Diuteronomi 12 - Edo Bible (E Baibol Ẹdo) Version 1996

Ihe Ọkpa Kekan Ne A Na Ga

¹ “Banbanna nian, wa danmwẹ ehọ uhi ne uwa ra gha ya ru emwi vbe ẹghẹ ne uwa a rhirhi ya vbe otọe ne Nọyaẹnmwa Osanobua avbe erha uwa odede ra mu ne uwa.

² Ẹre ena khin. Vbe otọ ne uwa ra mu nii, wa dunmwu ehe hia ne emwa nii na gho ẹbọ, vbe oke ni yo, oke ne giẹrẹ kevbe ototọ avbe erhan ni mwẹ ebe ọgbọn.

³ Wa guọghọ aka iran sẹ otọ, ne uwa dunmwu orre okuta iruẹbọ iran rẹnkhẹnrẹnkhẹn. Wa ya erhẹn giẹn erhan iruẹbọ iran an, ne uwa wiẹn avbe amazẹ iran ye otọ sẹrriọ wẹ a i ghi dọlegbe gho iran vbe evba ẹdẹ.

⁴ “Wa ghẹ ga e Nọyaẹnmwa Osanobua uwa zẹ vbene iran na ya gho ẹbọ iran.

⁵ E Nọyaẹnmwa gha zẹ ihe ọkpa ne emwa gha na ga irẹn vbe otọe ọkpa vbe uwu avbe ẹwae uwa.

⁶ Evba wa gha na gha zọ ese uwa na gha giẹn uan, kevbe izọ ese ọwua nekpa, kevbe a ghae ye ihe igbe ọghe uwa kevbe izẹọhẹ uwa, emwi ihaoko ne uwa ve Nọyaẹnmwa ẹre, izẹọhẹ a ke ekhọe rre kevbe emọ ọdiọn ọghe ẹmila kevbe ohuan uwa.

⁷ Vbe evba nii, vbe odaro e Nọyaẹnmwa Osanobua uwa, ne ọ fiangbe uwa, wẹ kevbe ẹgbẹe ruẹ gha re, wa ghi gha ghọghọ rhunmwuda avbe emwi esi ne uwa miẹn ẹsọn yi.

⁸ “Ọ gha sẹ ẹghẹ nii nẹ, wa ghẹ ghi ru vbene uwa ka ru de yi do sẹ wanwan nian, dọmwadẹ ọghe ọe ọ re ọ ho vbene ọ khọnrẹn.

⁹ Rhunmwuda wa ma he la otọ ne Nọyaẹnmwa Osanobua ra mu ne uwa, ehe ne uwa gha na gha rrọọ vbe ọfumwegbe.

¹⁰ Wa gha fian Ẹzẹ Jọdan rra nẹ, e Nọyaẹnmwa gha gie uwa mu otọ nii ne uwa yin evba. Ọ gha degue uwa hin obọ avbe eghian uwa hia rre, ne uwa miẹn ehe na gha rrọọ vbe ọfumwegbe.

¹¹ E Nọyaẹnmwa gha zẹ ihe ọkpa kẹkan ne a gha na gha ga ẹe, evba wa gha na gha viọ avbe emwi hia ne I yi ẹre iyi ne uwa na gie ẹe, ese na giẹn uan ọwua, kevbe ese ọvbehe ne uwa gha zọọ, a ghae ye ihe igbe ọwua kevbe avbe izẹọhẹ kpataki ne uwa ve e Nọyaẹnmwa ẹre.

¹² Ẹghẹ nii wa gha ghọghọ vbe odaro ẹre, kevbe ivbi uwa kevbe ọguọmwadia uwa kevbe avbe Livai ni rre ẹvbo uwa, (yerre wẹ avbe Livai i khian gha mwẹ otọ obọ iran.)

¹³ Wa ghẹ gha zọ ese uwa vbe ehe ne ọ rhirhi khọn uwa,

¹⁴ sokpan wa ya zọ ẹre vbe ehe ne Nọyaẹnmwa gha zẹ vbe otọe ọkpa vbe avbe ẹwae uwa. Evba nii i ọkpa wa gha na gha zọ ese uwa ne a giẹn uan kevbe ne uwa vbe gha ru avbe emwi ọvbehe hia ne I tama uwa.

¹⁵ “Sokpan wa sẹtin gbe aranmwẹ uwa ne uwa rri ọe vbe ehe ne uwa a rhirhi gha ye. Wa sẹtin vbe rri avbe emwi hia ne Nọyaẹnmwa gha viọ ne uwa. Wa hia fẹẹrẹ, ne awua gue kevbe ne ẹ i gue sẹtin rri ọe. Zẹ vbene uwa gha vbe rri emiowo ẹrhuẹ ra uzo.

¹⁶ Sokpan wa ghẹ rri esagiẹn iran; wa ghi hihiẹ ọe ku otọ zẹ vbe amẹ.

