Diuteronomi 25 - Edo Bible (E Baibol Ẹdo) Version 1996

¹ “Gie a kha ighẹ ivbi Izrẹl eva yo iko ne a ya bu ohiẹn iran, a na bu ase ne ọkpa, a keghi bu abe gbe nọkpa.

² A deghẹ te a wẹ ne a gbe ne ọ rri abe nii asan, ne ọ bu ohiẹn ghi wẹ ne ọ mu aro rhu otọ a ghi gbe ẹre asan. Inu asan ne a gha gbe ẹre re ghi gha re vbene ọ khẹke emwi ne ọ ru.

³ A sẹtin gbe ẹre asan iyeva, a ghẹ gie ẹe bun sẹ ọnii, ọ gha ghi sẹ ọnii, efaa uwu ẹbu ọ re a ghi zẹ ye ọ re egbe.

⁴ “Ghẹ rro ekagha ye ẹmila unu vbe u a gha ya ẹe wiẹn ọka.

Emwi Ne A Ru Ne Ọtẹn Ne Okpia Ne Ọ Wu

⁵ “A deghẹ etẹn eva koko yan emwi ọkpa, ọkpa vbọ ke ghi wu vbe ne ẹ i na mwẹ ọmọ okpia, okhuo ne ọ wu sẹrae nii, a ghẹ gie ẹe rhie obọ gberra ẹgbẹ nii ya rọnmwẹ ọdọ. Iwinna ne ọ bi ye ọtiọnrẹn nii egbe nọ ne ọ rhie ẹre rọnmwẹ.

⁶ Ọmọ ne ọ ka gha biẹ, a ghi tie ẹre ọ ghe ọmwa ne ọ wu ni, ne ivbi uniẹn ọnrẹn miẹn ehe na gha rrọọ khian vbe Izrẹl.

⁷ Sokpan, a deghẹ ọtẹn ọdọ ẹre ma ho ne ọ rhie ẹre rọnmwẹ, okhuo nii ghi bu avbe ọkaolotu ẹvbo gha khian ya kha wẹẹ, ‘Ọtẹn ọdọ mwẹ ma ho ne ọ winna iwinna ne ọ khẹ ke ẹe, ọ ma ho ne ọ gie ẹe mwẹ ọmọ vbe ẹbu ivbi Izrẹl.’

⁸ Avbe ọkaolotu ẹvbo ghi gie ne a tie ẹre, iran ghi gu ẹe guan, ọ gha ye wẹ rẹn i rhie okhuo nii,

⁹ okhuo ni ne ọtiọnrẹn wu sẹrae ni ghi khian sikẹ ọ re vbe sirra avbe ọkaolotu ẹvbo, ọ ghi yuo ibata ọkpa hin ẹre owẹ rre, ọ ghi tu asẹn ye ọ re aro, ọ ghi kha wẹẹ, ‘Erriọ ọ re ọ sunu vbe egbe ọmwa ne ọ he ne ọ gie ọtiọnrẹn mwẹ ọmọ ye agbọn.’

¹⁰ Emwi ne a ghi tie ẹgbẹ ọ re ọrọre ‘ẹgbẹ ọmwa ni ne a yuo ibata hin ẹre owẹ rre.’

Avbe Uhi Ọvbehe

¹¹ “A deghẹ ikpia eva gbinna, amwẹ ọkpa vbọ na wẹ ne irẹn ye ọdọ ẹre obọ, ọ na si ọmwa nọkpa ekia.

¹² Wa ghẹ tohan rẹn, wa fian ẹre obọ fua.

^13-14 “Wa ghẹ do ẹki ogberhu vbe uwa a gha mwa emwi ne a mwa ke ne ọ khua.

¹⁵ Wa gha lo emwi ne a ya mwa ihẹ ke ne a ya mwa avbe emwi ọvbehe ọghe ẹmwata ne uwa miẹn ehe na tọ vbe otọ ne Nọyaẹnmwa Osanobua rua ra mu ne uwa.

¹⁶ E Nọyaẹnmwa i ho ẹmwẹ emwa ni mu ọmwa ru vberriọ.

A Gie Ne A Gbele Ivbi Amalẹk

¹⁷ “Wa ye emwi ne ivbi Amalẹk ru uwa ẹre rre vbe ẹghẹ ne uwa na gha ke otọe Igipt dee.

¹⁸ Iran i mu ohan Osanobua, iran na la iyeke rre do gu uwa gbinna vbe egbe wọ uwa kevbe ẹtin fo uwa nẹ, iran na gbele emwa hia ni domian de vbe odieke.

¹⁹ Rhunmwuda ọnii, ugbẹn vbe Nọyaẹnmwa Osanobua rua a ghi mu otọe nii ne uwa ọ na degue uwa hin obọ ẹbe ọghe eghian uwa hia ni yin lẹga uwa nẹ, wa ghẹ mwẹ wa ma gbele ivbi Amalẹk hia vbe ne a gha na miẹn wẹ a i ghi miẹn ọmwa ne ọ gha ye iran rre ẹdẹdẹmwẹdẹ. Wa ghẹ mianmian!”