Diuteronomi 31 - Edo Bible (E Baibol Ẹdo) Version 1996

E Jọsua Rhie Ihe Mosis

¹ E Mosis keghi ye gha gu ivbi Izrẹl guan khian,

² Ọ wẹẹ, “Ukpo iyehan ọ re i ghi ye na, mẹ i ghi ra sẹtin gha re olotu uwa ọvbehe. Ye vbe sẹ ọnii, e Nọyaẹnmwa tama mwẹ ne wẹ mẹ i ra fian Ẹzẹ Jọdan rra.

³ E Nọyaẹnmwa Osanobua uwa gha ke odaro ne uwa, ọ ghi fuẹn avbe okpẹvbo na hia a, ne uwa miẹn ehe na yan otọe iran, e Jọsua ghi gha re olotu uwa zẹ vbene Nọyaẹnmwa khare.

⁴ E Nọyaẹnmwa gha fuẹn iran na hia a, zẹ vbene ọ khọnmiotọ ọghe Saihọn kevbe Ọg avbe ọba ivbi Amọri, ọ kevbe fuẹn iran ẹvbo rua.

⁵ E Nọyaẹnmwa gha gie uwa khọn iran miotọ, wa ghi ru iran vbene I tama uwa zẹẹ.

⁶ Wa gha wegbe ne uwa vbe din. Wa ghẹ gie ohan emwa nii mu uwa, Osanobua uwa ighẹ e Nọyaẹnmwa tobọ ẹre gha yaba uwa, ẹ i ra hiẹ uwa ra ne ọ he uwa ye otọ.”

⁷ Ẹre Mosis na tie Jọsua, ọ na tama rẹn vbe sirra ivbi Izrẹl hia wẹẹ, “U ghi wegbe ne u vbe din wẹ ọrọre ọmwa ne ọ gha mu olotu viọ emwa na ya yin otọe nii ne Nọyaẹnmwa ve avbe erha iran odede ẹre.

⁸ E Nọyaẹnmwa tobọ ẹre gha ke aro ne uwa, ọ gha vbe gha rrọọ yaba uwa, rẹn i ra hiẹ uwa ra ne ọ he uwa ye otọ, rhunmwuda ọnii, wa ghẹ gie ẹtin fo uwa, wa ghẹ gie ohan mu uwa.”

A Ghi Gha Tie Avbe Uhi Na Ukpo Ihinrọn Ihinrọn

⁹ Ẹre Mosis na gbẹnnẹ avbe uhi Osanobua ye otọ, ọ na mu ne avbe ohẹn Livai ni siẹn ro Ẹkpẹti Ile ọghe Nọyaẹnmwa kevbe avbe ọkaolotu Izrẹl.

¹⁰ Ọ keghi tama iran wẹẹ, “Uhukpa vbe ukpo ihinrọn, ẹghẹ vbe ukpo Afanyotọ a gba nẹ, u ghi tie ena hia ladian vbe urhu ne ọ la vbe ẹghẹ Emwiukpo Irhu nii.

¹¹ U ghi tie ẹre ma ivbi Izrẹl vbe iran a rre do ga e Nọyaẹnmwa Osanobua uwa, vbe ehe ọkpa ne a na ga nii.

¹² Tie avbe ikpia hia, ikhuo hia, ibiẹka hia kevbe avbe orhunmwuyẹn ni rre uwa ẹvbo, ne iran hia miẹn ehe na họn ẹẹn, ne iran sẹtin ruẹ vbene a ya ọghọ ne Nọyaẹnmwa Osanobua hẹ, ne iran vbe gha ya ẹkoata lele emwi ne ọ ma emwa re.

¹³ Odẹ vbe nian, avbe ivbi uwa ni ma he họn uhi e Nọyaẹnmwa ne Osanobua uwa, ghi do họn ẹẹn. Ẹghẹ nii, iran ghi do gha họn ẹmwẹ ne ẹẹn vbe omwa ẹghẹ ne iran gha ya vbe otọe nii ne uwa ra ya yin na vbe iyeke Jọdan.”

Ẹmwẹ Ne Nọyaẹnmwa Ghi Tama Mosis Kiekie

¹⁴ Ẹre Nọyaẹnmwa na tama Mosis wẹẹ, “Ẹghẹ ne u ra ya vbe agbọn ma ghi mobọ tan. Tie Jọsua ne u rhie ẹre gha die uwu Owa Ukpọn, ne I miẹn ehe na vbe ta ẹmwẹ ọghe ọe ma rẹn.” Ẹre Mosis kevbe Jọsua na la uwu Owa Ukpọn,

¹⁵ e Nọyaẹnmwa keghi rhie egbe ma rẹn vbe evba zẹ vbe orre okuku amẹ ne ọ mudia ye onurho Owa Ukpọn nii.

