Diuteronomi 27 - Edo Bible (E Baibol Ẹdo) Version 1996

Uhi Osanobua Ne A Gbẹnnẹ Ye Okuta

¹ Ẹre Mosis kevbe avbe ọkaolotu ivbi Izrẹl ni dekẹe na tama emwa nii wẹẹ, “Wa gha ya uhi ne I viọ ne uwa ẹrẹ ru emwi.

² Ẹdẹ ne uwa gha fian Ẹzẹ Jọdan rra ne uwa la otọ nii ne Nọyaẹnmwa Osanobua mu ne uwa, wa ghi viọ okuta nekhua eso mudia, wa ghi ya ekẹn nọkhuẹrhẹ rhu ẹe.

³ Wa ghi vbe gbẹnnẹ avbe uhi na kevbe emwi ne a ma uwa ẹre lele ẹe. Wa ghẹ ghi la otọ esiesi ne ọ maa a emwiokọ ne Nọyaẹnmwa Osanobua avbe erha uwa odede ve uwa ẹre nẹ,

⁴ ighẹ wa sẹ obọ nọkpa Jọdan nẹ, wa ghi viọ avbe okuta na ye Oke Ebal zẹ vbene I ru igiodẹ ma uwa ẹrẹna, wa ghi ya ekẹn ne ọkhuẹrhẹ rhu ẹe.

⁵ “Wa vbe gba aka ye evba, wa ghi ya okuta ne a ma he ya ematọn kan ru ẹe.

⁶ Rhunmwuda, aka ne uwa gha gba ne Nọyaẹnmwa Osanobua rua, ọ ke re ne ọ gha re ọghe okuta ne a ma guọghọ. Evba nii i wa gha na gha zọ ese ne a ra giẹn uan,

⁷ evba wa gha na vbe gha zẹ ese, wa ghi vbe rri evbare ọghe isara vbe evba, wa ghi vbe gie ẹko uwa gha rhiẹnrhiẹn vbe odaro e Nọyaẹnmwa Osanobua rua.

⁸ Wa gbẹnnẹ uhi Osanobua ye avbe okuta ne a ye ekẹn ne ọ khuẹrhẹ rhu nii zẹ vbe ne ọ gha gie a gha tie.”

⁹ Ẹre Mosis ke ẹe kevbe avbe ohẹn e Livai na tama emwa Izrẹl hia wẹẹ, “Wa rhie ehọ ye otọ ne uwa danmwẹ ehọ mwẹ, wa ne ivbi Izrẹl. Ẹdẹ n ẹrẹna, wa khian emwa ọghe Nọyaẹnmwa Osanobua uwa nẹ,

¹⁰ rhunmwuda ọnii, wa gha họn ẹmwẹ ne ẹẹn, ne uwa vbe gha rhie avbe uhi hia ne I viọ ne uwa ẹrẹna mwẹ.”

Ihẹn Ne A Tie Ye Ẹmwẹ Iyin Ehọ

¹¹ Ẹre Mosis na tama ivbi Izrẹl wẹẹ,

¹² “Wa ghẹ ghi fian Jọdan rra nẹ, a gha fiangbe emwa nii, avbe ẹwae na ghi mudia ye Oke Gerizim: Simiọn, Livai, Juda, Isaaka, Josẹf kevbe Bẹnjamin.

¹³ Avbe ẹwae na ghi vbe mudia ye Oke Ebal vbe a a gha tie ihẹn: Riubẹn, Gad, Asia, Zebulọn, Dan kevbe Naftali.

¹⁴ Avbe Livai ghi ya urhu ne ọ la guan avbe ẹmwẹ na:

¹⁵ “ ‘Ihẹn ọghe Osanobua rre ọ re uhunmwu ighẹ ọmwaikọmwa ne ọ ya okuta ra ematọn ma amazẹ ne ọ gha do gho ẹre, te ẹbọ ne a ru sọnnọ e Nọyaẹnmwa.’ “Emwa ni hia ghi kha wẹẹ, ‘Isẹ!’

¹⁶ “ ‘Ihẹn Osanobua rre uhunmwu ọmwa ne ọ ma ya ọghọ ne erha ẹe ra iye ẹe.’ “Emwa ni hia ghi kha wẹ, ‘Isẹ!’

¹⁷ “ ‘Ihẹn Osanobua rre uhunmwu ọmwa ne ọ fi erhan uwu ọghe ovbi Izrẹl ne ihua ẹre werriẹ.’ “Emwa ni hia ghi kha wẹẹ, ‘Isẹ!’

¹⁸ “ ‘Ihẹn Osanobua rre uhunmwu ọmwa ne ọ rhie arhuaro la odẹ ne ẹ i re ọ re.’ “Emwa ni hia ghi kha wẹẹ, ‘Isẹ!’

¹⁹ “ ‘Ihẹn Osanobua rre uhunmwu ọmwa ne ọ gban emwi ne ọ sẹ orhunmwuyẹn, emọ ne ẹ i mwẹ erha kevbe ẹgbẹ egbe hin ẹre obọ rre.’ “Emwa ni hia ghi kha wẹẹ, ‘Isẹ!’

²⁰ “ ‘Ihẹn Osanobua rre uhunmwu ọmwa ne ọ yagha erha ẹe vbe ekpa ne ọ na gu ne ọ rhirhi gha khin vbe uwu avbe amwẹ erha ẹe ru emwi ọdọ vbe amwẹ.’ “Emwa ni hia ghi kha wẹẹ, ‘Isẹ!’

²¹ “ ‘Ihẹn Osanobua rre uhunmwu ọmwa ne ọ gu aranmwẹ oha ru emwi ọdọ vbe amwẹ.’ “Emwa ni hia ghi kha wẹẹ, ‘Isẹ!’

²² “ ‘Ihẹn Osanobua rre uhunmwu ọmwa ne ọ gu ovbiye ẹe ra ovbi erha ẹe ru emwi ọdọ vbe amwẹ.’ “Emwa ni hia ghi kha wẹẹ, ‘Isẹ!’

²³ “ ‘Ihẹn Osanobua rre uhunmwu ọmwa ne ọ gu iye amwẹ ọnrẹn ru emwi ọdọ vbe amwẹ.’ “Emwa ni hia ghi kha wẹẹ, ‘Isẹ!’

²⁴ “ ‘Ihẹn Osanobua rre uhunmwu ọmwa ne ọ do gbe ọmwa ọvbehe ua.’ “Emwa ni hia ghi kha wẹẹ, ‘Isẹ!’

²⁵ “ ‘Ihẹn Osanobua rre uhunmwu ọmwa ne ọ miẹn igho ya gbe ọmwa ne ọ ma rukhọ ua.’ “Emwa ni hia ghi kha wẹẹ, ‘Isẹ!’

²⁶ “ ‘Ihẹn Osanobua rre uhunmwu ọmwa ne ọ ma ya uhi Osanobua kevbe iruemwi ẹnrẹn hia ru emwi.’ “Emwa ni hia ghi kha wẹẹ, ‘Isẹ!’