Diuteronomi 10 - Edo Bible (E Baibol Ẹdo) Version 1996

A Dọlegbe Viọ Uhi Ne Mosis

¹ “E Nọyaẹnmwa keghi tama mwẹ wẹẹ, ‘Ka uhanhan okuta eva ni vbe ye vbe ne okaro nii, ne u vbe ka ẹkpẹti ne a gha viọ iran yi. U ghi viọ iran bu mwẹ gha die uhunmwu oke.

² I gha vbe gbẹnnẹ emwi ne I gbẹnnẹ ye avbe ne u guọghọ ua nii yọ, u ghi viọ iran ye ẹkpẹti nii.’

³ “Ọre I na ya erhan akasia kan ẹkpẹti, I na ka uhanhan okuta eva zẹ vbene ne okaro gha ye, I na viọ hin uhunmwu oke.

⁴ E Nọyaẹnmwa keghi vbe gbẹnnẹ emwi ne ọ ka gbẹnnẹ ye ne okaro yọ, ọnii nọ wẹ avbe uhi igbigbe ne ọ viọ ne uwa ẹghẹ ne ọ na ke uwu erhẹn gha guan rre vbe uwa si egbe koko ye ọkpẹn oke. E Nọyaẹnmwa keghi viọ avbe uhanhan nii mẹ.

⁵ I keghi fi egbe werriẹ, I na tuorre vbe uhunmwu oke nii. I na viọ iran ye ẹkpẹti ne I kanrẹn nii zẹ vbene Nọyaẹnmwa tama mwẹ. Evba iran ye ke ẹghẹ nii gha dee.”

⁶ (Ivbi Izrẹl keghi kpao vbe uhae ivbi Jaakan rre, iran na gha rrie Mosera. Errọn keghi wu, a na re ẹre ye evba. Eliaza ne ovbi ẹre ke ghi rhie ihe ẹre zẹ vbe ohẹn.

⁷ Evba iran ke kpao gha rrie Godgoda, iran na vbe ke evba gha rrie Jobata, otọ ne amẹ na bun ẹsẹse.

⁸ E Nọyaẹnmwa keghi zẹ emwa ẹwae Livai, vbe uhunmwu oke nii, ne iran gha gbe aro ghe Ẹkpẹti Ile, kevbe ne iran vbe ga irẹn zẹ vbe ohẹn, kevbe ne iran vbe gha ya eni irẹn fiangbe emwa. Iwinna iran ọ re avbe emwi na ye khin.

⁹ Ọnii ọ siẹe ne a na ma gha otọ ne ẹwae Livai zẹ vbene ẹwae nekpa ye. Emwi ne ọ sẹ iran obọ ke gha re ukpo ohẹn zẹ vbene Nọyaẹnmwa Osanobua uwa yan rẹn.)

¹⁰ “I keghi ya avan iyeva kevbe asọn iyeva vbe uhunmwu oke nii, zẹ vbene I ka vbe ru vbe ẹghẹ okaro. E Nọyaẹnmwa keghi ye họn urhu mwẹ ọ na wẹ rẹn i ghi fuẹn uwa a.

¹¹ Ọ na ghi tama mwẹ ne I gha re ọkaolotu uwa ne uwa sẹtin ya mu otọe nii ne irẹn ve wẹ rẹn gha mu ne avbe erha uwa odede.

Emwi Ne Osanobua Nọrẹn

¹² “Banbanna nian, wa ne ivbi Izrẹl wa danmwẹ ehọ emwi ne Osanobua nọ rẹn vbe obọ uwa. Wa gha ye ekhọe uwa kevbe orhiọn uwa hia ho ẹmwẹ ọnrẹn, ne uwa vbe ya ẹe ga ẹe.

¹³ wa ghi vbe gha ye uhi ẹre hia ru emwi. Rhunmwuda ọma ne egbe uwa ọ re I na viọ iran ne uwa ẹrẹna.

¹⁴ “Ẹrinmwi ne ọ yo sẹ ehia, e Nọyaẹnmwa ọ re ọ yan rẹn. Rẹn ọ vbe yan agbọn kevbe emwi hia ni rre uwu ẹre.

¹⁵ Sokpan ahoẹmwọmwa ne Nọyaẹnmwa mwẹ ghe avbe erha uwa odede keghi tọn sẹrriọ wẹ rẹn rhie obọ gberra emwa ọvbehe hia, ọ na hannọ uwa zẹ, ẹmwata ena hia wa khin do sẹ ẹdẹnẹrẹ.

¹⁶ Rhunmwuda onii nian, wa gha họn ẹmwẹ ne Nọyaẹnmwa, wa dobọ iyienhọ yi.

¹⁷ E Nọyaẹnmwa Osanobua uwa kpọlọ sẹ ẹbọ hia kevbe ẹtin hia. Ọmwa ne ọ kpọlọ ne ọ mwẹ ẹtin rẹn khin, ọmwa ne ọ kere ne a gha mu ohan ẹnrẹn ẹsẹse. Ẹ i gbe ghe obọ okpa, ẹ i miẹn igho iyeke.

¹⁸ “Ọ gie a miẹn wẹ obọ esi ọ re ọ ya mu avbe udefiagbọn kevbe ẹgbẹe. Ọ ho ẹmwẹ avbe erhunmwuyẹn, ni rre uwu ima, ọ ghi vbe rhie evbare kevbe ukpọn ne iran.

¹⁹ Rhunmwuda ọnii, wa gha ho ẹmwẹ avbe erhunmwuyẹn nii, rhunmwuda, erhunmwuyẹn wa vbe khin vbe Igipt.

²⁰ Wa gha mu ohan e Nọyaẹnmwa Osanobua uwa, wa vbe gha ga irẹn ọkpa kẹkan. Wa gha re emwa ne ọ gba ẹko ẹre, ne uwa gha ya eni ẹnrẹn ọkpa kẹkan ru eyan uwa.

²¹ Wa gha rho ẹre, Osanobua rua nọ, aro uwa vbe sẹ emwi nọkhua kevbe ne ọ yan mwa unu uan ne ọ ru ne uwa.

²² Ẹghẹ ne avbe erha uwa odede na gha rrie Igipt, iran ekigbesiyenẹ kẹkan nọ. Sokpan, banbanna nian, e Nọyaẹnmwa ne Osanobua uwa ya uwa khian ni ghi bun zẹ vbe orhọnmwẹ ni rre aro iso.