Diuteronomi 24 - Edo Bible (E Baibol Ẹdo) Version 1996

Ẹmwẹ Okhuo Ne A Khu Kevbe Ne A Dọlegbe Rhie

¹ “Gie a kha wẹ okpia rhie okhuo, vbe okiekie ọ na wẹ rẹn i ghi vbe rhie rhunmwuda, ọ miẹn emwi eso ne ẹ i yẹ irẹn vbe obọ ẹre. Rẹn keghi rhunmwuda onii gbẹn ebe aheyotọ viọ nẹ ẹn, ọ na wẹ ne ọ lahin irẹn owa rre.

² Gia kha wẹ te okhuo nii ghi ya rọnmwẹ okpia ọvbehe.

³ Okpia nii kevbe kha wẹ rẹn i ghi ho, ọ na vbe gbẹnnẹ ebe aheyotọ viọ nẹ ẹn, ọ na wẹ ne ọ lahin irẹn owa rre. Ra ne a kha wẹ ọdọ ẹre ne ukpogieva ni wu.

⁴ Vbene ọ rhirhi a gha ye hẹ, ọdọ ẹre ne okaro nii ghẹ dọlegbe rhie ẹre rọnmwẹ, ọ kere ne ọ ka ẹe ba ọmwa ne awua gue. Ọ gha dọlegbe rhie ẹre, emwi osọnnọ nọ vbe odaro e Nọyaẹnmwa, wa ghẹ mu orukhọ dan vberriọ la otọe nii ne Nọyaẹnmwa Osanobua uwa ra mu ne uwa.

Avbe Uhi Ughughan

⁵ “Ọmwa gha da rhie okhuo, a ghẹ ka ẹe ba avbe iyokuo ra iwinna ẹvbo ọvbehe, a ghi kpa irri nẹ ẹn la la ukpo ọkpa, ne ọ miẹn ehe na tota ke amwẹ ọnrẹn, ne ọ gha ye ẹko ẹre rhiẹnrhiẹn.

⁶ “U gha rhie emwi ne ọmwa mọmọ, ghẹ mu olọ ne ọ ya lọ avbe ẹhiẹn zẹ vbe emwi ne a dayi, rhunmwuda emwi iwinna ne ọ ya da egbe yi ọ re u mu nii.

⁷ “Ọmwaikọmwa ne ọ do ovbi Izrẹl ne ihua ẹre mu, ọ na ya ẹe gha do ẹki egbe ẹre, ra ọ na khiẹn ọẹn, a ghi gbe ẹe rua. Odẹ vberriọ, ọ re uwa gha ya ghe ukhu ọkhọ na rua.

⁸ “Adeghẹ te uwẹ khuọnmwi emianmwẹ ikpakpa ne ọ gie ọmwa na hẹẹ, miẹn wẹ u ru zẹẹ vbene avbe ohẹn e Livai tama ruẹn, wa rhie owẹ lele igiodẹ iran zẹ vbene I rhie ne iran.

⁹ Ye rre vbene e Nọyaẹnmwa ru e Miriam hẹ, ẹghẹ vbe ima ke Igipt dee.

¹⁰ “U gha rhie emwi ne ọmwa mọmọ, ghẹ la ẹre owa ya rhie ẹwu ne ọ ra rhie ne uẹn da yi.

¹¹ Mudia ye ore ne u gie ẹe tobọ ẹre rhie bu ruẹ gha dee.

¹² Adeghẹ ovbiogue nọ, ghẹ da ẹe yi ne ẹdẹ gbe.

¹³ U ghi rhie ẹre werriegbe gie ẹe vbe owẹn a defua nẹ, ne ọ miẹn ya hin egbe vbiẹ. Ẹghẹ nii rẹn gha kakabọ kpọnmwẹ ọn, ẹko e Nọyaẹnmwa Osanobua ruẹ gha vbe rhiẹnrhiẹn ghe ruẹ.

¹⁴ “Ghẹ mu ọguọmwadia ne ovbiogue ne u rhie vbe iwinna ru, ọ re ovbi Izrẹl nọ ra avbe orhunmwuyẹn ni rre uwa ẹvbo.

¹⁵ U ghi gha ha osa iwinna ne ọ winnaẹn ne uẹn ẹdẹgbegbe vbe ovẹn te de ro, ọ mwẹ emwi ne ọ ya ẹe ru, ọ vbe rhie aro ye odẹ khẹ ọ re nẹ ighẹ ọ gha sẹ irẹn obọ. a deghẹ u ma ha ẹre nẹ ẹẹn, ọ gha viẹ bu e Nọyaẹnmwa gha khian, a gha bu abe gbe uẹ.

¹⁶ “A ghẹ gbe evbibiẹ emọ ye orukhọ ne ivbi iran ru, erriọ, a ghẹ vbe gbele emọ ye orukhọ ne evbibiẹ iran ru, orukhọ ne ọmwa ru ọkpa ọre a gha gbe ẹe yi.

¹⁷ “Ghẹ gban emwi ne ọ khẹke ọmọ ne ẹ i mwẹ erha ra orhunmwuyẹn hin iran obọ rre, ghẹ vbe miẹn ẹgbẹe ukpọn wẹ ne u da ẹe yi ye emwi ne u rhie nẹ ẹn mọmọ.

¹⁸ Yerre wẹ eviẹn wa gha khin vbe Igipt, ẹre Nọyaẹnmwa Osanobua rua na do fannọ uwa vbe irri. Ọnii ọ zẹe ne I na gba uhi na ne uwa.

¹⁹ “Wa gha rhọ emwiokọ uwa ighẹ wa ma viọ eso vbọ gha die owa, ighẹ ọka ne uwa fiaẹn, wa ghẹ vbe dọlegbe gha khian rhunmwuda ọnii, wa sẹ enii rae ne avbe erhunmwuyẹn, emọ ne ẹ i mwẹ erha, kevbe avbe ẹgbẹ, ne Nọyaẹnmwa Osanobua ruẹ miẹn ehe na gha fiangbe uẹ vbe emwi ne u ru hia.

²⁰ Wa gha kọlọ erhan ọliv uwa nẹ uhukpa, wa ghẹ vbe werriegbe ya rhọ ne ọ ghi dekẹe. Avbe orhunmwuyẹn, emọ ne ẹ i mwẹ erha kevbe avbe ẹgbẹe ọ re ọ ghi yan enii.

²¹ Wa gha rhọ emwiokọ ne a ya ru ayọn ne ọ baa ọghe uwa nẹ uhukpa, wa ghẹ vbe werriegbe ya gbe ẹre ọrriẹ ukpogieva, ọmọ erhan nii ghi ke ẹe, ọghe avbe orhunmwuyẹn, emọ ne ẹ i mwẹ erha kevbe avbe ẹgbẹ ọ re enii khin.

²² Wa ghẹ mianmian wẹ eviẹn wa te khin vbe Igipt. Ọnii ọ si ẹe ne I na yi iyi na ne uwa.”