¹⁶ E Nọyaẹnmwa keghi tama e Mosis wẹẹ, “U gha rherhe wu ban, u gha ghi wu nẹ, emwa na gha do khian ne a i ghi mu ẹtin yan ghe mwẹ, iran ghi gha rra ile nii ne I gue iran ta. Iran ghi he mwẹ ye otọ ya gha gho avbe ẹbọ otọe nii ne iran khian lao na.

¹⁷ Emwi vberriọ gha sunu, ohu iran gha mu mwẹ, I gha he iran ye otọ, a ghi fuẹn iran an. Ọkhọ ni mu ohan hia gha rruan iran, ẹghẹ nii iran ghi do rẹn wẹ emwi na sunu vbe egbe iran rhunmwuda, mẹ ne Osanobua iran i ghi rrọ yaba iran.

¹⁸ I ghi vbe he ne I yi iran obọ, rhunmwuda, iran ru emwi dan, iran na ya gha ga ẹbọ ọvbehe.

¹⁹ “Banbanna nian, gbẹn ihuan na ye otọ. Ma ivbi Izrẹl re, ne ọ gha re osẹe mwẹ ghe iran.

²⁰ I gha viọ iran gha rrie otọe esiesi ne ọ maa emwiokọ na, zẹ vbene I tama avbe erha iran odede. Evba nii i. iran gha miẹn dọmwadẹ evbare ne iran ho, iran gha vbe gha rrọ vbe uwu ẹkovọnmwẹ, sokpan iran gha fi iyeke gbe, iran ghi ya gha gho ẹbọ ọvbehe. Iran gha he mwẹ ye otọ, iran ghi vbe rra ile mwẹ.

²¹ Ọkhọ dan ni bun ghi do rruan iran. Ẹghẹ nii, ihuan na ghi gha rre evba zẹ vbe osẹe mwẹ ghe iran, rhunmwuda ivbi iran gha ye gha so ẹe. Uhin vbe banbanna nian, vbe I te viọ iran sẹ otọ ne I wẹ I gha mu ne iran, I rẹn emwi ne iran ro vbe ekhọe.”

²² Vbe ẹdẹ nẹdẹrriọ, zẹẹ e Mosis keghi gbẹn nene ihuan ye otọ, ọ na ma ivbi Izrẹl ẹre.

²³ Ẹre Nọyaẹnmwa na tama Jọsua ne ovbi e Nọn wẹẹ, “Wegbe ne u vbe din. U gha viọ ivbi Izrẹl gha rrie otọe nii ne I ve iran ere. I gha vbe gha rrọọ yaba ruẹ.”

²⁴ E Mosis keghi gbẹnnẹ avbe Uhi Osanobua nii ye ebe. Ọ ma vbe sẹ emwi ọkpa rae.

²⁵ Ọ ghi gbẹn ọẹn fo nẹ, ọ keghi tama avbe ohẹn e Livai, iran ni sin ẹro Ẹkpẹti Ile ọghe Nọyaẹnmwa wẹẹ,

²⁶ “Wa rhie ebe uhi Osanobua na, ne uwa rhie ẹre ye ọkpẹn Ẹkpẹti Ile ọghe Nọyaẹnmwa Osanobua uwa, ne ọ sẹtin gha rre evba zẹ vbe osẹe ghe emwa ẹnrẹn.

²⁷ I rẹn vbene iran ze vbe udu sẹ hẹ kevbe ne iran na vbe sọtẹ. A deghẹ iran sọtẹ ghe Nọyaẹnmwa vbe imẹ rre agbọn, I gha wu nẹ, evba iran ra na sọtẹ sẹ.

²⁸ Si avbe ọkaolotu kevbe ekamakodin ni rre avbe ẹwae rua koko ye odaro mwẹ, ne I miẹn ehe na ta avbe ẹmwẹ na ma iran. I gha tie ẹrinmwi kevbe agbọn ne iran do sẹ osẹe ghe iran.

²⁹ I rẹnrẹn wẹ I gha wu ne, iran ghi do khian emwa dan, iran ghi mu emwi ne I ma iran ẹre fua. Vbe ẹdẹ ne ọ dee, ọkhọ gha rruan iran rhunmwuda, iran ya ohu mu e Nọyaẹnmwa, vbe ne iran na ya gha ru emwi ne ọ tama iran ighẹ a wua.”

Ihuan Ọghe Mosis

³⁰ E Mosis keghi wa kharha ihuan nii hia ya sẹ ehe ne ọ sẹ ọe vbene ivbi Izrẹl hia na danmwẹ ehọ.