Diuteronomi 22 - Edo Bible (E Baibol Ẹdo) Version 1996

¹ “U gha bẹghe ẹre ighẹ ẹmila ra ohuan ọghe ovbi Izrẹl ne ihua ra lẹ fua, ghẹ fi aro a, ya mu ẹẹn werriegbe gie ẹe.

² Sokpan a deghẹ ehe ne nọyan rẹn ye rrei ra te u ma rẹn nọyan rẹn, u ghi mu ẹẹn gha rrie owa, nọyan rẹn ghẹ ghi gualọ ẹe rre, u ghi mu ne ẹẹn.

³ Erriọ u gha vbe ru ẹe a deghẹ ekẹtẹkẹtẹ, ovbi ọza, ra emwi ọvbehe ne ọ rhirhi gha khin ne ovbi Izrẹl ne ihua mu fua.

⁴ “Deghẹ ekẹtẹkẹtẹ ra ẹmila ovbi Izrẹl ne ihua de vbe odẹ, ghẹ fi aroa, u ghi gu ẹe tọn ẹẹn mu ne ọ mudia.

⁵ “Ikhuo ghẹ yọ ukpọn ikpia, ikpia ghẹ yọ ukpọn ikhuo. Te Nọyaẹnmwa Osanobua uwa khuiwu emwa ni ru vberriọ.

⁶ “U gha dekun oko ahianmwẹ vbe erhan ra vbe otọ vbene iye ahianmwẹ na rhuẹ yan ekẹn ọnrẹn, ra ke ẹe kevbe ivbi ẹre ne giẹrẹ, ghẹ mu iye ahianmwẹ nii.

⁷ U sẹtin viọ ivbi ahianmwẹ negiẹrẹ nii, sokpan, u ghi gie iye ahianmwẹ nii gha rrie, ne u miẹn ehe na tọọ ne agbọn vbe ma ruẹn.

⁸ “U gha bọ owa ọgbọn, ghẹ mwẹ u ma ru emwi ne a dayi lẹga ehọ okhiẹ ọ re. Ẹghẹ nii, ẹ i ghi rre urhu ruẹ ọ re ọ ye a deghẹ ọmwa defua, ọ na wu.

⁹ “Ghẹ kọ emwiokọ ọvbehe ba erhan ne a ye ọmọ rẹn ru ayọn ne ọ baa, U gha ru ẹe vberriọ, a i ghi gie uwẹ lo ọmọ vbe emwi ne a ya ru ayọn ne ọ baa ra ọmọ ne emwi okọ ni mọẹn.

¹⁰ “Ghẹ rro ekẹtẹkẹtẹ kevbe ẹmila kugbe ya gua.

¹¹ “Ghẹ rhuan ukpọn ne a ye eto ohuan kevbe eto ovbiohuẹ do kugbe.

¹² “U ghi sele oko ebe uhi lele igie enenẹ ọ ghẹ ẹwu ruẹ.

Uhi Uhuanmwẹ Ọghe Ne Okpia Vbe Okhuo Na Miẹn Egbe

¹³ “Gie a kha ighẹ okpia rhie okhuo, iran vbe ọ re keghi ru emwi ọdọ vbe amwẹ, adeghẹ iyeke ọnii, okpia nii do kha ighẹ rẹn i ghi rhie okhuo nii.

¹⁴ Ọ na ghi zẹ ba okhuo nii wẹ ẹghẹ ne irẹn na rhie ẹre, ẹ i re rẹn ọre ọ vba ẹre vbe owa.

¹⁵ Evbibiẹ ọmọ okhuo nii ghi mu ukpọn ne a wa ye ukpo ọha ne ọ rhie ma wẹ a ma he vba ọmọ okhuo nii vbe owa, ọ ghi ya mu ẹẹn gie avbe ekaolotu ẹvbo nii ghe vbe iko.

¹⁶ Erha ọmọ okhuo nii ghi tama iran wẹẹ, ‘I ya ovbi mwẹ ne okhuo ne okpia na ne ọ rhie rọnmwẹ, banbanna nian, ọ he ẹe.

¹⁷ Ọ vbe ba ẹre ohoghe wẹ ẹ i re rẹn ọ re ọ vba ẹre vbe owa vbe irẹn rhie ẹre. Sokpan, wa ghe emwi ne ọ rhie maa wẹ rẹn ọ re ọ vba ovbi mwẹ vbe owa vbe ẹghẹ ne ọ na rọnmwẹ ọẹn, ghe ukpọn ukpo ọha.’

