Diuteronomi 2 - Edo Bible (E Baibol Ẹdo) Version 1996

¹ “Vbe okiekie ehia, ma ke ghi werriegbe gha rrie uwu ato ne ọ rre odẹ Okun Iranmwiran zẹ vbene Nọyaẹnmwa kha re, ma ke wa gbe ẹghẹ ne ọ taẹn ya gha zozo khian vbe avbe ẹvbo oke Idọm.

² “Ẹre Nọyaẹnmwa na tama mwẹ wẹ,

³ ẹghẹ ne ima ya gha zozo yo zozo rre vbe ẹvbo oke sẹ nẹ, ne ima sua owẹ sikẹ odaro ghe odẹ okuọ.

⁴ Ọ na wẹ ne I ru igiodẹ na ne uwa wẹẹ: ‘Vbe ẹvbo oke ọghe Idọm ọre uwa ghi ra la gberra na, otọe etẹn uwa ne ọ khian rrei nọ, ivbi uniẹn Isọ o re iran khin, ohan uwa gha mu iran,

⁵ sokpan wa ghẹ suẹn iran gha gu khọn rhunmwuda mẹ i ra mu ne uwa vbe otọ iran hiehiere, ọ gha khọn rẹn ne ọ gha re ibata ọkpa. Ivbi Isọ ọ re I mu Idọm na.

⁶ Wa sẹtin gu iran dẹlẹ evbare ra amẹ.’

⁷ “Wa yerre wẹ e Nọyaẹnmwa ne Osanobua uwa wa fiangbe uwa vbe emwi ne uwa he ru hia. Ọ kegha gbe aro ghe uwa vbe uwa zozo lele uwu ato nọkhua na khian. Ukpo iyeva na, ọ re ọ ya gu uwa gha rrọọ, emwi ne uwa a rhirhi gha ho hia keghi vbe sẹ uwa obọ.

⁸ Ẹre ima na ghi si okhian, ma na kpao hin odẹ ne ọ rrie Ẹlat kevbe Eziọngeba rre, a na gha rrie odẹ Okun Ne ọ wu, a na gban egbe ghe odẹ okuọ ghe odẹ Moab.

⁹ “Ẹre Nọyaẹnmwa na tama mwẹ wẹ, ‘Wa ghẹ kpokpo ivbi e Moab ne ivbi e Lọt, ra ne uwa suẹn iran ne a gu gbinna. Mẹ mu ẹvbo Ar ne iran nẹ, mẹ i ra mu ne uwa vbe otọe iran hiehiere.’

¹⁰ (Uniẹn avbe arhuanran ne a tie ẹre Emim, ọ re ọ te gha rre Ar. Iran hia ke wa tan zẹ vbe uniẹn arhuanran ọvbehe ne a tie ẹre Anakim.

¹¹ A keghi vbe tie iran Refeim zẹ vbe ne avbe tie avbe Anakim, sokpan ivbi e Moab ke gha tie iran Emim.

¹² Ivbi Hor ọ re ọ te ka gha rre Idọm, sokpan ivbi Isọ keghi khulo iran kua, iran dunmwu ẹvbo iran an, iran na ghi yin evba nii ighẹ iran tobọ iran, zẹ vbene ivbi Izrẹl vbe khulo avbe eghian iran ladian vbe okiekie zẹẹ, vbe otọ ne Nọyaẹnmwa mu ne iran.)

¹³ “Ma na ghi do fian Ẹzẹ Zẹrẹd rra vbene Nọyaẹnmwa tama mwa.

¹⁴ Ke ẹghẹ ne ima ya kpao vbe Kedẹs Bania rre yasẹ ne ima ya fian Zẹrẹd rra, ke gha re ukpo eva irrọvbiyeva. Emwa ni sẹtin yo okuo vbe orre nii hia wulo fo nẹ zẹ vbe ne Nọyaẹnmwa ta ẹe wẹ iran gha wulo.

¹⁵ E Nọyaẹnmwa keghi wa mu aro da iran ọ te do fuẹn iran fo fẹẹrẹ.

¹⁶ “Ugbẹn vbe emwa ni yo okuo ni rrọ hia ghi wulo fo nẹ,

¹⁷ e Nọyaẹnmwa keghi kha wẹẹ,

¹⁸ ẹdẹnẹrẹ na, wa ghi wa ya la odẹ Ar la otọe Moab gberra.

¹⁹ Ẹghẹ nii, wa ghi do sikẹ otọ emwa Amọn ni re ivbi uniẹn e Lọt. Wa ghẹ kpokpo iran, wa ghẹ gu iran khọn rhunmwuda mẹ ira mu ne uwa vbe otọ ne I mu ne iran nẹ.”

²⁰ (Otọe na kevbe gha re ne a vbe tie ẹre Refeim, ni re emwa ni te ka yin ẹnrẹn. Emwa Amọri kegha tie iran Zamzumim.

