Diuteronomi 30 - Edo Bible (E Baibol Ẹdo) Version 1996

Vbene Emwi Gha Ye Ne A Gha Na Viọ Emwi Ye Ihe Deba Afiangbe

¹ “Banbanna nian, I viọ emwi ye otọ ne uwa, ne uwa zẹ vbọ, deghẹ afiangbe nọ ra ihẹn. Emwi na hia gha sunu nẹ vbe egbe uwa, ighẹ te uwa ghi rre uwu ẹbu emwa ni rre ehe ne Nọyaẹnmwa zagha uwa kua yi, wa ghi ye avbe emwi ne I wẹ ne uwa na zẹ.

² “Ẹkpo nii wa kevbe avbe ivbi uwa ghi fiwerriẹ bu e Nọyaẹnmwa gha dee, wa ghi ye ekhọe uwa hia kevbe orhiọn uwa hia gha lele uhi e Nọyaẹnmwa ne imẹ rhie ne uwa ẹrẹna.

³ Ẹghẹ nii, e Nọyaẹnmwa Osanobua rua gha tohan uwa. Ọ ghi viọ uwa werriegbe ke ẹvbo ne ọ zagha uwa yi gha dee, ọ ghi dọlegbe gie agbọn ma uwa.

⁴ Ọ gha khọnrẹn ne a zagha uwa gha rrie okhiẹ ehe ne agbọn sẹ, e Nọyaẹnmwa Osanobua rua dọlegbe viọ uwa rre.

⁵ Ne uwa miẹn ehe na do yan otọe nii ne avbe erha uwa odede ka yin nẹ. Ọ ghi gie agbọn ma uwa sẹ, wa ghi vbe bun sẹ vbe ne avbe erha uwa odede gha ye.

⁶ E Nọyaẹnmwa Osanobua rua gha rhie ekhọe ne ọ họn ẹmwẹ ne uwa kevbe avbe ivbi uwa, wa ghi ya ekhọe uwa hia kevbe orhiọn uwa hia ho ẹmwẹ ọnrẹn wa ghi vbe gha yin otọe nii khian.

⁷ Rẹn ghi khuẹ avbe ihẹn na hia gie avbe eghian uwa, iran ni gha khu iwu uwa, iran na vbe gha zẹ uwa kpokpo.

⁸ Wa ghi do dọlegbe gha họn ẹmwẹ nẹ ẹẹn, wa ghi vbe gha rhie avbe iyi ẹre hia ne imẹ rhie ne uwa ẹrẹna ne uwa ya ẹe gha ru emwi mwẹ.

⁹ E Nọyaẹnmwa gha gie emwi ne uwa ru hia gha dinna odẹ, wa gha mwẹ emọ ni bun kevbe avbe ẹmila ni bun, ugbo uwa ghi gha mọ emwiokọ ni bun ẹsẹse. Ẹko gha rhiẹnrhiẹn ọẹn ne ọ gie uwa gha ma an zẹ vbene ẹko rhiẹnrhiẹn ọẹn gie agbọn ma erha uwa odede.

¹⁰ Sokpan te uwa gha họn ẹmwẹ nẹ ẹẹn ne uwa vbe gha rhie uhi ẹre hia ne a gbẹnnẹ ye uwu ebe imaemwi ẹnrẹn mwẹ. Te uwa gha fiwerriẹ bu ẹre vbe ekhọe uwa hia ke orhiọn uwa hia.

¹¹ “Uhi ne imẹ viọ ne uwa ẹrẹna ma lọghọ gbe ra ne ọ gberra ne ẹtin uwa gha sẹ.

¹² Ẹ i re odukhunmwu vbe iso ọ re ọ ye amawẹ wa ghi kha wẹẹ, ‘Gha ọ ghi ra yo iso ne ima ne ọ ya mu ẹẹn tuorre ne ima họn ẹẹn kevbe ne ima vbe gha ya ẹe ru emwi?’

¹³ Vbe rriọ ẹ i vbe re iyeke okun nọkpa ọ re ọ ye amawẹ wa gha kha wẹẹ, ‘Gha ọ ghi ra fian okun rra ne ọ ya rhie ẹre gie ima, ne ima miẹn ehe na họn ẹẹn ne a vbe gha ya ẹe ru emwi?’ Ẹ i re erriọ,

¹⁴ ọ rre ehe ne uwa ye vbe emwa na, wa rẹn ọnrẹn, wa gha sẹtin tae ye uhunmwu banbanna nian, wa gha ya ẹe ru emwi.

¹⁵ “Ẹdẹnẹrẹ na, I wẹ ne uwa zẹ vbọ, adeghẹ ọ ma an ne agbọn nọ, ra ọfuan kevbe uwu.

¹⁶ Adeghẹ wa ya uhi e Nọyaẹnmwa Osanobua uwa ne imẹ rhie ne uwa ẹrẹna gha ru emwi, adeghẹ wa họn ẹmwẹ ne ẹẹn, wa na viọ uhi ẹre hia ya gha ru emwi, ẹghẹ nii agbọn gha ma uwa, wa ghi vbe khian okpẹvbo nọkhua ne emwa ni bun ye. E Nọyaẹnmwa Osanobua uwa ghi fiangbe uwa vbe otọe ne uwa ra ya yin na.

¹⁷ Sokpan, adeghẹ wa fieghe uhunmwu ye uhi ẹre, ighẹ wa ma danmwẹ ehọ, emwa na silo uwa ya gha gho ẹbọ ọvbehe.

¹⁸ Te I ta ẹe ma uwa ye otọ nian wẹ te uwa khian fuan. Wa i tọ vbe otọe nii ne ọ rre iyeke Jọdan ne uwa ra ya yin na.

¹⁹ Te I tama uwa nian ne uwa zẹ vbọ, adeghẹ ẹfe nọ ra uwu, a deghẹ afiangbe Osanobua nọ ra ihẹn. I kevbe tie agbọn vbe ẹrinmwi ne iran sẹ osẹe ye ne uwa zẹe vbọ. Wa zẹ ẹfe.

²⁰ Wa ho ẹmwẹ e Nọyaẹnmwa Osanobua rua, wa gha họn ẹmwẹ ne ẹẹn ne uwa gha ye ẹko ata gu ẹe yin, ne uwa vbe avbe ivbi uwa sẹtin tọ vbe otọe ne irẹn ve wẹ rẹn gha mu ne avbe erha uwa odede, Ebraham, Aizik kevbe Jekọb.”