Diuteronomi 3 - Edo Bible (E Baibol Ẹdo) Version 1996

Izrẹl Khọn Ọg Ne Ọba Muotọ

¹ “Iyeke ọnii, ma keghi si okhian ghe odẹ okuọ ẹvbo Basian, ẹre Ọg ne ọba na viọ emwa rẹn gha dee do gu ima gbinna vbe ọkpẹn Ẹdrẹi.

² Sokpan, e Nọyaẹnmwa keghi tama mwẹ wẹẹ, ‘Ghe gie ohan rẹn mu ẹẹn. I gha rhie irẹn kevbe ẹvbo ẹre hia kevbe emwa rẹn yan ruẹn obọ, u ghi vbe ru ẹe vbene u ru Sihọn ne ovbi Amọri ne ọ rriọba vbe Hesbọn.’

³ “Ẹre Nọyaẹnmwa na vbe rhie Ọg ne ọba kevbe emwa rẹn yan ima obọ, ma na gbele iran hia, ọkpa i vbe rrọ ne ima ma khọn mu otọ.

⁴ Ẹvbo ne ima munọ ẹn hia kegha re iyeha, iwewe Agọb, ehe ne Ọg ne ọba Basian khaemwisẹ yan.

⁵ Ẹvbo ne a kha na hia, ta a wa gbe ekẹn ni yo ga iran, ẹkhu kevbe ogba ọre a ya khui ehia. Igue ne a ma gbe ekẹn ga a ni bun kevbe gha rrọọ.

⁶ Ma keghi wa rẹnkhẹn ẹvbo nekhua ni hia a, ma na gbele ikpia, ikhuo kevbe ibiẹka ni rrọ hia a, vbene a vbe ru avbe ẹvbo ni re ọghe Sihọn ne ọba Hesbọn.

⁷ Ma keghi viọ avbe ẹmila ni rrọọ, ma na fu emwi ni rre iran ẹvbo hia viọ.

⁸ “Ẹre a na miẹn wẹ ẹghẹ ni ọ re ima na viọ ẹvbo hia ni rre odẹ ahọ Ẹzẹ Jọdan hin obọ avbe ọba Amọri eva rre, kevbe Ẹzẹ Anọn ya sẹ oke Hẹmọn.

⁹ (Oke Hẹmọn ọ re emwa Sihọn tie ẹre Siriọn, emwa Amọri keghi tie ẹre Seni.)

¹⁰ Ma keghi wa mu otọ Ọg ne ọba Basian, ẹvbo ni rre otọ nọ rriẹe, iwewe Giliad kevbe Basian hia, ya sẹ ehe ne ọ rrei gban an vbe odẹ ahọ ya sẹ Saleka kevbe Ẹdrẹi.”

¹¹ (Ọg ne ọba kegha re ne ọ ghi kiekie vbe avbe Refeim. Okuta ọ re a ya ru ẹkpẹti orinmwi ẹnrẹn, uvbẹmwẹ ọnrẹn kegha re ibata ehan utanmwẹ ọnrẹn kegha re omwa ibata iwenẹ zẹ vbe ọmwa ne agbọn hia ya mwa emwi. Ọ ye rre ẹvbo ne a tie ẹre Raba vbe Amọri ẹre na.)

Emwa Ni Yin Odẹ Ahọ Ọghe Jọdan

¹² “Ma ghi ya ẹvbo nii khian ọghomwa nẹ, I keghi mu avbe otọ ne ọ ke Aroa ne ọ rre ọkpẹn Ẹzẹ Anọn kpao do sẹ ẹvbo Giliad ba ẹvbo ni rrọ ne ẹwae ọghe Riubẹn kevbe Gad.

¹³ I keghi vbe mu ne ọ ghi ke ẹe vbe Giliad ne obọ ọkpa vbe ẹwae Manasẹ, I kevbe mu iwewe Agọb, onii nọ wẹ Basian ehe ne Ọg na te khaemwisẹ ba ẹre.” (Otọ avbe Refeim ọ re a wa gha tie Basian hia.

¹⁴ E Jea ne ovbi ẹwae Manasẹ keghi mu iwewe Agọb hia, ọnii nọ wẹ e Basian rhinrin ya sẹ uwu ọghe Gẹsiọ kevbe Maaka, ọ keghi he avbe igue ni rrọọ hia eni gi egbe irẹn, igue Jea ọ re a ye tie iran do sẹ ẹdẹnẹrẹ na.)

¹⁵ “I keghi mu Giliad ne ivbi uniẹn ọghe Makia ne ovbi ẹwae Manasẹ.

