Diuteronomi 23 - Edo Bible (E Baibol Ẹdo) Version 1996

Vbene A Kan Ọmwa Fua Hin Uwu Ẹbu Emwa E Nọyaẹnmwa Rre Hẹ

¹ “Ọmwaikọmwa ne a ware ra ne a fian ẹre ekia fua, a ghẹ ka ẹe ba emwa e Nọyaẹnmwa.

² “Ọmọ ne erha ẹe vbe iye ẹe ma rọnmwẹ egbe, a ghẹ ka ẹe kevbe emọ ne ọ gha biẹlẹ ba emwa e Nọyaẹnmwa, uhin ya sẹ orre ne ogigbe.

³ “A ghẹ ka ovbi Amọn ra Moab kevbe emọ ne iran biẹlẹ ba emwa e Nọyaẹnmwa, uhin ya sẹ orre ne ogigbe.

⁴ “Ẹghẹ ne uwa na gha kpao vbe Igipt rre, iran ma rhie evbare ne uwa, iran ma sa amẹ ne uwa wọn, iran ke ya tie Balam ne ovbi Beọ ne ovbi Petọ ne Mẹsopotamia rre ne ọ do fi uwa unu.

⁵ Sokpan e Nọyaẹnmwa Osanobua rua ma zẹ ye Balam re, sokpan, ọ keghi ya ihẹn ni khian afiangbe rhunmwuda, ọ ho ẹmwẹ uwa.

⁶ Ẹghẹ ne uwa gha ya gha re agbọn ẹvbo, wa ghẹ ru emwikemwi ya yi iran na obọ ra ne uwa gu iran họn ẹfe.

⁷ “Wa ghẹ sọnnọ ivbi Idọm, etẹn uwa iran khin. Wa ghẹ sọnnọ ivbi Igipt rhunmwuda wa ka di otọ iran ya ẹghẹ ọkpa.

⁸ Emọ ne iran biẹlẹe, a sẹtin ke orre ne ogieha ka iran ba emwa e Nọyaẹnmwa.

⁹ “Wa gha rre agọ vbe ẹghẹ okuo, wa ghi lẹ ne emwi hia ni gha mu awua ye uwa egbe.

¹⁰ A deghẹ ọmwa khian ne awua gue rhunmwuda ne ọ na mina rhurhẹ emwi ku egbe vbe asọn, ọ ghi kpao hin uwu agọ rre ya gha rre odọ,

¹¹ ọ gha bu ẹghẹ ota, ọ ghi ya khuẹ, owẹn ghẹ ghi defua nẹ, ọ sẹtin dọlegbe gha die agọ.

¹² “Wa gha mwẹ ihe ọkpa ne ọ lahin agọ rre, ne uwa gha na ya gha ghughẹ vbe ọ gha khọn uwa.

¹³ Wa ghi gha rhie ovbi erhan mwẹ obọ ba emwi igbinna ọ wua. A deghẹ wa ra ghughẹ, wa ghi ya ẹe tọnnọ uvun, wa gha ru nẹ, wa ghi vbe ran rẹn.

¹⁴ Wa gie agọ ọghe uwa gha re ne awua i ye rhunmwuda e Nọyaẹnmwa Osanobua uwa deba uwa rre agọ, ne ọ gha degue uwa kevbe ne ọ rhie akhọnmiotọ ne uwa vbe uhunmwu eghian uwa. Wa ghẹ ru emwi ohọhọ ne ọ gha ya e Nọyaẹnmwa fi iyeke gbe uwa.

Avbe Uhi Ughughan

¹⁵ “A deghẹ ọviẹn lẹ fe vbe obọ ọmwa ne ọ yan rẹn, ọ na do lẹ gbinna an, ghẹ khu ẹe werriegbe.

¹⁶ Ọ sẹtin ya yin ẹvbo ne ọ yẹ ọ re vbe otọe ruẹ, a ghẹ vbe gha ru ẹe khọ.

¹⁷ “A ghẹ gie a miẹn wẹ ovbi Izrẹl, ọ re okpia nọ ra okhuo, te ọ ghi re ebabotu owa ugamwẹ.

¹⁸ A ghẹ vbe rhie igho ne a la odẹ vberriọ khuan la ọgua osa e Nọyaẹnmwa Osanobua uwa wẹ te do ya ha osa emwi ne a ve, te avbe ebabotu ye owa ugamwẹ sọnnọ e Nọyaẹnmwa.

¹⁹ “U gha rhie igho ra evbare nọ ra emwi ọvbehe ne ọ rhirhi gha khin ne ovbi Izrẹl ne ihua mọmọ, ghẹ fian igho isu yọ.

²⁰ U sẹtin nọ igho isu vbe emwi ne u rhie ne orhunmwuyẹn mọmọ, sokpan ẹ i re ne u rhie ne ovbi Izrẹl ne ihua. Wa gha ya uhi na ru emwi, ẹghẹ ni, e Nọyaẹnmwa gha fiangbe emwi hia ne u rhirhi a gha ru vbe otọe nii ne uwa ra yaẹn.

²¹ “U gha ru eyan emwi ne Nọyaẹnmwa Osanobua ruẹ, ghẹ fi iyeke gbe, vbe na i na ru emwi nii, e Nọyaẹnmwa gha ka ẹe yuẹ urhu ighẹ emwi ne u yanrẹn, orukhọ nọ a deghẹ a ma mu ẹẹn sẹ.

²² A deghẹ a ma ve Nọyaẹnmwa emwi, ẹ i re orukhọ.

²³ Sokpan, u gha ghi ya ekhọe obọ ru ẹe ve emwi nẹ, gie a miẹn wẹ u muẹn sẹ.

²⁴ “U gha lele odẹ ne ọ rre ugbo emwiokọ ne a ya rua ayọn ne ọ baa ọghe ovbi Izrẹl ne ogieva ruẹ khian, u sẹtin kọlọ ọmọ rẹn re vbene ọ khọn ruẹn, sokpan ghẹ ya okhuae rhie vbọ kpa vbe evba rre.

²⁵ “U gha la uwa oha ọka khian vbe uwu ugbo ọka ẹre, u sẹtin rri inu ọka ne u sẹtin ye obọ bunnọ sokpan ghẹ ye ọpia ne a ya fian ọka fian vbọ.”