Diuteronomi 16 - Edo Bible (E Baibol Ẹdo) Version 1996

Alagberra

¹ “Ye ọghọ ne Nọyaẹnmwa Osanobua rua vbe ekpa ne uwa gha na gha ru emwiukpo Alagberra vbe uki Abib; rhunmwuda asọn ọkpa vbe uwa uki ni ọre a na fan uwa vbe irri ke Igipt ladian.

² U ghi gha rrie ihe ọkpa kẹkan ne a na ga ni, u ghi gbe ohuan ruẹn ra ẹmila ruẹ ọkpa vbe vba ne u rri evbare Alagberra ya ye ọghọ ne Nọyaẹnmwa Osanobua rua.

³ Wa gha ra rri evbare na, wa ghẹ rri ebrẹd ne a ye eyist le. Wa ghi rri ebrẹd ne a ma ye eyist le la ikpẹdẹ ihinrọn, rhunmwuda ulẹ vbe okhian ọ re uwa ya lahin Igipt rre. Wa ghi rri ebrẹd na ne a gha tie ẹre evbare ọlọghọmwa, vbe ne a gha na miẹn wẹ vbe ẹdẹ agbọn uwa hia, te uwa gha ye rre, ẹdẹ ne uwa kpao vbe Igipt rre.

⁴ “A ghẹ gie a miẹn ọmwa ne ọ mwẹ eyist vbe owa vbe otọe uwa la ikpẹdẹ ihinrọn, a ghi gie a miẹn wẹ a rri ehia fo ighẹ emiowo ọghe aranmwẹ ne a gbe vbe ota ọghe ikpẹdẹ ne okaro nii, ọ te sẹ owiẹ ikpẹdẹ ne ọ lele ẹe.

^5-6 “Wa ghẹ gbe aranmwẹ Alagberra vbe uwu avbe ẹvbo ne Nọyaẹnmwa Osanobua uwa gha viọ ne uwa. Ehe ne a na ga ọkpa ọ re uwa gha na gha gbe ẹe, wa ghi vbe gbe ẹe vbe owẹn a defua nẹ, vbe odẹ ẹghẹ ne uwa ya kpao vbe Igipt rre zẹẹ.

⁷ Wa ghi lẹe, wa ghi vberriọ vbe ihe ọkpa ne a na ga nii, owiẹ ne ọ lelẹe, wa gha di owa ya.

⁸ Vbe ikpẹdẹ ehan ne ọ lele ẹe, wa ghi gha rri ebrẹd ne a ma ye eyist le, sokpan vbe ikpẹdẹ ne ogihinrọn, wa ghi si egbe koko ne a ru ugamwẹ ne Nọyaẹnmwa, wa ghẹ winna iwinna rhọkpa ẹdẹ nẹdẹrriọ.

Emwiukpo Akọrhọre

⁹ “Wa ghi ka uzọla ihinrọn ke ẹghẹ ne uwa ya suẹn gha rhọ ọka kpao,

¹⁰ wa ghi suẹn gha ru emwiukpo Akọrhọre vbene uwa gha na viọ izẹọhẹ akekhọerre rre ya ye ọghọ ne Nọyaẹnmwa Osanobua rua zẹ vbene u vbe miẹn afiangbe rhie sẹ vbe obọ ẹre.

¹¹ Gha ghọghọ vbe odaro Nọyaẹnmwa, wẹ kevbe avbe ivbi uẹ, kevbe eguọmwadia ruẹ, kevbe avbe e Livai, avbe ọrriọvbe, emọ ne ẹi mwẹ erha kevbe avbe ẹgbẹ ni rre owa ruẹ. Wa ghi ru ọna vbe ihe ọkpa ni ne a na ga ẹe.

¹² Yerre ighẹ eviẹn wa te gha khin vbe Igipt, rhunmwuda ọnii, wa ghẹ gia miẹn ighẹ wa ma ya avbe uhi na ru emwi.

Emwiukpo Irhu

¹³ “Wa ghẹ ghi rhọ ọka uwa fo nẹ, ighẹ wa vbe ru ẹmwẹ alimo fo nẹ, wa ghi ya ikpẹdẹ ihinrọn ru Emwiukpo Irhu.

¹⁴ Ke uwa kevbe ivbi uwa, eguọmwadia uwa kevbe avbe e Livai, avbe ọrriọvbe, emọ ne ẹ i mwẹ erha, kevbe avbe ẹgbẹ ni rre ẹvbo uwa, wa ghi gha ya oghọghọ ru ẹe.

¹⁵ “Wa ghi ru emwiukpo na la ikpẹdẹ ihinrọn ya ye ọghọ ne Nọyaẹnmwa vbe ihe ọkpa ne a na ga ẹe nii. U ghi gha sẹ ọyẹnmwẹ rhunmwuda ighẹ e Nọyaẹnmwa fiangbe emwiokọ ruẹ kevbe iwinna ruẹn.

¹⁶ “Ikpia ẹvbo ruẹ hia, igba eha vbe ukpo ọ re iran gha yo ihọkpa nii ne a na ga ẹe ya gha ga e Nọyaẹnmwa, ena ọ re Alagberra, Emwiukpo Akọrhọre kevbe Emwiukpo Irhu. Dọmwadẹ ọghe ọe ghi rhie ọhẹ gha dee.

¹⁷ Zẹ vbene obọ ọ re sẹ ọe zẹ vbene e Nọyaẹnmwa Osanobua vbe ya fiangbe ẹe.

Ẹmwẹ Ohiẹn Ne A Bu

¹⁸ “U ghi zẹ avbe ọbuohiẹn kevbe emwa iwinna vbe dọmwadẹ ẹvbo ne Nọyaẹnmwa Osanobua gha rhie ne uẹn. Iran na ghi gha bu ohiẹn emwa nii vbe ne a i na ghe ikpanro.

¹⁹ Wẹ ne iran ghẹ bu ohiẹn ne ẹ i re ẹmwata ra ne iran ghe ikpanro, iran ghẹ vbe miẹn ọmwa oko odieke rhunmwuda te oko odieke rhu emwa aro, uhin ke ọghe umẹwaẹn kevbe emwa ẹmwata, ọ ghi ya iran gha khiẹn ohiẹn bu.

²⁰ Ghẹ ru ọmwa khọ. Gha mudia ye ẹmwata ẹghẹ hia, ne uwa miẹn ehe na yin otọe ni ne Nọyaẹnmwa Osanobua rua mu ne uwa, ne uwa vbe gha yin ẹnrẹn khian.

²¹ “Wa gha gba aka ne Nọyaẹnmwa Osanobua rua, wa ghẹ vbe ba erhan ye ọkpẹn evba ne Asiẹrra ne ẹbọ nokhuo.

²² Wa ghẹ vbe kẹ orre iruẹbọ, te iran sọnnọ e Nọyaẹnmwa.