Diuteronomi 20 - Edo Bible (E Baibol Ẹdo) Version 1996

Uhi Ne Ọ Dekan Ẹmwẹ Okuo

¹ “De ghẹ wa yo okuo, ne uwa ya gu eghian uwa gbinna wa na miẹn ikẹkẹ okuo kevbe ẹsin kevbe ivbiyokuo ni bun sẹ ọghe uwa, wa ghẹ gie ohan iran mu uwa. E Nọyaẹnmwa Osanobua rua ne ọ viọ uwa ke Igipt ladian, gha rrọ yaba uwa.

² Vbe uwa te suẹn igbinna, ohẹn ghi ladian, ọ ghi tama ivbiyokuo ni wẹẹ,

³ ‘Wa danmwẹ ehọ wa ne ivbi Izrẹl! Okuo wa rrie ẹre na. Wa ghẹ gie ohan eghian uwa mu uwa, wa ghẹ gie egbe wọ uwa ra ne uwa gha guọ.

⁴ E Nọyaẹnmwa Osanobua uwa lele uwa khian, ọ gha rhie akhọnmiotọ ne uwa.’

⁵ “Ẹghẹ nii, avbe ekaolotu ghi do gu emwa nii guan wẹẹ, ‘Arhin eso rre emwa na ra ne ọ bọ owa ne ọ ma he kie ẹre? A deghẹ ọ rrọọ, ọ sẹtin gha rrie. Ne a ghẹ miẹn wẹ, a gha gbe ẹe vbe okuo ọmwa ọvbehe ọ re ọ ghi ya kie owa ẹre.

⁶ Emwa eso rre emwa ne ọ da kọ ugbo ọmọ erhan ne a ya ru ayọn ne ọ baa ra, ne ọ ma he miẹn ẹghẹ ya rhọ ẹre? Adeghẹ ọ rrọọ ọ sẹtin gha rrie owa. Ne a ghẹ miẹn wẹẹ adeghẹ a gbe ẹe vbe okuo, ọmwa ọvbehe ghi ya ye ayọn ẹnrẹn ru.

⁷ Arhin eso rre emwa ne ọ ga ye ọmọ ne ọ ra rhie ra? Adeghẹ ọrrọọ ọ sẹtin gha rrie owa. Ne a ghẹ miẹn wẹ adeghẹ a gbe ẹe vbe okuo, ọmwa ọvbehe ghi ya rhie okhuo ne ọ ga yi.’

⁸ “Avbe ekaolotu ghi vbe tama emwa ni wẹẹ, ‘Arhin eso rre emwa ra ne obọ ẹre i ghi guọ emwi, ne ohan vbe mu? Adeghẹ ọ rrọọ ọ sẹtin gha rrie owa, ne ọ ghẹ kọ ohan ye emwa nekpa ekhọe.’

⁹ Avbe ekamakodin ghẹ ghi gu avbe ivbi iyokuo guan fo nẹ, a ghi do zẹ ọkaolotu ne dọmwadẹ oka.

¹⁰ “Wa gha ya khọn ẹvbo ọkpa, wa ghi ka rhie ẹkpotọ ne iran ya rinmwian nẹ.

¹¹ Deghẹ iran kie urho iran na wẹ obọ uwa ke ukhunmwu nẹ, iran ghi do gha re eviẹn uwa ne iran gha winna ne uwa vbene a gha na ya obọ yẹn iran ẹho ru ẹe.

¹² Sokpan, deghẹ emwa ẹvbo nii khare ighẹ iran i rinmwian, iran na wẹ iran gha gbinna, wa ghi viọ ivbiyokuo uwa lẹga ẹre.

¹³ Adeghẹ e Nọyaẹnmwa gie uwa khọn ẹvbo nii mu otọ, wa ghi wa gbele ikpia ni rrọ hia.

¹⁴ Vbene ọ rhirhi gha ye hẹ, wa sẹtin viọ ikhuo, emọ, emwirri kevbe emwi ọvbehe hia ni rre ẹvbo nii ya khian ọwua. Wa sẹtin gha lo emwi hia ni re ọ ghe eghian uwa. E Nọyaẹnmwa ya ẹe ne uwa nẹ.

¹⁵ Erriọ wa khian gha ru avbe ẹvbo ni khian rrei vbe otọe ne uwa khian yin.

¹⁶ “Sokpan, wa gha khọn ẹvbo ni rre otọe ne Nọyaẹnmwa Osanobua khian mu ne uwa. Wa gbele emwa hia ni rrọọ rua.

¹⁷ Wa wa gbele emwa ni rrọ hia fo fẹẹrẹ: e Hiti, Amọri, e Kenan, e Pẹriz, e Hivi kevbe Jebus zẹ vbene Nọyaẹnmwa tama uwa ne uwa ru.

¹⁸ Gbele iran an, ne iran ghẹ ya ye uwa rukhọ ghe Nọyaẹnmwa, vbene iran gha na ma uwa ẹre ne uwa gha ru avbe emwi osọnnọ ne iran ru vbe uwu ugamwẹ ẹbọ iran.

¹⁹ “Wa gha he ne uwa mu ẹvbo, wa ghẹ tọnnọ erhan ni mọ ọmọ ne a re ni rrọ kua, ọ gha khọn rẹn ne okuo nii kpẹe vbe otọ. Wa sẹtin rri ọmọ erhan nii, sokpan wa ghẹ guọghọ erhan ni rrọọ; avbe erhan ire oghian uwa.

²⁰ Wa sẹtin tọnnọ erhan nekpa kua ne uwa ya ẹe khẹ egbe vbe uvun, rhinrin wa te do khọn miotọ ẹvbo nii.”