Diuteronomi 11 - Edo Bible (E Baibol Ẹdo) Version 1996

Ukpọlọmwẹ E Nọyaẹnmwa

¹ “Wa ho ẹmwẹ Nọyaẹnmwa Osanobua rua, ne uwa vbe gha ya uhi ẹre hia ru emwi.

² Wa yerre nian emwi ne uwa he ruẹ vbe kpa e Nọyaẹnmwa vbene aro uwa ghi he vbe miẹn emwi sẹ vbe ehe ne ọ ye. Wa ọ re aro ẹre sẹ avbe emwi na i ghẹ ẹ i re avbe ivbi uwa. Wa miẹn ukpọlọmwẹ e Nọyaẹnmwa kevbe ẹtin kevbe iwegbe ẹre.

³ Kevbe iwinna ọ yan unu uan ẹnrẹn. Wa miẹn emwi ne ọ ru ọba Igipt kevbe ẹvbo ẹre hia re.

⁴ Wa miẹn vbene Nọyaẹnmwa wa rẹnkhẹn ivbi iyokuo Igipt ruan fẹẹrẹ hẹ, ke ẹe kevbe ẹsin kevbe ikẹkẹ okuo iran, ne ọna ruẹn ehia amẹ vbe Okun Iranmwiran vbe iran khu uwa khian.

⁵ Wa rẹn emwi ne Nọyaẹnmwa ru ne uwa vbe uwu ato, wa te do sẹ emwa na.

⁶ Wa ye emwi ne ọ ru e Datan kevbe Abiram ne ovbi Eliab ne ẹwae Riubẹn rre. Otọ rhan unu, ọ keghi minọ iran re ke iran kevbe ẹgbẹe iran, owa ukpọn iran, kevbe eguọmwadia iran, kevbe emwirri iran.

⁷ Ẹn, wa na ọ re aro ẹre sẹ iwinna nekhua ne Nọyaẹnmwa winnaẹn.

Afiangbe Ni rre Otọe Eyan Nii

⁸ “Wa gha ya uhi hia ne I gbe ne uwa ẹrẹna ru emwi. Erriọ wa gha na sẹtin gberra ne uwa ya yin otọe nii ne uwa ghi ra lao na.

⁹ Wa gha vbe yin ẹnrẹn tọ ighẹ otọ esiesi ne ọ maa emwi okọ nii ne Nọyaẹnmwa ve ne irẹn mu ne avbe erha uwa odede kevbe ivbi iran.

¹⁰ Otọe ne uwa ra ya yin na, ẹi ye vbe otọ Igipt ne uwa ka gha ye yi. Vbe odọ nii, wa gha kọ ọka, wa ghi ya urriẹdẹ zẹlẹ uroramẹ lele ugbo nii.

¹¹ Sokpan otọ ne uwa ra lao na, otọ oke vbe ugboghodo nọ, otọ ne amẹ wa rhọ guagua ẹsẹse.

¹² E Nọyaẹnmwa Osanobua uwa ọ re ọ gbe aro ghe otọe na, ọ ghi vbe gha ba ẹe ne ukpo rhu.

¹³ “Rhunmwuda onii nian, wa ghi gha ya uhi ne I gbe ne uwa ẹrẹna gha ru emwi, onii nọ wẹ ne uwa gha ya ekhọe uwa hia ho ẹmwẹ Nọyaẹnmwa Osanobua rua kevbe ne uwa vbe ga ẹe vbe orhiọn ruan hia kevbe ẹko rua hia.

¹⁴ Wa gha ru vberriọ, ọ gha gie amẹ rhọ ye otọ uwa vbe ẹghẹ ne ọ khẹ ke, vbe ẹghẹ ahọ orhọ kevbe ahọ uyunmwu, ne uwa miẹn ehe na gha mwẹ ọka, ayọn kevbe ofigbọn ọliv.

¹⁵ Kevbe irunmwu ne ẹmila uwa, wa ghi vbe gha mwẹ evbare ne uwa ho hia.

¹⁶ Wa ghẹ gie a bibi uwa odẹ ne uwa ghẹ ya fi iyeke gbe Nọyaẹnmwa ya gha gho ne uwa vbe ya gha ga ẹbọ.

