Diuteronomi 33 - Edo Bible (E Baibol Ẹdo) Version 1996

E Mosis Fiangbe Ewae Izrẹl

¹ Erhunmwu afiangbe ne Mosis ne ọmwa Osanobua na ne avbe ẹwae Izrẹl ọ te wu ọ re ọna khin.

² E Nọyaẹnmwa ke Oke Sainai gha dee, ọ keghi yan rre vbe owẹn yan Idọm, ọ keghi ke uhunmwu Oke Paran yunmwu yan emwa ẹnrẹn, Odibo Osa arriaisẹn igbe keghi deba ẹre erhẹn ne ọ baa kegha rre obọ erha ọmwa ẹnrẹn.

³ E Nọyaẹnmwa ho ẹmwẹ emwa ẹnrẹn, ọ keghi vbe degue iran ni re ọghe ọe. Rhunmwuda ọnii, ma ghughẹrre vbe owẹ ọre a na ya uhi ẹre gha ru emwi.

⁴ Ma ya uhi ne Mosis rhie ne ima gha ru emwi, emwi ighobioye ne ọ sẹre ọghe ẹvbo mwa.

⁵ E Nọyaẹnmwa kegha re ọba emwa rẹn Izrẹl, vbe a ghi si avbe ẹwae kevbe ọkaolotu iran si koko.

⁶ E Mosis keghi guan vbekpa ẹwae Riubẹn wẹẹ: “E Riubẹn mwẹ i ra wu gbẹro, emwa iran gha rhe re ibozẹghẹ.”

⁷ Ọ keghi kha vbe ekpa ọghe Juda wẹẹ: “E Nọyaẹnmwa họn urhu iran ne iran ya nọ iyobọ. ne u vbe ku iran gbe ba ẹwae nekpa e Nọyaẹnmwa, gbinna ne iran ne u vbe yi iran obọ yan eghian iran.”

⁸ Ọ keghi kha vbe ekpa ọghe ẹwae Livai wẹẹ: “Wẹ ne Nọyaẹnmwa, ye egbe ruẹ ne a rẹn vbe ekpa Urim kevbe Tumin, la obọ avbe Livai, ne eguọmwadia esi ruẹ wẹ danmwẹ iran ghe vbe Masa u kevbe miẹn otọ iran ye emwata vbe ẹzẹ Mẹriba.

⁹ Iran ọ ye ẹko ata yin ghe ruẹ sẹ evbibiẹ emọ, etẹn ra emọ iran ya uhi ruẹ ru emwi, iran ma mu ẹmwẹ ile ruẹ fua.

¹⁰ Iran gha ma emwa ruẹn re ne iran gha ya uhi ru emwi, iran gha zọ ese vbe aka ruẹ.

¹¹ E Nọyaẹnmwa gie ẹwae iran gha wan yọ vbe iwegbe, gie emwi ne iran ru gha yẹ ruẹ, dunmwu eghian iran hia, ne iran ghẹ ghi guakpao ọvbehe.”

¹² Ọ keghi kha vbekpa ẹwae Bẹnjamin wẹẹ: “Ewae ne Nọyaẹnmwa ho ẹmwẹ ọnrẹn ne ọ vbe degue ẹdẹgbegbe iran ya rrọọ vbe a i mwẹ ẹbe vbe odaro ẹre. Ọ keghi vbe di uwu ẹbu iran ya.”

¹³ Ọ keghi kha vbe ẹwae Josẹf wẹẹ: “Te Nọyaẹnmwa gha rhie afiangbe amẹ ne otọe iran, kevbe amẹ ne ọ ke ototọ vbe uwu otọ rre.

¹⁴ Te a gha ya emwiokọ ne owẹn ya vboo we otọe iran ne ọ mwẹ ni bun vbe emwiokọ ne a miẹn vbe dọmwadẹ ẹghẹ.

¹⁵ Te a gha ya emwiokọ ni maa sẹẹ rhu oke iran ọghe nẹdẹ.

