Diuteronomi 26 - Edo Bible (E Baibol Ẹdo) Version 1996

Akọrhọre

¹ “Wa ghẹ ghi yin otọe nii ne Nọyaẹnmwa ne Osanobua rua ra mu ne uwa nẹ ighẹ ẹkun vbe sẹ uwa otọ nẹ.

² Dọmwadẹ ọghe ọe vbe uwu uwa ghi viọ emwiokọ ne ọ ka gha rhọ ye okhuae, ọ ghi mu gha die ihe ọkpa nii ne a na ga.

³ U ghi bu ohẹn ne ọ rrọọ ẹghẹ nii gha khian, u ghi tama rẹn wẹẹ, ‘Te imẹ ghi do miẹn kue ma Nọyaẹnmwa Osanobua mwẹ nian wẹ I sẹ otọe ni ne ọ ve avbe erha mwa odede ẹre wẹ rẹn gha mu ne ima nẹ.’

⁴ “Ohẹn ghi miẹn ruẹn okhuae ni, ọ ghi mu ẹẹn ye otọ vbe odaro aka ọghe Nọyaẹnmwa Osanobua ruẹ.

⁵ Iyeke onii wa ghi kha vbenian vbe odaro e Nọyaẹnmwa: ‘Ovbi Aremia, ne ọkpolugho ne ẹ i mwẹ owa ọ re erha mwẹ odede gha khin vbe ọ viọ emwa ẹgbẹ ọ re gha rrie Igipt ne ọ ya yin evba, ibozẹghẹ ọ re iran khin vbe iran khian, sokpan iran keghi do khian okpẹvbo ne ọ digba kevbe ne ọ mwẹ ẹtin.

⁶ Ivbi Igipt kegha khọ mu ima, iran keghi ya ẹtin gha ya ima winna zẹ vbe eviẹn.

⁷ “ ‘Ẹre ima na datie Nọyaẹnmwa Osanobua avbe erha mwa odede ne ọ ye ima obọ. Rẹn keghi họn urhu mwa, ọ miẹn oya ne ima re kevbe ọlọghọmwa usẹ ne ima ye.

⁸ Ọ keghi ye ẹtin iwegbe ẹre nọkhua miẹn mwa fan hin obọ ivbi Igipt rre. Ọ winna iwinna ama kevbe ọyunnuan. Ọ na gie emwi ni mu ohan ni bun sunu.

⁹ Ọ keghi viọ ima gha die edinran, ọ na mu otọe esiesi ne ọ maa emwiokọ na ne ima.

¹⁰ Rhunmwuda onii nian, mẹ viọ ne okaro vbe uwu emwiokọ ne irẹn viọ mẹ gie Nọyaẹnmwa.’ “Iyeke ọnii, u ghi mu okhuae nii ye otọ vbe odaro e Nọyaẹnmwa ne u vbe ga vbe evba.

¹¹ U ghi gie ẹko ruẹ gha rhiẹnrhiẹn, rhunmwuda emwi ni maa ne Nọyaẹnmwa viọ ne uẹn kevbe ẹgbẹ ruẹ, u ghi vbe gie avbe Livai kevbe avbe erriọvbe ni rre ehe ne u ye deba uwa gha titi ẹe.

¹² “Vbe ukpo ne ogieha u ghi gha viọ a wa ye ihe igbe, obọ ọkpa vbe a gha emwiorhọ ruẹ ye ihe igbe ne avbe Livai, avbe erriọvbe, emọ ne ẹ i mwẹ erha kevbe ẹgbẹ, ne a miẹn ehe na miẹn wẹ, ẹbu ke ẹbu ne iran a rhirhi a gha ye, iran ghi gha miẹn re ne ẹko vuọn iran. U gha ru vberriọ.

¹³ U ghi tama e Nọyaẹnmwa wẹẹ, ‘A ghae ye ihe igbe rhọkpa ma kẹ rre vbe owa mwẹ, I viọ ehia ne avbe Livai nẹ, avbe erriọvbe, avbe emọ ne ẹ i mwẹ erha kevbe avbe ẹgbẹe zẹ vbene u tama mwẹ ne I gha ru. I ma mianmian ra ne I vbe fieghe uhunmwu ye emwi ne u tama mwẹ vbe ekpa aghae yi hi gbe.

¹⁴ I ma re vbọ vbe ẹghẹ a khiẹ, I ma vbe rhie vbọ ladian vbe owa vbe awua gue mwẹ. I ma vbe rhie vbọ ya fi ohan ne avbe orinmwi. I wa ru vbene u khare. Osanobua mwẹ I vbe ru emwi hia ne u khare vbekpa aghae ye ihigbe.

¹⁵ Ke ehe ne ọ huanrẹn ọwuẹ ghe otọe, ne u fiangbe Izrẹl ne emwa ruẹn, kevbe ne u vbe fiangbe otọe esiesi ne ọ maa emwiokọ ne u mu ne ima, zẹ vbene u ve avbe erha mwa odede re.’

Emwa E Nọyaẹnmwa Tobọẹre

¹⁶ “Vbe ẹdẹ n ẹrẹna, e Nọyaẹnmwa Osanobua ruẹ tama ruẹn ne u gha ya uhi irẹn hia ru emwi, rhunmwuda ọnii, u ghi wa ya ẹko ata ru ehia vbe ekhọe ruẹ hia kevbe orhiọn ruẹn hia.

¹⁷ Vbe ẹdẹnẹrẹ na, wa miẹn e Nọyaẹnmwa kue nẹ zẹ vbe Osanobua rua, wa yan rẹn ighẹ wa gha họn ẹmwẹ kevbe ne uwa gha rhie uhi ẹre mwẹ, kevbe ne uwa vbe gha ru vbene ọ khare hia.

¹⁸ Ẹdẹ ne ẹrẹna nian, e Nọyaẹnmwa vbe rhan obọ miẹn uwa zẹ vbe emwa irẹn, zẹ vbene ọ yan ma uwa, ọ na tama uwa ne uwa gha ya uhi irẹn hia ru emwi.

¹⁹ Ọ ghi gie uwa kpọlọ sẹ avbe agbọn ẹvbo hia ne irẹn he yi. Wa ghi gha re emwa nihuanrẹn ọghe ọe, wa ghi gha rhie urhomwẹ kevbe uyi gie eni ẹnrẹn. Wa ghi gha re emwa irẹn, zẹẹ vbe ne irẹn yanrẹn.”