¹⁸ Ẹghẹ nii avbe ekaolotu ẹvbo ghi mu ọdọ ẹre nii, iran ghi gbe ẹe.

¹⁹ Iran ghi vbe fian ẹre igho esiliva iyisẹn, iran ghi mu igho nii ne erha ọmọ nii rhunmwuda te ọ rhie ukpọn efaa rhuan ọmọ okhuo Izrẹl ọkpa. Yevbe sẹ ọnii, okhuo nii ghi ye gha re amwẹ ọnrẹn, ẹ i vbe sẹtin khu ẹe vbe Ọ te ya wu.

²⁰ “Sokpan, a gha miẹn ighẹ ẹzọ ẹmwata nọ, ighẹ a ma miẹn emwi ya ta ẹe rhuan ighẹ ọmọ ne ọ ma he rẹn okpia ọ re ọmọ okhuo nii gha khin,

²¹ ẹghẹ nii, a ghi rhie ẹre ladian gha rrie onurho owa erha ẹe, emwa ẹvbo ẹre ghi filo okuta gbe ẹe rua vbe evba. Emwi ekhue ọ re ọ ru vbe uwu ẹbu vbe ekpa ne ọ na rẹn okpia nẹ, ọ ke ya rọnmwẹ ọdọ, awẹ vbe ẹghẹ ne ọ na rre owa erha ẹe. Odẹ vbe nian wa gha gbe ukhu emwi dan na uan.

²² “A gha mu okpia vbe ọ gu okuo ne ọ rre owa ọdọ ru emwi, a ghi gbele iran eveva ua. Odẹ vbe nian, wa gha ya gbe ukhu emwi dan na an.

²³ “Gie a kha i ghẹ a mu ọmwa vbe ore ẹvbo, vbe ọ gu ọmọ ne a ya ne ọmwa nẹ ru emwi.

²⁴ Wa ghi viọ iran hin ore ẹvbo rre, a ghi ya filo okuta gbele iran an. Ọ kere ne ọmọ okhuo nii wu rhunmwuda ọ ma tu wẹ ne a bu irẹn rre ugbẹn vbe a miẹn wẹ adesẹ ore ẹvbo, ehe ne emwa gha na họn ọ re ọ ye. Ọ kere ne nene okpia vbe wu rhunmwuda, ọ kegha gu ọmọ ne a ya ne ovbi Izrẹl ne ihua ẹre ru emwi. Vbe odẹ vbenian, wa ghi gbe ukhu ọkhọ na an.

²⁵ “Gie a kha ighẹ vbe a lahin ore ẹvbo rre nẹ, okpia keghi miẹn ọmọ ne a ya ne ọmwa nẹ, ọ na ye ẹtin vbe iwegbe gu ẹe ru emwi, ẹghẹ nii okpia ne ọ rrọọ ọkpa ọ re a gha gbe ua.

²⁶ A ghẹ ru ọmọ okhuo ne ọ rrọọ emwi rhọkpa rhunmwuda, ọ ma ru orukhọ ne ọ kere ne a gbe ẹe rua baa. Te ẹmwẹ na vbe yevbe ẹmwẹ ọmwa ne ọ gheghe dekun ọmwa ọvbehe, ọ na gbe ẹe rua.

²⁷ Uwu oha ọ re ọmwa nii na mu ọvbokhan okhuo ni yagha, a gha rhe miẹn wẹ ọ te tu wẹ ne a bu irẹn rre, a ma miẹn ọmwa ne ọ ye ọre obọ.

²⁸ “Gie a kha ighẹ ọmwa gha mu ọmọ okhuo ne a ma ya ne ọmwa yagha a na mu ẹẹn ginna ẹẹn.

²⁹ Ọ ghi ya ha igho ne a mu ye okhuo uhunmwu igho esiliva ekigbe siyeha gie erhae, okhuo ni ghi khian amwẹ ọnrẹn, rhunmwuda ẹtin vbe iwegbe ọ re ọ ya mu ẹẹn gu ẹe ru emwi. Ẹ i sẹtin khu ẹe ọ te ya wu.

³⁰ “Ọmwa rhọkpa ghẹ fa erha ẹe rua vbekpa ne ọ gha na mu amwẹ ọnrẹn ike amwẹ ọnrẹn ya gha.”