Diuteronomi 28 - Edo Bible (E Baibol Ẹdo) Version 1996

Afiangbe Ne Ọ Rre A Họn Ẹmwẹ

¹ “A deghẹ wa gele họn ẹmwẹ ne Nọyaẹnmwa Osanobua rua, wa na ya ẹko ata rhie uhi ẹre ne imẹ rhie ne uwa ẹrẹna mwẹ, ọ gha ya uwa kpọlọ sẹẹ avbe okpẹvbo ọvbehe hia ni rre agbọn na.

² Wa gha họn ẹmwẹ ne Nọyaẹnmwa Osanobua rua, afiangbe na hia gha re ọwua:

³ “E Nọyaẹnmwa gha fiangbe ore ẹvbo rua kevbe ugbo rua.

⁴ “E Nọyaẹnmwa gha fiangbe uwa ẹsẹse vbe egbe emọ ni bun, vbe egbe emwiokọ, vbe egbe ẹmila kevbe egbe ohuan.

⁵ “E Nọyaẹnmwa gha fiangbe emwiokọ ọka rua kevbe evbare ne uwa ghi yae le hia.

⁶ “E Nọyaẹnmwa gha fiangbe emwi ne uwa ru hia.

⁷ “E Nọyaẹnmwa gha khọn eghian hia mu otọ ne uwa. Odẹ ọkpa iran ra la rre do gu uwa gbinna, sokpan odẹ ihi-nrọn iran ra lẹ la gha rrie.

⁸ “E Nọyaẹnmwa Osanobua rua gha fiangbe iwinna uwa, ọ ghi vbe ya ọka vuọn erru uwa hia. Ọ gha fiangbe uwa vbe otọ ne ọ ra mu ne uwa.

⁹ “A deghẹ wa họn ẹmwẹ e Nọyaẹnmwa Osanobua rua, wa na ru emwi ne ọ tama uwa hia, ọ ghi ya uwa khian emwa obọ irẹn zẹ vbene ọ khare.

¹⁰ Ẹghẹ nii, emwa ni rre agbọn na hia ghi do miẹn wẹ te Nọyaẹnmwa zẹ uwa ne uwa gha re emwa obọ ẹre, ohan uwa ghi gha mu iran.

¹¹ E Nọyaẹnmwa gha viọ emọ ni bun ne uwa, ẹmila nibun deba emwiokọ ọrhẹnrhẹn, vbe otọe ne irẹn ve avbe erha uwa odede re wẹ rẹn gha mu ne uwa.

¹² Ọ gha gie amẹ ke aza ọghe ọe vbe ẹrinmwi gha dee vbe ẹghẹ ọ re, ọ ghi fiangbe iwinna obọ uwa hia, sẹrriọ wẹ wa gha viọ ne ẹvbo ni bun mọmọ sokpan wa i ra rhie mọmọ vbe obọ iran rhọkpa.

¹³ “E Nọyaẹnmwa ne Osanobua rua gha ya uwa ru ọkaolotu vbe ẹbu avbe okpẹvbo ighẹ ẹ i re ne ọ lele ọmwa iyeke, te uwa khian gha maa ẹghẹ hia, wa i ra vbe gbekuẹn, a deghẹ wa ye ẹkoata gha ru zẹ vbene uhi ẹre ne I rhie ne uwa ẹrẹna khare.

¹⁴ Sokpan, wa ghẹ fieghe uhunmwu yọ vbe odẹikodẹ ra ne uwa ya gha gho ra ne uwa ya gha ga ẹbọ ọvbehe.

Emwi Ne Ọ Ke Iyin Ehọ Ikian

¹⁵ “Sokpan, a deghẹ uwa ma họn ẹmwẹ e Nọyaẹnmwa Osanobua uwa ne uwa vbe ya ẹkoata rhie uhi ẹre hia ne imẹ rhie ne uwa ẹrẹna mwẹ, avbe emwi dan na hia gha sunu vbe egbe uwa.

¹⁶ “E Nọyaẹnmwa ghi fi adesẹ ẹvbo uwa kevbe oha uwa unu.

¹⁷ “E Nọyaẹnmwa gha fi avbe ọka uwa unu kevbe evbare ne uwa ya ẹe le.

¹⁸ “E Nọyaẹnmwa gha fi uwa unu vbene a gha na miẹn wẹ emọ ibozẹghẹ ọre ọ khian rhie ne uwa, emwiokọ ọwuẹ kevbe ẹmila ibozẹghẹ.

¹⁹ “E Nọyaẹnmwa ghi fi emwi ne uwa ru hia unu.

²⁰ “Wa gha ru emwi dan, wa na he e Nọyaẹnmwa ye otọ, rẹn gha gie ọkhọ rruan uwa kevbe otighi kevbe orueghe vbe emwi ne uwa ru hia, a te do miẹn wẹ te a ghi fuẹn uwa a fo fẹẹrẹ ẹgiẹgiẹ.