¹⁷ Wa ghẹ rri a ghae ye ihe igbe ọghe ọka uwa, ayọn uwa, ra ofigbọn oliv uwa. Wa ghẹ rri emwikemwi ne uwa ya zẹ ọhẹ ne Nọyaẹnmwa vbe evba: ọmọ ọdiọn ẹmila uwa ra ohuan uwa, ra izẹ ọhẹ ne uwa ve ẹre re, izẹọhẹ akekhọerre ọ ghe uwa ra emwi ihaoko ọvbehe ne ọ rhirhi a gha khin.

¹⁸ Wa kevbe avbe ivbi uwa kevbe eguọmwadia uwa, kevbe avbe e Livai nii rre ẹvbo uwa, odaro Nọyaẹnmwa Osanobua uwa ọkpa ọ re uwa gha na gha rri ọe, vbe ihọkpa kẹkan ne a na ga nii, ne Nọyaẹnmwa ne Osanobua uwa zẹe re vbe evba ne u gie ẹko ruẹ vbe gha rhiẹnrhiẹn rhunmwuda emwi ọma ne Nọyaẹnmwa hẹ ne uwa.

¹⁹ Inu ẹghẹ ne uwa gha ya vbe otọe uwa, wa ghẹ mianmian avbe Livai.

²⁰ “E Nọyaẹnmwa ghẹ ghi fian ba otọ uwa nẹ zẹ vbene ọ khare ighẹ rẹn gha ru ẹe, wa sẹtin rri emiowo vbe ne ọ rhirhi khọn uwa.

²¹ A deghẹ ihọkpa ne a na ga nii rrei gbe; wa sẹtin gbe ẹmila uwa vbe uwu enii ne Nọyaẹnmwa hẹ ne uwa, zẹ vbene I ka khama uwa ne uwa gha rri emiowo vbe owa vbe ẹghẹikẹghẹ ne uwa a rhirhi ya gha ho.

²² Agbọn hia sẹtin re vbe emiowo nii, ọ mwẹ awua ra ẹ i mwẹ awua, zẹ vbene uwa gha rri emiowo ẹrhuẹ ra uzo.

²³ Emwi ọkpa nọ wẹ ne uwa ghẹ rri esagiẹn ọnrẹn vbe uwa a rri emiowo nii, rhunmwuda esagiẹn ọ re arrọọ ọghe ọe ye, wa ghẹ rri arrọọ ba emiowo.

²⁴ Wa ghẹ rri esagiẹn ọnrẹn, wa hihiẹ ọe ye otọ zẹ vbe amẹ.

²⁵ A deghẹ wa họn ẹmwẹ ne ẹn ẹko gha rhiẹnrhiẹn e Nọyaẹnmwa, agbọn ghi ma uwa kevbe avbe ivbi uwa.

²⁶ Wa ghi viọ emwi ihaoko uwa kevbe izẹọhẹ ne uwa ve Nọyaẹnmwa ẹre gha rrie ihe ọkpa ne a na ga.

²⁷ Wa ghi zọ ese ne a ra giẹn uan fo fẹẹrẹ vbe aka e Nọyaẹnmwa, kevbe ese ne a wẹ ne u hihiẹ esagiẹn ọnrẹn ye aka, ne u ya rri emiowo ẹre.

²⁸ Wa ya ẹkoata gha ru avbe emwi ne I tama uwa na, agbọn gha ma uwa ke ivbi uwa ẹdẹdẹmwẹdẹ rhunmwuda wa gha ru emwi ne o kere kevbe emwi ne ọ yẹ e Nọyaẹnmwa ne Osanobua rua.

A We Ne A Ghẹ Gho Ẹbọ

²⁹ “E Nọyaẹnmwa ne Osanobua rua gha fuẹn avbe ẹvbo nii hia zẹ vbene uwa ya gu iran gbinna vbe otọ iran, wa ghi mu ẹẹn, wa ghi yin ẹnrẹn.

³⁰ E Nọyaẹnmwa gha fuẹn avbe ẹvbo na an nẹ, wa gie a miẹn wẹ wa ma gha gho emwi ne iran gha gho rhunmwuda, uwu ọ re ọ ke ẹre ikian. Ghẹ vbe gha wọlọ otọ ẹre ne u miẹn ehe na rẹn vbene iran ya ga ẹbọ iran hẹ ne uwa miẹn ehe na vbe gho ẹre vbene iran ru.

³¹ Wa ghẹ ga e Nọyaẹnmwa Osanobua rua vbene iran ya gho ẹbọ iran, rhunmwuda, iran gha gho ẹbọ iran, iran ghi ru emwi osọnnọ hia ne ọ sọnnọ e Nọyaẹnmwa. Uhin ighẹ te iran ya ivbi iran zọ ese vbe uhunmwu aka iran.

³² “Wa ru emwi hia ne I tama uwa ne uwa ru, wa ghẹ fian yọ, wa ghẹ fian hin.