Diuteronomi 29 - Edo Bible (E Baibol Ẹdo) Version 1996

Ile Ne Nọyaẹnmwa Gu Izrẹl Ta Vbe Otọe Moab

¹ Enena ọrọre, ẹmwẹ ne a guan ye ile ne Nọyaẹnmwa tama Mosis ne ọ gu ivbi Izrẹl ta vbe ẹghẹ ne iran na gha rre otọe Moab. Te avbe rhie ọna te ile ne Nọyaẹnmwa iran ta vbe Oke Sainai.

² E Mosis keghi tie ivbi Izrẹl hia si koko, ọ na tama iran wẹẹ, “Aro uwa tobọ uwa sẹ emwi ne Nọyaẹnmwa ru ọba Igipt re, avbe ekhaẹmwẹ ẹvbo ẹre, kevbe ẹvbo ẹre hia.

³ Wa miẹn egboghogbogho ugborrirri kevbe iwinna ọyunnuan kevbe iwinna ama ne Nọyaẹnmwa winna ẹn.

⁴ Sokpan, do sẹ ẹdẹnẹrẹ na, ọ ma he sẹtin ru ẹe ne uwa rẹn otọ emwi ne uwa miẹn.

⁵ Vbe ukpo iyeva ne Nọyaẹnmwa ya viọ uwa la uwu ato gberra, ukpọn uwa kevbe ibata uwa ma khian ọmaẹn.

⁶ Wa ma gha mwẹ ebrẹd ne uwa gha re ra ayọn ra ebiẹ ne uwa gha da, sokpan e Nọyaẹnmwa keghi viọ emwi ne ọ ke ne uwa, ne uwa, ne ọ miẹn ehe na rhie maa uwa wẹ rẹn ọrọre Osanobua uwa.

⁷ Ma ghi sẹ emwa na, Saihọn ne ọ rre Hesbọn kevbe ọba Ọg ọghe Basian kegha dee do gu ima gbinna. Sokpan ma keghi khọn miẹn iran otọ.

⁸ Ma keghi mu otọe iran, ma na ghae ẹre ne ẹwae Riubẹn kevbe Gad kevbe obọkpa vbe ẹwae Manasẹ.

⁹ Wa ya ẹkoata gha ya ẹmwẹ ile na ru emwi, ne emwi hia ne uwa ru miẹn ehe na gha dinna odẹ ne uwa.

¹⁰ “Ẹdẹnẹrẹ na nian, odaro e Nọyaẹnmwa Osanobua rua ọ re uwa mudia yi — wa hia fẹẹrẹ — avbe ọkaolotu kevbe ekhaẹmwẹ uwa, ikpia uwa.

¹¹ Ikhuo uwa kevbe avbe orhunmwuyẹn ni rre ẹbu uwa ni rhẹ erhan sa amẹ gie uwa.

¹² Wa rre emwa na ẹrẹna ne uwa do gu Osanobua uwa ta ile na ne ọ ra gu uwa ta kevbe ne uwa vbe rhan obọ miẹn iwinna ne ọ sẹ uwa egbe vbo.

¹³ Ne Nọyaẹnmwa miẹn ehe na viọ uwa ya ru emwa rẹn nian, ne irẹn vbe gha re Osanobua uwa zẹ vbene ọ yan ma avbe erha uwa odede ighẹ Ebraham, Aizik kevbe Jekọb.

¹⁴ Ẹ i re uwa ọkpa ọ re Nọyaẹnmwa gu ta ile na ke ẹe kevbe iwinna ne ọ dekan rẹn hia.

¹⁵ Ma hia ọ re ọ gu ta ẹe, ma ni mudia ye odaro ẹre ẹrẹna kevbe avbe ivbi ima ne a ma he biẹlẹ.

¹⁶ “Wa yerre vbene agbọn gha ye uwa hẹ vbe Igipt kevbe emwi ne ọkhọe ne a gha la otọe emwa ọvbehe gberra.

¹⁷ Wa miẹn ẹbọ osọnnọ iran, ne iran ya okuta, erhan, esiliva kevbe igoru ru.

