹrrenian vbe odẹ ekẹn;

³ odẹ ekẹn Juda, kevbe otọ ne ọ rriẹe ne ọ ke Zoa ya sẹ Jẹriko ne ẹvbo Udin.

⁴ Ẹre Nọyaẹnmwa na tama e Mosis wẹẹ, “Otọe ne I ve Ebraham, Aizik kevbe Jekọb re wẹ I gha mu ne ivbi iran ena khin. I rhie ẹre ma ruẹn sokpan, mẹ i ra kue ne u gha rrie evba.”

⁵ Ẹre Mosis ne ọguọmwadia e Nọyaẹnmwa na wu vbe evba vbe otọ Moab zẹ vbene e Nọyaẹnmwa kha re ighẹ ọ gha ye.

⁶ E Nọyaẹnmwa keghi re ẹre ye iya ne ọ mu aro da Betpeọ, sokpan do sẹ ebanbanna, ọmwa ne ọ rẹn ehe ne a wa re ẹre yi zẹẹ, ẹ i rrọ.

⁷ Ukpo iyehan ọ re Mosis gha ye vbe ọ wu, te ọ ye wegbe vbene ọ ye, aro ẹre ke wa ye maa.

⁸ Ivbi Izrẹl keghi ye ikpẹde ọgban khiẹ ọre vbe otọe ne ọ rriẹe ọghe Moab. Ẹghẹ ne a ya khiẹ e Mosis keghi fo.

⁹ E Jọsua ne ovbi Nọn keghi vuọn ne ẹwaẹn rhunmwuda, e Mosis zẹ ọe nẹ ne ọ rhie ihe irẹn. Ivbi Izrẹl keghi wa gha họn ẹmwẹ ne Jọsua, iran kegha lele uhi ne Nọyaẹnmwa la obọ e Mosis rhie gie iran.

¹⁰ Ke ẹghẹ nii gha dee, a ma he miẹn akhasẹ ne ọ yevbe Mosis vbe Izrẹl, ọmwa ne Nọyaẹnmwa wa gu guan vbe ghe aro mwẹ ghe aro uẹ.

¹¹ A ma he miẹn akhasẹ ne ọ winna iwinna ama kevbe ọ yan unu uan, egbe ne Nọyaẹnmwa gie Mosis ne ọ winna yan ọba Igipt kevbe ekhaẹmwẹ ọnrẹn kevbe ẹvbo nii hia fẹẹrẹ.

¹² A ma he miẹn akhasẹ ne ọ he ru iwinna nekhua ni yan ọmwa unu uan ne Mosis winna ẹn vbe odaro ivbi Izrẹl hia.