Diuteronomi 18 - Edo Bible (E Baibol Ẹdo) Version 1996

Oghae Ọghe Avbe Ohẹn

¹ “Ewae e Livai ne ọ re ọghe avbe ohẹn, a i ra ghae ne iran vbe otọe nii, emwi izẹ ọhẹ kevbe emwi izọ ese ọvbehe ne emwa viọ gie Nọyaẹnmwa ọre iran gha ya gha koko egbe.

² A ghẹ mu otọ ne iran zẹ vbene a ghae ne emwa nekpa, ukpo ohẹn nii ọrọre ọghae iran, zẹ vbe ne Nọyaẹnmwa yan rẹn.

³ Ọmwaikọmwa gha do ya ẹkhuia ẹmila ra ohuan zọ ese, a ghi viọ izabọ ẹre, agbanmwẹ ọnrẹn kevbe ẹkpokhurhu ẹre ne avbe ohẹn.

⁴ Avbe ohẹn ọ re ọ yan oghae ne okaro ọghe ọka, ayọn, ofigbọn ọliv kevbe eto ohuan.

⁵ Te Nọyaẹnmwa zẹ ẹwae Livai ladian vbe uwu uwa ne iran gha ga irẹn zẹ vbe ohẹn ẹdẹdẹmwẹdẹ.

⁶ “E Livai ne ọ rhirhi gha ho, sẹtin ke ẹvbo ne ọ rhirhi gha khin vbe Izrẹl gha die ihe ọkpa ne a na ga ni.

⁷ Ne ọ da ga vbe evba zẹ vbe ohẹn ọghe Nọyaẹnmwa Osanobua ẹre zẹ vbe avbe e Livai nekpa ni ga vbe evba.

⁸ A ghi vbe ghae evbare ne ẹẹn zẹ vbe ọghe avbe nekpa, ọ sẹtin viọ emwi ne avbe etiọnrẹn a rhirhi viọ gie ẹe.

Ibude Vbe Ekpa Iruẹbọ

⁹ “Wa gha sẹ otọe ne Nọyaẹnmwa Osanobua ra mu ne uwa, wa ghẹ mwẹ obọ vbe emwi emwiekhue ne iran ru ighẹ ẹvbo ni rre evba.

¹⁰ Wa ghẹ ya ivbi uwa zọ ese vbe erhẹn ọghe aka uwa, wa ghẹ vbe gie emwa uwa zẹ ọbo edunna ra ne iran gha fi iha ra ne iran gha fi emwa unu.

¹¹ Ra ẹbo, ghẹ vbe gie iran ya gha gualọ otọ emwi vbe obọ emwa ni wulo nẹ.

¹² E Nọyaẹnmwa Osanobua rua i ho ẹmwẹ emwa ni ru emwi emwiekhue na, ọ ni ọ si ẹe ne ọ na khulo avbe emwa nii hin otọe nii rre vbene uwa ya nana sikẹ odaro.

¹³ Wa gha re emwa ne Nọyaẹnmwa gba ẹko ẹre fẹẹrẹ.”

Osanobua Yanrẹn I Ghe Rẹn Gha Gie Akhasẹ Rre

¹⁴ Ẹre Mosis na kha wẹẹ, “Emwa ne uwa ra ya mu ẹre otọ yin na, emwa ni ru ẹbo awan kevbe ni fi iha, ọ re iran khin sokpan e Nọyaẹnmwa Osanobua rua ma kue yọ ne uwa ru ọna.

¹⁵ Ye ihe ọnii, ọ gha gie avbe akhasẹ vbe mwẹ ke uwu uwa gie uwa, wa ghi gha rhie ẹmwẹ ọnrẹn.

¹⁶ Ẹdẹ ne uwa si koko ye ọkpẹn Oke Sainai, te uwa rinmwian ẹẹn wẹ wa i ghi ho ne uwa họn urhu e Nọyaẹnmwa, ra ne uwa ye bẹghe ehe ne ọ ye ne ọ yevbe erhẹn nii, rhunmwuda wẹ, ọ gha ye rriọ, wa gha wulo.

¹⁷ “Ẹre Nọyaẹnmwa na tama mwẹ wẹẹ, ‘Emwi umẹwaẹn ọ re iran nọ rẹn.

¹⁸ I gha gie akhasẹ vbe ruẹ ke uwu emwa iran gie iran; I gha tama rẹn ẹmwẹ ne ọ gha ta, irẹn ghi vbe rhie iyi ne I yi hia ma iran.

¹⁹ Akhasẹ gha ya eni mwẹ guan, ọmwaikọmwa ne ọ ma ya ẹe ru emwi, I gha rri ọ re oya.

²⁰ Sokpan, a na miẹn akhasẹ ne ọ gha ye eni mwẹ guan vbe I ma gie ẹe ne ọ ru vberriọ, uhunmwu ọ ya khiẹ ọ re, erriọ vbe nọ ne dọmwadẹ akhasẹ ne ọ ya eni ẹbọ ọvbehe gha guan.’

²¹ “Wa sẹtin kha wẹ vbe a gha ya rẹn hẹ ighẹ ẹmwẹ ne akhasẹ ta ẹe e Nọyaẹnmwa ma gie ẹe.

²² A deghẹ akhasẹ ya eni e Nọyaẹnmwa guan ighẹ ẹmwẹ ne ọ ta ẹe ma sẹ, a ghi rẹn ighẹ ẹ i re Nọyaẹnmwa ọ re ọ gie ẹe. Akhasẹ ni ẹmwẹ obọ ẹre ọ re ọ ta ẹe, wa ghẹ gha mu ohan rẹn.”