¹⁶ I keghi mu ikinkin otọe ne ọ ke Giliad yasẹ Ẹzẹ Anọn ne ẹwae Riubẹn kevbe Gad. Ehe ne otọe iran sẹe vbe odẹ ekẹn keghi re adesẹneva ẹzẹ nii, ehe ne ọ la ẹe vbe odẹ okuọ kevbe gha rrie Ẹzẹ Jabọk, ihe eso vbọ kevbe gha re ehe ne otọe Amọri sẹe.

¹⁷ Vbe odẹ orriẹ, otọe iran keghi ya sẹ ẹzẹ Jọdan, ke odighi e Galili vbe odẹ okuọ ya sẹ Okun Nọwu vbe odẹ ekẹn, kevbe ya sẹ ẹzi Oke Pisga vbe odẹ ahọ.

¹⁸ “Ẹghẹ ni ọ re I na vbe rhie igiodẹ na ne iran wẹẹ: ‘E Nọyaẹnmwa Osanobua mwa ọ re ọ mu otọe nii ne uwa vbe ahọ Jọdan ne uwa yin ẹnrẹn. Banbanna nian, wa gbalọ ivbi iyokuo uwa egbe okuo, ne uwa gie iran fian Jọdan rra ke odaro ẹwae ivbi Izrẹl nekpa ne iran ya yi iran obọ ya gbe ẹkun sẹ otọ yin otọe iran.

¹⁹ Avbe amwẹ uwa, kevbe ivbi uwa kevbe ẹmila uwa, I rẹnrẹn ighẹ emwirri uwa wa bun, ọ re ọ gha mudia vbe ẹvbo ne I ghae sẹ uwa obọ.

²⁰ Wa ru iyobọ ne ivbi Izrẹl ne ihua uwa, iran te do gbe ẹkun sẹ otọ vbe avbe otọe nii ne Nọyaẹnmwa gha mu ne iran vbe odẹ orrie Jọdan, kevbe wẹ e Nọyaẹnmwa te do gie iran gha rre ọfumwegbe zẹ vbene ọ vbe ru ne uwa. Iyeke onii dọmwadẹ ọghọe vbe uwu uwa sẹtin dọlegbe gha die otọ ne I mu ne uwa.’

²¹ Iyeke ọnii, I keghi do tama Jọsua wẹẹ, ‘U miẹn emwi hia ne Nọyaẹnmwa ru avbe ọba eva ni re, e Saihọn kevbe Ọg, erriọ ọ ra vbe ru iran hia ni dekẹe ne uwa gha mu okuo ye ẹvbo ẹre.

²² Ghẹ gie ohan iran mu ẹẹn, rhunmwuda, e Nọyaẹnmwa Osanobua ruẹ gha gbinna nuẹn.’

A Ma Kue Ne Mosis La Kenan

²³ “Ẹghẹ nii, I keghi kakabọ na erhunmwu wẹẹ,

²⁴ ‘E Nọyaẹnmwa ne Udazi, I rẹnrẹn wẹ omuhẹn emwi ọ yan unu uan nekhua ne u ra ru ọkpa ọ re u rhie maa mwẹ. Ẹbọ ọkpa i rre ẹrinmwi kevbe agbọn ne ọ gha sẹtin ru avbe emwi nekhua ne uwẹ ru!

²⁵ E Nọyaẹnmwa, gun mwẹ fian Ẹzẹ Jọdan rra ne I miẹn ehe na miẹn otọe ne ọ ma emwi okọ ne ọ rre obọ nọkpa, ẹvbo oke ne mose mose nii, kevbe Oke Lebanọn.’

²⁶ “Sokpan rhunmwuda uwa na, e Nọyaẹnmwa keghi mu ohu ghe mwẹ, ọ ma vbe danmwehọ, sokpan ọ keghi kha wẹẹ, ‘Ọnii sẹe! Ghẹ ghi dọlegbe ta ẹe!

²⁷ Gha rrie uhunmwu oke Pisga vbe ehe ne ọ sẹe ne u ghe odẹ okuọ kevbe ekẹn, ahọ kevbe orrie. Kakabọ gbe aro ke otọ ghe emwi ne u bẹghe rhunmwuda, wẹ i ra fian Jọdan rra.

²⁸ Rhie igiọdu ne Jọsua. Rhie igiọdu ne ẹẹn ne u rhie orhiọn ye ọre iwu, rhunmwuda rẹn ọ ra viọ emwa nii gberra ya yin otọe ne u dẹghe na.’

²⁹ “Ọre ima na gha rre iya nii ne ọ mu aro da Betpeọ.”