¹⁶ Te a gha ya emwi ni maa sẹẹ hia vuọn otọe iran, ne a ye umamwẹ e Nọyaẹnmwa fiangbe, ọmwa ne ọ guan ke uwu oha erhẹn rre, te afiangbe na hia gha sẹ vbe egbe ẹwae Josẹf rhunmwuda ọkaolotu rẹn gha khin vbe uwu ẹbu etiọnrẹn.

¹⁷ Ẹtin ekhuia ẹmila ọ re Josẹf ghaa mwẹ, ke igho ọghe ede. Avbe igho ẹre kegha re inu arriaisẹn ne ọ khin ọghe Manasẹ kevbe arriaisẹn igbe ọghe Ifreim, igho ni ọ re ọ ya solo avbe uhunmwu ẹvbo, ọ ghi sua iran gha rrie odẹ ufomwẹ agbọn.”

¹⁸ Ọ keghi kha vbe ekpa ẹwae Zẹbulọn kevbe Isaaka, “Te ẹki ne Zẹbulọn do vbe okun gha maa ne ẹẹn, ne ẹfe Isaaka gha muan yọ vbe owa.

¹⁹ Iran tie okpẹvbo ni bun gha die oke iran, iran keghi zọ ese ne ọ kere vbe evba, rhunmwuda okun iran ke viọ ẹfe iran rre, kevbe ke ekhae ni rre ọkpẹn okun rre.”

²⁰ Ọ keghi kha vbe ekpa ẹwae Gad wẹẹ: “Rho Osanobua ne ọ gie otọ iran gha kpolo. Gad mudia gha khẹ zẹ vbe oduma ne ọ yan obọ ọkpa ra ikpakpa uhunmwu fua.

²¹ Iran keghi mu ehe ne ọ maa sẹẹ vbe otọe nii ne egbe iran, a na ghae oghae ọkaolotu ne iran. Iran ya uhi kevbe ilele Osanobua ru emwi vbe avbe ọkaolotu Izrẹl si koko.”

²² Ọ keghi kha vbe ekpa ẹwae Dan wẹẹ: “Ovbi oduma ne ọ ke Basian san ladian, ọre Dan khin.”

²³ Ọ keghi kha vbe ekpa ẹwae Naftali wẹẹ: “Aro ne o maa ọghe Nọyaẹnmwa kakabọ fiangbe Naftali otọ iran wa ke odighi e Galili ya sẹ odẹ ekẹn.”

²⁴ Ọ keghi kha vbe ekpa Asia wẹẹ: “A fiangbe Asia sẹ ẹwae nekpa hia, ikpẹ amiẹnmiẹn gha nọ ne avbe etiọnrẹn, te otọe ẹre gha vuọn ne erhan ọliv.

²⁵ Te ọ gha ya onurho ematọn gba ogba ga avbe ẹvbo ẹre te ọ gha rrọ ẹghẹ hia vbe ne ai na fian afianma.

²⁶ “Wa ne ivbi Izrẹl, ẹbọ ne ọ yevbe Osanobua uwa i rrọọ, ne ọ ye ose nọkhua hin fian iso rra, ọ na hin la okuku amẹ do ye uwa obọ.

²⁷ Osanobua ọ re ne ọmiẹguan ne uwa de ẹdẹ ekuabọ etẹbitẹ ọ re, ẹre ọ da uwa yi. Ọ keghi khulo eghian uwa ladian vbene uwa ya sikẹ odaro. Ọ wẹ ne uwa wa dunmwu ehia a fẹẹrẹ.

²⁸ Ẹre ivbi e Jekọb na gha rrọọ vbe ọfumwegbe ọ kevbe gbe ẹkun sẹ otọ vbe otọ ne ọka kevbe ayọn na kpọ ehe ne iso na gie evbu gha tue ye otọ.

²⁹ Izrẹl, a miẹn uwa ne u ghi ye ọmwa ne ọ yevbe ruẹ i rrọọ, ẹvbo ne Nọyaẹnmwa miẹnfan. E Nọyaẹnmwa tobọ re ọrọre asa kevbe umozo ọwua ne ọ gha degue ruẹ do khọnmiotọ ne uẹn. Eghian uwa gha rre do rinmwian ye itohan, wẹ gha ye owẹ rrilo iran mu otọ.”