¹⁸ Wa ghẹ gie a miẹn wẹ, ọ re okpia nọ ra okhuo nọ, ẹgbẹe ra ẹwae ni rre emwa ẹrẹna, fiwerriẹ hin ehe ne Nọyaẹnmwa Osanobua mwa ye rre, ne iran ya gha ga ẹbọ ẹvbo ọvbehe. Te ọnii ra gha yevbe inian ne ọ zọ ladian do khian erhan ne ọ rriara kevbe ne obi ye.

¹⁹ Wa ghẹ gie a miẹn wẹ orhiọnkpa rre emwa na ẹrẹ ne ọ họn avbe emwi ọghọ ne a wẹ ne a gha ru ẹrẹna, ọ na ye gha ro ighẹ emwi gha dunna ne irẹn, ọ gha khọn irẹn ne irẹn ya izevbeudu gha ru vbene ọ khọn irẹn. Emwi na gha fuẹn uwa hia a, kevbe ne ọ ma an, kevbe nẹ i ma an.

²⁰ Nọyaẹnmwa i ra yabọ ọmwa vberriọ. Sokpan, izohu ne ọ tọn ọghe Nọyaẹnmwa gha baa yan rẹn, ọkhọ hia ne a gbẹnnẹ ye ebe na ghi rruan rẹn rhinrin e Nọyaẹnmwa te fuẹn iran hin otọe agbọn na rre.

²¹ E Nọyaẹnmwa ghi ya ẹe ru igiemwi vbe odaro ivbi Izrẹl hia, ọ ghi zẹ ọkhọ rruan rẹn zẹ vbe avbe ihẹn ọghe ile ne a gbẹnnẹ ye uwu ebe ọghe imaemwi e Nọyaẹnmwa.

²² “Vbe ẹghẹ ne ọ dee, avbe ivbi uwa kevbe avbe erriọvbe ni ke otọe ne ọ rre gha dee, gha miẹn ọkhọ kevbe oya ne Nọyaẹnmwa zẹ rruan otọe uwa.

²³ Oha ghi khian ehe ọrhiae ne ọ dihoi rua ne ugbofi kevbe umwẹ lẹ rhu, a i kọ emwi yọ, irunmwu i ra vbe zọ vbọ. Otọe uwa ghi yevbe avbe ẹvbo e Sọdom kevbe Gomorra, zẹ vbe Adma ke Zẹboim, ne e Nọyaẹnmwa dunmwu an vbe ohu kakabọ mu ẹẹn.

²⁴ Ẹghẹ nii, otọ agbọn na hia ghi nọ wẹẹ, ‘Vbe Nọyaẹnmwa na ru otọe iran vbenian hẹ yi? Demwi ne ọ sii ohu ọhanabe vbenian rre?’

²⁵ Ewanniẹn ọnrẹn ghi gha re wẹẹ, ‘Emwi ne ọ si ẹe ọrọre wẹ emwa e Nọyaẹnmwa keghi rra ile ne iran gu ẹe ta, rẹn ne Osanobua avbe erhan iran odede, vbe ẹghẹ ne ọ na viọ iran ke Igipt ladian.

²⁶ Iran keghi ya gha ga ẹbọ ọvbehe ne iran ma ka ga ẹdẹ, avbe ẹbọ ne Nọyaẹnmwa tama iran wẹ ne iran ghẹ ga.

²⁷ Ọnii ọ si ẹe ne ohu na mu e Nọyaẹnmwa, ọna gie ọkhọ hia ne a gbẹnnẹ ye ebe na rruan iran.

²⁸ Ohu keghi kakabọ mu e Nọyaẹnmwa, vbe uwu ohu ẹre nii, ọ keghi kpọlọ iran hin otọe iran rre, ọ na filo iran ku ẹvbo ẹrrẹe, evba iran ghi ye ẹrẹna.’

²⁹ “Oro eso rrọ ne Nọyaẹnmwa ma he rhie ladian, sokpan, ọ rhie uhi ẹre ladian nẹ, te ima kevbe emọ ne ima gha biẹlẹ, gha ya ẹe gha ru emwi ẹdẹdẹmwẹdẹ.