²¹ Iran keghi wa vbe tan sẹ vbe avbe Anakim. Iran wa gha bun ẹsẹse. Iran keghi vbe gha re emwa ni wegbe sokpan e Nọyaẹnmwa keghi fuẹn iran an, ọ re ivbi Amọri na mu otọe iran, iran na yin ẹnrẹn.

²² Erriọ zẹ ọ re e Nọyaẹnmwa vbe ru ne ivbi Idọm, emwa ni re ivbi uniẹn Isọ ni rre avbe ẹvbo oke ọghe Idọm. Ọ keghi fuẹn emwa Hori ua, ẹre ivbi Idọm ghi na mu otọ iran, iran na yin ẹnrẹn, ehe ne iran ye na.

²³ Emwa ni ke Kret ne otọe ne amẹ lẹga rre, keghi fuẹn avbe emwa Avim ni te rre avbe igue ni rrọ rhinrin ya sẹ odẹ ekẹn Gaza, iran keghi miẹn iran otọ, iran na yin evba.)

²⁴ “Ma ghi la Moab gberra nẹ, e Nọyaẹnmwa keghi kha wẹẹ, ‘Banbanna nian, wa si okhian ne uwa ya fian Ẹzẹ Anọn rra. I ra rhie Sihọn ne ovbi Amọri ne ọ re ọba Hesbọn ye uwa obọ, ke ẹe kevbe otọe ẹre, wa suẹn ọnrẹn gha gu khọn ne uwa vbe miẹn re otọ.

²⁵ Ẹre na, I gha suẹn gha ya ohan uwa mu emwa vbe ehehia. A gha so eni uwa, emwa hia ghi gha guọ zẹzẹzẹ ba ẹmwẹ ohan.’

Izrel Khọn Mu Saihọn Ne Ọba

²⁶ “Ẹre I na gie emwa ke ato Kedemọt bu ọba Saihọn vbe Hesbọn, I na mu iro ọfumwegbe na gie ẹe wẹẹ,

²⁷ ‘Gie ima la ẹvbo ruẹ gberra, te ima ra wa fian ẹn rra, ma i ra vbe rhie owẹ hin adesẹ odẹ rre.

²⁸ Ma gha ha osa ye evbare ne ima ra re ke amẹ ne ima ra wọn. Emwi ne ima ho ma gberra ne u gie ima la ẹvbo ruẹ gberra.

²⁹ Rhinrin ma te fian Jọdan rra gha rrie otọe ne Nọyaẹnmwa ne Osanobua mwa ra mu ne ima. Ivbi uniẹn Isọ ni rre Idọm kevbe emwa Moab ni rre Ar gie ima la ẹvbo iran gberra.’

³⁰ “Sokpan e Sihọn ne ọba ma kue ne ima la ẹvbo ẹre gberra. E Nọyaẹnmwa ne Osanobua uwa keghi ya ẹe ze vbe udu, ọ kevbe sọtẹ, ne ima miẹn ehe na khọn miẹn ẹre otọe ne ima mu otọ ẹre ne ima ye ye na.

³¹ “Ẹre Nọyaẹnmwa na tama mwẹ wẹẹ, ‘Ghe I wiẹghẹ Saihọn ne ọba kevbe otọe ẹre rua nẹ vbe odaro uwa, wa mu otọ ẹre ne uwa yin ẹnrẹn.’

³² E Sihọn keghi viọ emwa rẹn ladian bu ima gha dee ne iran do gu ima gbinna vbe ọkpẹn Jahaz.

³³ Sokpan e Nọyaẹnmwa Osanobua ima keghi rhie ẹre yan ima obọ, ma keghi gbe ẹe rua ke ẹe kevbe ivbi ẹre kevbe emwa rẹn hia.

³⁴ Vbe uwu ẹre nii, ma keghi khọn ẹvbo ni rrọọ hia mu otọ, ma keghi gbele emwa hia a, ikpia kevbe ikhuo kevbe ibiẹka. Ma ma vbe sẹ ọkpa rae ye agbọn.

³⁵ Ma keghi viọ iran ẹmila, a na viọ iran emwi hia ne iran mwẹ vbe ẹvbo iran.

³⁶ E Nọyaẹnmwa ne Osanobua mwa keghi gie ima khọn avbe ẹvbo hia ni rre ke Aroa vbe ọkpẹn Ẹzẹ Anọn kpao rhinrin ya sẹ Giliad mu otọ ke ẹe kevbe avbe ẹvbo ni wa rre ọkpẹn nene ẹzẹ tobọ ẹre. A ma miẹn ẹvbo ne ekẹn ọnrẹn yo gbe ne ima.

³⁷ Sokpan, ma ma sikẹ ọkpẹn ẹvbo ni rre otọ Amọri ra eghute Ẹzẹ Jabọk ra avbe ni rre uhunmwu oke ra avbe ọvbehe hia ne Nọyaẹnmwa Osanobua ima wẹ ne ima ghẹ yo.