Diuteronomi 14 - Edo Bible (E Baibol Ẹdo) Version 1996

Iruemwi Akhiẹ Ne A Wua

¹ “Emwa Nọyaẹnmwa Osanobua uwa ọ re uwa khin. Rhunmwuda onii, wa gha khiẹ emwa uwa nii wulo, wa ghẹ ya emwi solo egbe uwa ra ne uwa khiokhio eto ne ọ rre uwa uharo kua.

² Ọghe Nọyaẹnmwa Osanobua rua ore uwa khin, rhunmwuda te ọ hannọ uwa zẹ vbe uwu ẹbu emwa ni rre otọ agbọn hia ne uwa gha re ọghe irẹn.

Aranmwẹ Ne Awua Ke Ne A I Wua

³ “Wa ghẹ rri emwikemwi ne Nọyaẹnmwa khare wẹ ọ mwẹ awua.

⁴ Avbe aranmwẹ ne uwa gha re ọ re ena khin: ẹmila, ohuan, ẹwe.

⁵ Ẹrhuẹ, ohuan oha, ẹwe oha, kevbe uzo.

⁶ Aranmwẹ ke aranmwẹ ne ihiẹn ọnrẹn va ada kevbe ne ọ vbe hu evbare rre dọlegbe lue vbe unu.

⁷ Sokpan wa ghẹ rrie aranmwẹ rhọkpa vbe ẹ i re te ihiẹn ọnrẹn va ada ọna vba gha hu evbare rre dọlegbe lue vbe unu. Wa ghẹ rri ekẹtẹkẹtẹ, ezazako kevbe ọfiontọ, wa gha ka ena ba ni mwẹ awua. Iran hu evbare rre lue sokpan iran i mwẹ ihiẹn ne ọ va ada.

⁸ Wa ghẹ rrie esiebo, wa ka ẹe ye ne ọ mwẹ awua rhunmwuda iran rhe mwẹ ihiẹn ne ọ va ada, iran i hu evbare rre lue. Wa ghẹ rri avbe aranmwẹ na, a ma wẹ ne uwa ye obọ kan ikun iran vbe iran a wu nẹ.

⁹ “Wa sẹtin rri ehẹn ni mwẹ ikpakpa ni bolo kevbe ifuẹn ne ọ ya khuẹ,

¹⁰ sokpan emwikemwi ne ọ rre amẹ nẹ i mwẹ ikpakpa ne ọ bolo ra ifuẹn ne ọ ya khuẹ, wa ghẹ rri ọe, a ghi ka ẹe ye ne ọ mwẹ awua.

¹¹ Wa sẹtin rri ahianmwẹ ne a i wua hia.

^12-18 Sokpan avbe ahianmwẹ ne uwa i khian re ọ re ena khin: oghohọn, esughusughu, ahua, ẹghodin, ekperọkhuẹ, ugu, etitibiti, ugomugo, ekpẹkpẹyẹ ẹzẹ, ọlọkọmwọrhu, ukpomobiẹ, ukhiokhio, ukorobozo, e kuukuu, kevbe ẹguẹn.

¹⁹ “Avbe atete hia, a wua, ghẹ rri iran,

²⁰ U sẹtin rri emwi ni tin ne a i wua.

²¹ “Ghẹ rri aranmwẹ ne uwu ẹhi gbe. U sẹtin gie avbe erhunmwuyẹn ni rre ẹbu uwa rri ọe ra ne u khiẹn ọẹn ne avbe erhunmwuyẹn ọvbehe. Sokpan ọghe Nọyaẹnmwa Osanobua uwa ọ re uwa khin, emwa ẹnrẹn wa khin, ghẹ lẹ ovbi ohuan ra ovbi ẹwe vbe uwu ẹwẹn iye ẹe.

Uhi A Ghae Ye Ihigbe

²² “Rhie ọkpa vbe igbe ye otọ, obọ ọkpa vbe a ghae emwiokọ ne u miẹn vbe ugbo ruẹ vbe ukpo ni hia ye ihe igbe.

²³ U ghi gha rrie ihe ọkpa nii ne Nọyaẹnmwa zẹe wẹ a gha na gha ga irẹn ne u ya sirra ẹre rrie ọkpa vbe uwu igbe ọghe ọka ruẹ ni kevbe ayọn kevbe ofigbọn ọliv kevbe emọ ọdiọn ọghe ẹmila kevbe ohuan ruẹn. U ghi ru ọna ne u miẹn ehe na ruẹ vbene a mu ohan e Nọyaẹnmwa Osanobua ruẹ hẹ ẹghẹ hia.

²⁴ A deghẹ ehe ne u ye rrei ighẹ u i sẹtin viọ a ghae ye ihe igbe emwi okọ ne Nọyaẹnmwa ya fiangbe uẹ ọwuẹ gha rrie ehe ne a na ga ni, emwi ne u gha ru ọre ọna khin:

²⁵ Khiẹn nẹ avbe emwi okọ ruẹ ne u rhie igho ẹre mwẹ obọ gha rrie ehe ne a na ga.

²⁶ U ghi lo ẹre ye emwi ne ọ rhirhi khọn ruẹn emiowo, ẹmila, ovbi ohuan, ayọn ebiẹ, vbe evba nii zẹ, wẹ kevbe emwa ẹgbẹe ruẹ ghi rri evbare vbe odaro Nọyaẹnmwa Osanobua ruẹ, wa ghi vbe gha sẹ ọyẹnmwẹ.

²⁷ Sokpan, wa ghẹ mianmian ivbi e Livai ni rre ẹvbo rua. Iran imwẹ emwi obọ iran.

²⁸ Vbe ukpo ne ogieha hia, wa ghi viọ a ghae ye ihe igbe ọghe emwiokọ uwa hia ne uwa do si ẹe koko hin rre vbe ẹvbo uwa.

²⁹ Evbare na. ọghe avbe Livai nọ vbe ne a na miẹn wẹ iran imwẹ emwi obọ iran, kevbe avbe orhunmwuyẹn, emọ ne ẹ i mwẹ erha, kevbe avbe ẹgbẹ ni rre ẹvbo uwa. Iran ghi rre do gha viọ emwi ne iran imwẹ hia. Wa ghi ru ọna, e Nọyaẹnmwa Osanobua rua gha vbe fiangbe uwa vbe emwi ne uwa ru hia.