²¹ Ọ ghi gha gie emianmwẹ rre do gha vba emianmwẹ vbe egbe uwa a te do miẹn wẹ ọkpa ma ghi ke ẹe vbe uwu uwa vbe otọe ne uwa ra yin na.

²² E Nọyaẹnmwa ghi tue emianmwẹ ne ọ ke egbe ẹmwẹ ọkpa la egbe ọmwa ọvbehe ku uwa kevbe egbe ne ọ hinmwian kevbe ọnii, ọ gha ru ẹe ne amẹ ghẹ rhọ ọ ka uwa hia ghi so hie kevbe irhunrhun, ne ọ ya ẹe fuẹn emwiokọ uwa hia a. Ọfuan na ghi gu uwa gha rrọọ wa te ya wulo.

²³ Amẹ i ra rhọ, otọe uwa ghi do kaka vbe ematọn.

²⁴ Ne amẹ gha na te gha rhọ, e Nọyaẹnmwa gha tie ẹhoho ebubẹ ke ọghe ekhae yan uwa, wa te do khian emwa ni fuan.

²⁵ E Nọyaẹnmwa ghi gie eghian uwa gha khọn miẹn uwa otọ. Wa gha la odẹ ọkpa mu igbinna gie iran, sokpan wa ghi la odẹ ihinrọn lẹ hin ehe ne iran ye rre. Afianma ghi gha fian emwa ni rre agbọn hia vbe iran a miẹn emwi ne ọ sunu vbe egbe uwa.

²⁶ Wa gha wulo, ahianmwẹ kevbe aranmwẹ oha ghi gha rri ikun uwa, a i ra vbe miẹn ọmwa ne ọ gha khulo iran hin rre.

²⁷ E Nọyaẹnmwa gha tue uruvba ku uwa, zẹ vbene ọ ru ivbi Igipt. Ọ ghi gie ẹtẹ gha salọ ladian vbe egbe uwa. Egbe uwa hia ghi gha bolo ikpakpa. Otọlọ ghi la uwa egbe sokpan a i ra miẹn ukhunmwu ẹnrẹn.

²⁸ E Nọyaẹnmwa gha fi uwa ẹrherhe werriẹ, ọ ghi mu aro ne ọ rhu kevbe olighi fi uwa egbe.

²⁹ Wa ghi gha ye obọ baba odẹ khian vbe ogiavan ogioghogho, zẹ vbe arhuaro, wa iran miẹn odẹ uwa. Emwi kemwi ne uwa a rhirhi ru, ọkpa ne ọ gha dinna odẹ i rrọọ. A ghi gha zẹ uwa kpokpo kugbakẹghẹrẹ, a ghi rha uwa, a i vbe miẹn ọmwa ne ọ gha ye uwa obọ.

³⁰ “A gha ya ọmọ ne uwa sokpan ọmwa ọvbehe ghi mu ẹẹn ya gha, wa gha bọ owa, sokpan wa i ra yin ẹnrẹn. Wa gha kọ emwiokọ, sokpan, wa i ra rhọ ẹre.

³¹ A gha sirra uwa gbele ẹmila uwa, sokpan, unu uwa i dekan aranmwẹ ọnrẹn. A ghi sirra uwa silo ekẹtẹkẹtẹ uwa kpao vbene a i ghi na vbe dọlegbe viọ iran gie uwa. A gha viọ ohuan uwa ne avbe eghian uwa vbene uwa i na miẹn ọmwa ne ọ gha ye uwa obọ.

³² A ghi viọ ivbi uwa ne ikpia kevbe ne ikhuo ne avbe eghian uwa vbene uwa na bu aro ua gha ghe ughe. Wa ghi yẹnyẹn aroa ye odẹ ẹdẹgbegbe wẹ ne ivbi uwa werriegbe rre sokpan ẹtin ghi fo uwa.

³³ Ẹvbo ẹrrẹe ghi viọ emwiokọ uwa ne uwa miẹn ẹsọn nọkhua yi ya kọ, vbene emwirhọkpa ina sẹ uwa obọ gberra ukpokpo ekugbakẹghẹrẹ kevbe obọ ne ọ tọn ne a ya mu uwa.

³⁴ Oya ne uwa re gha zẹ uwa emwẹmwẹ.

³⁵ E Nọyaẹnmwa ghi gie ẹtẹ obalọ ne ẹ i mwẹ ukhunmwu gba owẹ uwa hia, uruvba gha gba uwa egbe kevbe uhunmwu ya sẹ atataowẹ.

