Diuteronomi 21 - Edo Bible (E Baibol Ẹdo) Version 1996

Vbekpa Izigha Ne A Ma Miẹn Otọe Ẹre

¹ “Adeghẹ a miẹn ọmwa ne a gbe ua vbe uwu oha vbe otọe ne Nọyaẹnmwa Osanobua ra mu ne uwa, sokpan wa ma rẹn ọmwa ne ọ gbe ẹe.

² Avbe ekaolotu uwa kevbe ni bu ohiẹn ghi ladian ya ke ehe ne a na miẹn ikun ọmwa nii mwa vbe ne ọ rrei sẹ hẹ ya sẹ dọmwadẹ ẹvbo ni sikẹ evba.

³ Avbe ekaolotu avbe ẹvbo nii sikẹ ọ re sẹ ighẹ ehe ne a na miẹn ikun ọmwa nii, ghi hannọ ovbi ẹmila amwẹ ne a ma he ya winna ẹdẹ.

⁴ A ghi rhie ẹre gha rrie ẹzẹ ne ẹ i ka ehe ne otọ ne a ma he mu ẹre ugbo ra ne a kọ emwi yọ ẹdẹ, a ghi khiẹn ẹre ẹyaẹn gbẹe rua vbe evba.

⁵ Avbe ohẹn Livai ghi vbe gha rre evba rhunmwuda iran ọ re ọ gha bu ohiẹn uhi ne o dekan uyinmwẹ ikẹtin hia. E Nọyaẹnmwa Osanobua ọ re ọ zẹ iran ne iran gha ga irẹn, kevbe ne iran vbe gha ya eni irẹn fiangbe ọmwa.

⁶ Avbe ekaolotu nii hia ni ke ẹvbo ni sikẹ ehe ne a na miẹn ikun ọmwa ne ọ wu nii ghi kpe obọ iran yan ẹmila nii.

⁷ Iran ghi vbe kha wẹẹ, ‘Ẹi re ima ọ re ọ gbe ọmwa nii uan, ma ma vbe rẹn ọmwa ne ọ ru ẹe.

⁸ E Nọyaẹnmwa yabọ ivbi Izrẹl ne emwa ruẹn, ne uwẹ miẹnfan ke Igipt gha dee. Yabọ mwa, ghẹ ka uwu ọmwa ne ọ ma rukhọ ne a gbe ua ye ima urhu.’

⁹ A ghi miẹn wẹ, wa ghẹ ghi ru nẹ vbene e Nọyaẹnmwa ho, a i ghi ka ẹe ye uwa urhu ighẹ wa de izigha.

Avbe Oleghan Ikhuo

¹⁰ “E Nọyaẹnmwa Osanobua uwa gha gie uwa khọnmiotọ vbe okuo, wa na munọ avbe oleghan.

¹¹ Eso vbe uwu wa sẹtin miẹn okhuo ne ọ mose vbe uwu iran ne ọ yẹ ruẹ ne u ho ne u rhie rọnmwẹ.

¹² U ghi rhie ẹre gha rrie owa, u ghi wẹ ne ọ zẹ eto kevbe ne ọ biẹnnẹ ihiẹn obọ ẹre kevbe ne

¹³ ọ vbe viọ ukpọn ọvbehe yọ. Ọ ghi di owa ruẹ ya la uki ọkpa ne ọ ya khiẹ evbibiẹ ọe, iyeke ọnii, u sẹtin rhie ẹre rọnmwẹ.

¹⁴ “A deghẹ ọ ghi zẹ kpẹe, u na wẹ u i ghi gualọ ẹe, u ghi gie ẹe wa gha rrie vbe ne ẹ i na ha osa; rhunmwuda ighẹ ẹtin vbe iwegbe ọ re u ya mu ẹẹn ne ọ lovbiẹ ke uẹ, u i sẹtin ya obọ ne a ya mu ọviẹn mu ẹẹn, ne u khiẹn ọẹn.

Ẹmwẹ Ukhu Ọmọ Ọdiọn

¹⁵ “A gha miẹn ighẹ okpia mwẹ ikhuo eva, iran eveva na biẹlẹ emọ ikpia ne ẹẹn, sokpan a keghi miẹn wẹ ẹ i re amwebọ ne ọ rrọ ọ re ọ biẹ ọdiọn.

¹⁶ Okpia nii gha ra gha ukhu, wẹ ne ọ ghẹ gbe ghe obọ ọkpa ne ovbi amwebọ ẹre ne ọ ya viọ emwi ni khẹ ke ọmọ ọdiọn nii ne ẹẹn.

¹⁷ “Ukhukhu eva ọghe emwi ẹnrẹn ọ re ọ gha viọ ne ọmọ ọdiọn nii, a gha rhe miẹn wẹ ẹ i re ovbi amwebọ ẹre nọ. Ọ kere ne ọmwa rẹn ovbi ẹre ne ọdiọn ye ọmọ ọdiọn, ne ọ vbe gha emwi ne ọ khẹ ke ẹe ne ẹẹn zẹ vbene uhi khare.

Ẹmwẹ Ọmọ Ne Ẹ I Họn Ẹmwẹ

¹⁸ “Ọ gha re te ọmwa ghi mwẹ ọmọ ne ọ ze vbe udu kevbe ne ẹ i họn ẹmwẹ, ọmọ ne ẹ i họn ẹmwẹ ne evbibiẹ ọe, vbene ọ khọn iran ne iran a yan rri ọ re oya sẹ,

¹⁹ evbibiẹ ọe ghi rhie ẹre gha rrie ehe ne avbe ekaolotu ẹvbo ye, iran ghi ya gui ẹzọ ẹre.

²⁰ Iran ghi tama iran wẹẹ, ‘Ovbi ima ne okpia na ze vbe udu gbe, ẹ i vbe họn ẹmwẹ ne ima, ọdayọn nọ, ọ vbe mu ima igho rhia.’

²¹ Ẹghẹ nii, avbe ekaolotu ẹvbo nii ghi filo okuta gbe ẹe rua, odẹ vberriọ ọ re u gha ya wabọ emwi dan ni uan. Emọ ni rre Izrẹl hia ghi họn, dọmwadẹ ọghọe ghi rhie ẹwaẹn ye uhunmwu.

Avbe Uhi Ughughan

²² “A deghẹ ọmwa ru emwi dan, a na gbe ẹe rua yọ, a na si ikun ẹnrẹn rrọ ye erhan,

²³ a ghẹ gie ẹdẹ gbe ẹe ye evba, rhunmwuda ikun orinmwi ne a sirra ye erhan te ọ sọnnọ e Nọyaẹnmwa vbe ọ gha dẹ ghe ẹre. Wa ya re ikun orinmwi nii ne uwa ghẹ ya mu awua ye otọe nii ne Nọyaẹnmwa Osanobua rua ra mu ne uwa.”