Diuteronomi 19 - Edo Bible (E Baibol Ẹdo) Version 1996

Avbe Ẹvbo Ne A Le Gbinna

¹ “Nọyaẹnmwa ghẹ ghi fuẹn iran an nẹ ighẹ avbe emwa ne ọ ra mu ẹvbo iran ne uwa, ighẹ wa vbe munọ ẹvbo iran ke owa iran nẹ, wa na ghi gbe ẹkun sẹ otọ vbe evba.

^2-3 Wa ghi zẹ eha vbe uwu avbe ẹvbo nii. Wa ghi gha otọe ne e Nọyaẹnmwa ra mu ne uwa ye ukhukhu eha vbene ọkpa vbe uwu avbe ẹvbo na gha na gha rre ọkpọkpa vbọ ne ọmwa ne ọ gbe ọmwa ran miẹn ehe lẹ gha rrie ne a miẹn rẹn yi hin obọ ẹbe.

⁴ A deghẹ ọmwa gbe ọmwa ne ẹ i re oghian rẹn rua, vbene ẹ i na re ẹmwẹ ọnrẹn, ọ sẹtin lẹ gha rrie ọkpa vbe uwu avbe ẹvbo na, ọ ghi lẹ fe.

⁵ “Vbe igiemwi, a deghẹ arhin eva gba ye uwu ẹgbo ya fian erhan, a na miẹn wẹ ọkpa ghi fian erhan vbọ, uhunmwu ughanmwa rẹn keghi vbọ hin uze rre, ọ na gbe ọmwa nọkpa a, ọ sẹtin lẹ gha rrie ọkpa vbe uwu avbe ẹvbo na, ọ ghi miẹn uhunmwu.

⁶ A deghẹ ẹvbo ọkpa kẹkan ọ re ọ rrọ, ọ gha rrei gbe, a ghi miẹn wẹ ọmwa ne ọ khẹke ne ọ rria ikhi ye izigha ne a de ni, ghi khu ọmwa ni mu, kevbe rhunmwuda ne ohu na mu ẹẹn ni, ọ ghi ya gbe ẹe rua ighẹ ọmwa ne ọ ma rri abe. vbene ọ rhirhi gha ye hẹ, te ọ gbe ọmwa ne ẹ i re oghian rẹn rua vbe ne ẹ i na re ẹmwẹ ọnrẹn.

⁷ Ọnii ọ zẹe ne I na wẹ ne uwa zẹ ẹvbo eha ya otọ.

⁸ “Deghẹ Nọyaẹnmwa Osanobua rua ghi vbe mu otọe uwa ne uwa zẹ vbe ne ọ yan ma avbe erha uwa odede, ọ na mu otọe ne ọ yan yi hia ne uwa.

⁹ Ẹghẹ nii, wa ghi zẹ ẹvbo eha ọvbehe ba ẹre. Ọ gha mu avbe otọe na ne uwa, a deghẹ wa ru avbe emwi ne I tama uwa na hia, kevbe deghẹ wa ho ẹmwẹ Nọyaẹnmwa Osanobua rua, wa na vbe gha ru vbene ọ ma uwa ẹre.

¹⁰ “Wa ru ọna, wa i khian vbe rri abe ọghe ne a na gbe ọmwa ne ọ ma rukhọ vbe otọe ne Nọyaẹnmwa ra mu ne uwa.

¹¹ “Sokpan a deghẹ ọmwa ghi ba gbe ogieva ẹre ua, ọ na lẹ gha rrie ọkpa vbe uwu avbe ẹvbo na ne a miẹn rẹn yi hin obọ ẹre rre vboo?

¹² Ọ gha ye rriọ, avbe ekaolotu ẹvbo ẹre ghi do mu ẹẹn, a ghi si ẹe gie ọmwa ne ọ khẹke ne ọ rria ikhi izigha nii ne ọ miẹn ehe na gbe ẹe rua.

¹³ “Wa ghẹ tohan rẹn, wa wabọ izigha na an vbe otọ Izrẹl ne agbọn miẹn ehe na ma uwa.

Ehe Ne Ọ La ẹe Kevbe Otọe Gha dee

¹⁴ “Ghe fi uwu ọghe emwi ogieva ruẹ ne a rhie yọ ke ẹghẹ ne ọ kpẹre gha dee vbe otọe nii ne Nọyaẹnmwa Osanobua rua ra mu ne uwa.

Uhi Vbekpa Iran Ni Sẹ Osẹe

¹⁵ “Osẹe ọkpa ma sẹ ne a gha ya bu abe gbe ọmwa, ọ gha ghi kanmwa buan, osẹe eva ọ re ọ gha sẹ osẹe a te kha ighẹ ọmwa nii rri abe.

¹⁶ Adeghẹ ọmwa ho ne ọ ho ọkhọ ye ọmwa ọvbehe egbe vbe ekpa ne ọ na mu ẹmwẹ kuan rẹn.

¹⁷ Iran eveva ghi do mudia vbe ehe ọkpa ne a na ga nii, ne avbe ohẹn kevbe ni bu ohiẹn ni mu unu ẹghẹ nii, bu ohiẹn iran.

¹⁸ Iran ni bu ohiẹn ghi kakabọ gualọ otọ ẹmwẹ nii ẹsẹse, a deghẹ te ọmwa nii wa gheghe mu ẹmwẹ kuan ovbi Izrẹl ne ihua ẹre.

¹⁹ A ghi rri ọ re oya ne a gha te rri ọmwa ne a mu ẹmwẹ kuan ni re. Odẹ vbe nian, wa gha gbe ukhu iba vberriọ rua.

²⁰ Emwa hia ghi họn emwi ne ọ sunu, iran ghi rhie ẹwaẹn ye uhunmwu, a ighi miẹn ọmwa ọvbehe ne ohan ghẹ ghi gie ẹe zẹ egbe iba vberriọ.

²¹ Wa ghẹ tohan ọmwa rhọkpa, oya ne ọ gha re ghi gha re, wẹ ne ọ gbe ọmwa, a ghi vbe gbe ẹe rua, ne ọ rhu ọmwa aro ọkpa, a ghi vbe rhu ẹre aro ọkpa, akọn ọkpa ye ihe akọn ọkpa, obọ ye ihe obọ, owẹ ye ihe owẹ.”