³⁶ “E Nọyaẹnmwa gha viọ uwa kevbe avbe ọba uwa gha rrie ẹvbo ẹrrẹe, ehe ne uwa kevbe avbe erha uwa odede ma he yin ẹdẹ, evba wa ghi na ya ga avbe amazẹ ne a ya erhan kevbe okuta ma.

³⁷ Ẹmwẹ emwi tie ọ sunu vbe egbe uwa gha kpan emwa ẹvbo ne a zagha uwa kui odin, iran gha ya uwa gbe ogie iran ghi gha ta uwa giẹ.

³⁸ “Wa ghi kọ emwiokọ ọrhẹnrhẹn, sokpan emwiorhọ tunnẹkẹn wa khian rhọ rhunmwuda, irhiso ọ re ọ khian rri emwiokọ uwa hia.

³⁹ Wa gha kọ emwiokọ ne a ya ru ayọn ne ọ baa wa ghi vbe dọlọ ẹe yi, sokpan wa i ra kọlọ ọmọ, ra ne uwa wọn ayọn rẹn, rhunmwuda ọkhọe gha rri erhan ne a ya ru ayọn ne ọ baa na.

⁴⁰ Erhan ọliv gha zọ gba ehe hia vbe otọ uwa, sokpan wa i khian gha mwẹ ofigbọn ọliv rhunmwuda ọmọ ọliv ni gha khuọn kua.

⁴¹ Wa gha biẹlẹ emọ ikpia kevbe emọ ikhuo sokpan iran gha wii uwa rhunmwuda a gha hẹ iran oghunmwu gha rrie vbe okuo.

⁴² Avbe atete gha rri erhan kevbe emwiokọ uwa hia.

⁴³ “Avbe erhunmwuyẹn ni rre uwa ẹvbo ghi gha hiẹn yọ ẹdẹgbegbe sokpan wa ghi gha ru ghe iyeke.

⁴⁴ Iran gha miẹn igho gha rhie ne uwa mọmọ sokpan wa i ra miẹn rhie ne iran mọmọ. Iran ọ ra gha khaemwisẹ yan uwa vbe okiekie.

⁴⁵ “Ọkhọ na hia ọ ra rruan uwa, iran ghi gha rre ehe ne uwa ye wa te do gbe ẹro, rhunmwuda wa ma họn ẹmwẹ e Nọyaẹnmwa Osanobua rua ne uwa gha ya uhi ne ọ viọ ne uwa hia ru emwi.

⁴⁶ Ena ghi gha re iyama ọghe vbene Osanobua bu ohiẹn uwa hẹ vbe egbe uwa kevbe ivbi uwa ẹdẹdẹmwẹdẹ.

⁴⁷ E Nọyaẹnmwa keghi fiangbe uwa vbe odẹ hia sokpan wa ma ye ẹko oghọghọ kevbe ọyẹnmwẹ ga ẹe.

⁴⁸ Rhunmwuda ọnii nian, eghian ne Nọyaẹnmwa, ra viọ ẹre aro da uwa ọ re uwa ra gha ga. Ovbamẹ gha gbe uwa, ohanmwẹ amẹ ghi gbe uwa, wa gha rre ivbabọ, ukpọn kevbe emwi ọvbehe hia. Eghian uwa ghi gha ye ọkhọ ye obọ yẹn uwa uhunmwu rhinrin wa te do fuan.

⁴⁹ E Nọyaẹnmwa gha mu okpẹvbo ke ehe ne agbọn sẹe gha dee, emwa ne uwa i họn ẹvbo ne iran zẹ, ọ ghi mu ẹre aro da uwa. Iran ghi siẹn rhu uwa zẹ vbe oghohọn.

⁵⁰ Iran gha ye ọkpankpan ru uwa emwi, iran i ra tohan ọmwa rhọkpa ọdiọn kevbe ọvbokhan.

⁵¹ Iran ghi rri ẹmila kevbe emwiokọ uwa, ovbamẹ ghi gbe uwa la ẹrinmwi. Iran i ra sẹ ikpẹ ọka ọkpa rae ne uwa ra ayọn ra ofigbọn ọliv, ra ẹmila ra ohuan, wa ghi wulo.

⁵² Iran gha mu igbinna la ẹvbo hia ni rre otọe nii ne Nọyaẹnmwa Osanobua rua ra mu ne uwa, avbe ekẹn ne a gbe ni yo ne a ya ru ọkhẹ ne uwa mu ẹtin yan gha de rẹnkhẹn uan.

⁵³ “Avbe eghian uwa gha dunmwu ẹvbo uwa khian nii, obọ ovbamẹ gha da uwa sẹrriọ wẹ, wa ghi gha gbele emọ ne Nọyaẹnmwa Osanobua uwa viọ ne uwa re.