¹⁷ Wa gha ru vberriọ, e Nọyaẹnmwa gha mu ohu uwa. Ẹ i ghi gie amẹ rhọ ye otọ uwa, otọe uwa ghi do ka gbe, emwiokọ i ghi vbe zọ vbọ. Ẹghẹ nii ẹ i ghi sọn wa wulo vbe otọ esiesi nii ne ọ ra mu ne uwa.

¹⁸ “Wa ye avbe uhi na vuọn ekhọe kevbe orhiọn uwa, wa de ẹre ye ekuabọ uwa, ne uwa vbe gbae ye uharo ne uwa ya gha ye rre.

¹⁹ Wa ma avbe ivbi uwa ẹre. A ghi gha ta ẹe khian vbe owa, kevbe odẹ, vbe uwa a gha hẹwẹ kevbe uwa a gha winna.

²⁰ Wa gbẹnnẹ iran ye onurho owa uwa kevbe onurho ẹvbo uwa.

²¹ Ẹghẹ nii, wa kevbe avbe ivbi uwa ghi tọ vbe otọ ne Nọyaẹnmwa Osanobua uwa yan rẹn ne ọ mu ne avbe erha uwa odede, wa ghi gha rre evba, wa ghi vbe kpẹe vbọ sẹ vbene ọ gha kpẹe sẹ hẹ wẹ iso ye rre odukhunmwu otọe.

²² “Wa gha ya ekhọe hia ya iyi ne I yi ma uwa ru emwi. Wa gha ho ẹmwẹ Nọyaẹnmwa Osanobua rua, vbe emwi hia ne ọ khare, ne uwa gha re emwa ne ọ gba ẹko ẹre.

²³ Ẹghẹ nii rẹn gha khulo avbe okpẹvbo nii ladian, zẹ vbene uwa ya nana ghe odaro. Wa ghi vbe mu otọ okpẹvbo ni kpọlọ sẹẹ uwa ke ni vbe wegbe sẹ uwa.

²⁴ Otọe ne uwa a rhirhi ya owẹ khian la ghi khian ọghe uwa. Otọe uwa ghi ke ato ne ọ rre odẹ ekẹn ya sẹ Oke Lebanọn vbe odẹ okuọ kevbe ke Ẹzẹ Yufretes vbe odẹ ahọ ya sẹ Okun Meditẹrrenian vbe odẹ orrie.

²⁵ Ọmwa ọkpa ne ọ gha sẹtin gbe uwa odẹ, ẹ i rrọ. Ehe ne uwa arhirhi lao vbe otọe nii, e Nọyaẹnmwa gha ya emwa nii gha mu ohan uwa zẹ vbene irẹn khare.

²⁶ Ẹrẹna nian, te I wẹ ne uwa tobọ uwa zẹ vbọ, afiangbe ra ihẹn:

²⁷ afiangbe deghẹ wa ru vbene Nọyaẹnmwa Osanobua khare vbe uwu uhi ne I ra viọ ne uwa ẹrẹna,

²⁸ sokpan ihẹn a deghẹ wa ma ya avbe uhi na ruemwi, wa na fi iyeke werriẹ ne uwa ya gha ga avbe ẹbọ ọvbehe ne uwa ma he ka ga ẹdẹ.

²⁹ E Nọyaẹnmwa ghẹ ghi viọ uwa sẹ otọ ne uwa ra ya yin nẹ, u ghi ke uhunmwu Oke Gerizim na erhunmwu afiangbe nii, u ghi vbe ke uhunmwu Oke Ebal tie ihẹn na.

³⁰ (Oke eva na odẹ orrie ọghe Jọdan ọ re iran ye vbe otọe Kenan vbe Ugboghodo e Jọdan, odẹ orrie ọ re iran ye vbọ, iran ma rrei gbe vbe erhan iruẹbọ e Morẹ vbe ọkpẹn ẹvbo Gilgal.)

³¹ Te uwa ghi ra fian Ẹzẹ Jọdan rra na ne uwa yin otọe nii ne Nọyaẹnmwa Osanobua ra mu ne uwa. Wa ghẹ ghi mu ẹẹn nẹ ighẹ te uwa ghi gbẹkun sẹ otọ nẹ vbe evba.

³² Wa ghi gie a miẹn wẹ wa ya uhi hia ne I ra viọ ne uwa ẹrẹna ru emwi.