Diuteronomi 15 - Edo Bible (E Baibol Ẹdo) Version 1996

Ukpo Ne Ogihinrọn

¹ “Vbe ukpo ne ogihinrọn hia, wa ghi gha ya igho ne emwa rri uwa re ma iran.

² Vbene uwa gha ru ẹe hẹ ọ re ọna khin, ọmwaikọmwa ne ọ rhie igho ne ovbi Izrẹl ne ihua ẹre mọmọ. ọ ghi ya osa nii ma rẹn, ọ ghẹ vbe kha ighẹ rẹn iran miẹn igho nii rhunmwuda, e Nọyaẹnmwa tobọ ẹre ya osa nii ma rẹn nẹ.

³ “U sẹtin miẹn osa ne orhunmwuyẹn rriọ ẹre werriegbe sokpan ghẹ miẹn avbe osa ne emwa ruẹn rriọ ẹre werriegbe.

⁴ Ẹ Nọyaẹnmwa Osanobua ruẹ gha fiangbe uẹ vbe otọ ne ọ ra mu ne uwa, a i ra miẹn ovbiogue ọkpa vbe uwu emwa ruẹn.

⁵ A deghẹ wa họn ẹmwẹ nii ighẹ wa vbe ru avbe emwi hia ne I yi ẹre iyi ne uwa ẹrẹna,

⁶ e Nọyaẹnmwa gha fiangbe uwa zẹ vbene irẹn yan rẹn. Wa gha mu igho ne agbọn ẹvbo ni bun mọmọ sokpan, wa i ra miẹn ọmwa rhọkpa ẹre rhie mọmọ. Wa gha kha yan agbọn ẹvbo ni bun, sokpan agbọn ẹvbo rhọkpa ira kha yan uwa.

⁷ “A deghẹ a miẹn Izrẹl ne ihua nẹ i mwẹ vbe otọe nii ne Nọyaẹnmwa ra mu ne uẹn, ghẹ gie emwi da a ne a vbe miẹn wẹ u ma ye ọ re obọ.

⁸ Sokpan, gha zẹ emwi obọ ne u vbe rhie ne emwa mọmọ zẹ vbene ọ ho.

⁹ Ghẹ kha i ghẹ ui ghi rhie emwi ne ẹẹn mọmọ rhunmwuda ighẹ ukpo ne a na ya igho ma ọmwa i ghi rrei. Ghẹ gie iro dan vberriọ la ruẹ ekhọe. U gha he ne u rhie igho nii ne ẹẹn mọmọ, ọ gha viẹ yuẹ urhu ma e Nọyaẹnmwa, a ghi ka a ye ọmwa ne ọ rria abe.

¹⁰ U ghi rhie ne ẹẹn ọghe ọhẹ kevbe ne emwi i na vbe da ọmwa, e Nọyaẹnmwa gha vbe fiangbe uẹ vbe emwi ne u ru hia.

¹¹ Ẹghẹ hia ọ re a gha ya gha miẹn ivbi Izrẹl ni re ivbiogue ne ẹ i mwẹ emwi, rhunmwuda ọnii, I ye ẹre iyi ne uwa nian ne uwa gha zẹ emwi obọ ne iran.

Obọ Ne A Ya Mu Eviẹn

¹² “A deghẹ ovbi Izrẹl ne ihua, khiẹn egbe ẹre ọviẹn ne uẹn, ọ re okpia ra okhuo nọ, ọ gha ghi ga a la ukpo ehan nẹ, u ghi gie ẹe gha rrie. Ukpo ne ogihinrọn gha gba, u ghi gie ẹe gha rrie ọghe ọhẹ.

¹³ U gha vbe faẹn fua, ghẹ gie ẹe fiabọ gha rrie.

¹⁴ U ghi ya ne ẹẹn sẹ ọkẹn vbe uwu emwi ne Nọyaẹnmwa ya fiangbe uẹ, ohuan, ọka kevbe ayọn.

¹⁵ Wa ghi yerre wẹ, eviẹn wa gha a khin vbe Igipt, e Nọyaẹnmwa ne Osanobua uwa keghi fannọ uwa kua, ọna ọ si ẹe ne I na rhie uhi na ne uwa.

¹⁶ “Sokpan avbe eviẹn sẹtin kha ighẹ iran i rrie rhunmwuda, ọ ho ẹmwẹ ruẹn kevbe ẹgbẹe ruẹ, ẹko vbe vuọẹn.

¹⁷ Ẹghẹ nii, u ghi rhie ẹre gha rrie onurho owa ruẹ, u ghi ha ẹre ehọ vbe evba, ọ ghi gha re ọviẹn ruẹn vbe ẹdẹ agbọn rẹn hia. Erriọ u gha vbe ru avbe eviẹn ruẹn ne ikhuo.

¹⁸ Ghẹ gie egbe kan an vbu a fan ọviẹn fua, wẹ miẹn ọẹn wẹ ukpo ehan ọ re ọ ya ga a ye ukhiọnmwẹ igho ne u gha te hae ne ọmwa ne u rhie vbe iwinna kẹkan. Ru ọna, e Nọyaẹnmwa ne Osanobua ruẹ gha fiangbe uẹ vbe emwi ne u ru hia.

Emọ Ọdiọn Ọghe Ẹmila Kevbe Ohuan

¹⁹ “U ghi viọ emọ ọdiọn ọghe avbe ẹmila kevbe ohuan ruẹ ye efẹn ọkpa ne Nọyaẹnmwa Osanobua ruẹ. Ghẹ ye avbe ẹmila ni rrọọ winna, ghẹ gbe eto avbe ohuan ni rrọọ.

²⁰ Wẹ kevbe ẹgbẹe ruẹ ghi ya gha rri ọe ukpukpo vbe odaro e Nọyaẹnmwa vbe ehe ọkpa kẹkan nii ne a na ga ẹe.

²¹ Sokpan a deghẹ emwi irri nii mwẹ okan, deghẹ uke nọ ra te ọ rhu aro ra deghẹ ọ mwẹ ehe ne ọ mobọ ke ẹe yi ẹre re, ghẹ ya ẹe zọ ese ne Nọyaẹnmwa Osanobua ruẹ.

²² Wa sẹtin rri egbe aranmwẹ vberriọ vbe owa. Wa hia fẹẹrẹ, kevbe ne awua gue kevbe ne ẹ i gue sẹtin re vbọ, zẹ vbe ne uwa rri ẹrhuẹ ra uzo.

²³ Sokpan, wa ghẹ rri esagiẹn iran, wa ghi hihiẹ ọe ku otọe zẹ vbe amẹ.