^54-55 Uhin ya sẹ egbe adazẹ ne ọ ghi ru ọkhae ọmwa sẹ, ọ gha ba so ẹe sẹ vberriọ vbe a ghẹ ghi gha dunmwu ẹvbo ẹre wẹ, ọ ghi gbe ọkpa vbe uwu ivbi ẹre re rhunmwuda, ẹ i ghi mwẹ evbare ọvbehe, ẹ i vbe fian ne ọtiọnrẹn nọkpa vbọ, ra ne amwẹ ọnrẹn ne ọ hoẹmwẹ ọnrẹn, ra ne erhọkpa vbe uwu ivbi ẹre nii ghi ke ẹe.

^56-57 Uhin ya sẹ egbe okpokhuo ne ohọnmi, ne ọ ghi mwẹ igho sẹrriọ wẹ ọ ma he ya owẹ khian yo ehe rhọkpa ẹdẹ. Erriọ ọ ra vbe ru. Eghian gha ghi dekun ẹvbo ẹre, obọ ohanmwẹ gha da ẹe sẹrriọ wẹ, ọ ghi lẹre rri ọmọ ne ọ da biẹ kevbe eru. Ẹ i vbe fian ne ọdọ ne ọ ho ẹmwẹ ọnrẹn ra ne erhọkpa vbe uwu avbe ivbi ẹre.

⁵⁸ “Wa ya ẹkoata gha lele emwi ne Osanobua ma uwa ẹre ne a gbẹnnẹ ye uwu ebe na, ne uwa vbe gha ya ọghọ ne eni ọyunnuan kevbe ne ọ mu ohan ọghe Nọyaẹnmwa Osanobua rua.

⁵⁹ A deghẹ wa ma ru vberriọ, ọ gha gie emianmwẹ ne ẹ i mwẹ ukhunmwu gie uwa kevbe avbe ivbi uwa ke ẹe kevbe egboghogbogho ne ọ mu ohuan ne ẹ i gie a dayi.

⁶⁰ Ọ ghi dọlegbe tue egbe emianmwẹ dan ne aro uwa ka sẹ vbe Igipt ku uwa, wa i vbe miẹn uhunmwu vbo.

⁶¹ Ọ ghi vbe gie emianmwẹ ughughan hia kevbe egboghogbogho ne a ma sunu yi vbe ebe uhi na, ke emwi ne Osanobua ma emwa re, gie uwa, a ghi fuẹn uwa ua.

⁶² Wa gha rhe do gha bun zẹ vbe orhọnmwẹ ni rre iso, ibozẹghẹ ọ ra miẹn uhunmwu vbọ, rhunmwuda, wa ma họn ẹmwẹ e Nọyaẹnmwa Osanobua rua.

⁶³ Zẹ vbene Nọyaẹnmwa wa yan gha zẹ ọma ne agbọn ku uwa, kevbe ne ọ na vbe gie uwa gha bun yọ, erriọ ọ re ọ ra vbe yan fuẹn uwa a, kevbe ne ọ vbe mu ọ rhiae lele uwa. A ghi ho uwa bẹkun vbe otọ ni ne uwa ra yin na.

⁶⁴ “E Nọyaẹnmwa ghi zagha uwa lele agbọn ẹvbo. hia ke obọ ọkpa vbe ufomwẹ agbọn yasẹ obọ nọkpa, evba wa ghi na ya gha ga ẹbọ ne a ya okuta kevbe erhan ru, avbe ẹbọ ne uwa, ra avbe erha uwa odede ma he ga ẹdẹ.

⁶⁵ Wa i ra miẹn ọfumwegbe vbe ehe rhọkpa, ihe ọkpa ne uwa gha vbe tie ẹre ọghe obọ uwa ẹ i vbe rrọọ; e Nọyaẹnmwa ghi ya ohawa, a i ghi mwẹ idaehọ kevbe ẹtinfomwẹ yọ uwa ẹwu.

⁶⁶ Ẹghẹ hia wa gha ya gha rhie uhunmwu mwẹ atataobọ. Afianma ghi gha fian uwa asọn kevbe avan afianma uwu ghi gha fian uwa ẹghẹ hia.

⁶⁷ “Udu uwa ghi gha hagha ye emwi kemwi ne uwa a rhirhi dẹghe owiowiẹ, wa ghi te gha ho ne ọ gha re ota, kevbe otota, wa ghi te gha ho ne ọ gha re owiẹ.

⁶⁸ E Nọyaẹnmwa gha ye okọ eviẹn hẹ uwa werriegbe gha rrie Igipt, a gha rhe miẹn wẹ rẹn yan rẹn wẹ wa i ghi dọlegbe rrie evba ọvbehe. Wa gha sẹ odọ, wa ghi te gha ho ne uwa khiẹnnẹ egbe uwa zẹ vbe eviẹn ne avbe eghian uwa, sokpan a i miẹn ne ọ gha kue ne ọ dẹlẹ uwa.”