Diuteronomi 1 - Edo Bible (E Baibol Ẹdo) Version 1996

Ẹmwẹ Omuhẹn

¹ Ẹmwẹ ni rre ebe na keghi re avbe ẹmwẹ ne Mosis gu ivbi Izrẹl guan ẹkpo ne iran na gha rre otọ ẹgbo vbe odẹ ahọ ọghe Ẹzẹ Jọdan. Iran kegha rre Iya ọghe Jọdan vbe ọkpẹn Suf, ẹvbo ne a tie ẹre Paran kegha rre iran obọ ọkpa, avbe ẹvbo ne a tie ẹre Tofẹl, Leban, Hazẹrot kevbe Dizahab kegha rre iran obọ nọkpa.

² (A gha la odẹ ẹvbo ne ọ rre uhunmwu oke ọghe Idọm, ikpẹdẹ owọrọ ọre a ya khian ke oke Sainai yasẹ Kedẹs Bania.)

³ Vbe ikpẹdẹ ne okaro ọghe uki ne ogiowọrọ vbe ọ rre ukpo iyeva ne iran ghi kpao vbe Igipt rre, e Mosis keghi talọ emwi hia ne Nọyaẹnmwa wẹ ne ọ tama emwa ni ma iran.

⁴ Ọna ke gha re iyeke vbe Nọyaẹnmwa ghi khọn Sihọn ne ọba Amọri ne ọ rriọba vbe Hesbọn nẹ, kevbe Ọg ne ọba Basian ne ọ rriọba vbe Astarrọt, kevbe Ẹdrẹi.

⁵ Emwa nii ghi rre odẹ ahọ Jọdan vbe otọe Moab, e Mosis keghi suẹn gha rhan otọ uhi kevbe iruẹmwi ọghe Nọyaẹnmwa.

⁶ Ọ keghi kha wẹẹ, “Ẹghẹ ne ima na gha rre Oke Sainai, e Nọyaẹnmwa Osanobua ima keghi tama ima wẹẹ, ‘Wa kpẹe sẹ nẹ vbe uhunmwu oke na.

⁷ Wa kuọ agọ uwa sẹ otọ, ne uwa si okhian sikẹ odaro. Wa gha rrie ẹvbo ni rre uhunmwu oke ọghe Amọri kevbe avbe ehe ne avbe ẹdogbo iran hia ye vbe odẹ iya Jọdan, odẹ ẹvbo uhunmwu oke kevbe ẹvbo ni rre ugboghodo, ghe odẹ ẹvbo ni rre odẹ ekẹn kevbe eghute Meditẹrrenian. Wa gha rrie otọe Kenan kevbe gberra Oke Lebanọn, rhinrin yasẹ Ẹzẹ nọkhua ighẹ Yufretes.

⁸ Ena ọrọre, otọ ne imẹ ne Nọyaẹnmwa yan rẹn wẹ I gha mu ne avbe erha uwa odede Ebraham, Aizik kevbe Jekọb, kevbe avbe ivbi iran, ọ re ena khin, wa gha khian ya yin ẹnrẹn.’ ”

E Mosis Zẹlẹ Avbe Ni Bu Ohiẹn

⁹ E Mosis keghi kha wẹẹ, “I tama uwa ẹghẹ nii wẹẹ, ‘Ihẹ ọghe ne a gha viọ uwa na khian khua mẹ gbe. Ẹtin imẹ ọkpa i sẹ ọe.

¹⁰ E Nọyaẹnmwa ne Osanobua uwa keghi gie uwa gha muan yọ zẹ vbe orhọnmwẹ ne aro iso.

¹¹ Te Nọyaẹnmwa ne Osanobua avbe erha uwa gha gie uwa gha muan yọ ukhukhu arriaisẹn, zẹ vbene irẹn yan rẹn, ne ọ vbe gie agbọn ma uwa!

¹² Sokpan vbe imẹ ọkpa ra sẹtin mu ẹmwẹ ohiẹn uwa ne a bu ọrhẹnrhẹn yan uhunmwu hẹ?

¹³ Wa zẹlẹ emwa eso ni wan an, ni mwẹ irẹnmwi, kevbe ni rẹn agbọn vbe uwu uwa kevbe dọmwadẹ ẹwae rre, I gha wẹ ne iran gha gbe aro ghe uwa.’

¹⁴ “Wa keghi kue yọ wẹẹ emwi esi ne ọ kere ne a ru nọ.

¹⁵ Ọre I na viọ emwa ni wan an, kevbe ni rẹn agbọn vbe uwu avbe ekaolotu uwa ne uwa zẹlẹe vbe ẹwae uwa, I na wẹ ne iran gha gbearoghe uwa. Eso kegha gbearoghe arhin arriaisẹn vbọ, eso iyisẹn, eso ekigbesiyeha, eso igbe. I keghi ye vbe zẹlẹ emwa ọvbehe eso ye ukpo vbe uwu avbe ẹwae nii hia.

¹⁶ Vbe ẹghẹ nii, I keghi rhie igiodẹ ne iran wẹẹ, ‘Wa gha danmwehọ imuaẹmwẹ ni rre uwu avbe emwa uwa. Wa ghi gha bu ohiẹn ẹmwata, ọ re emwa uwa ọkpa ọ re ẹzọ sunu na ra te ọ vbe dekan avbe orhunmwuyẹn ni rre uwa ẹvbo.

¹⁷ Wa ghẹ gbe ghe obọ ọkpa vbe uwa a bu ohiẹn hiehiere. Abọkpa nii wa ya gha bu ohiẹn hia, ọmwa ne ọ khọnrẹn wẹ ne ọ gha khin. Wa ghẹ mu ohan ọmwarhọkpa, rhunmwuda obọ Osanobua ọ re ohiẹn ne uwa bu ke rre. A deghẹ wa miẹn ohiẹn ne ọ wegbe sẹ uwa, wa ghi mu ẹẹn bu mwẹ gha dee ne I bu ẹre.’

¹⁸ Ẹghẹ ọkpa nii ọ re I vbe ya rhie igiodẹ ma uwa vbe emwi ọvbehe hia ne uwa mwẹ ne uwa ra gha ru.

Avbe Ọrhẹ Ne A Gie Ke Kedẹs Bania Gha Khian

¹⁹ “Ma keghi ru zẹ vbene Nọyaẹnmwa gie. Ma si kẹ oke Sainai kpao, ma na la ato nọkhua ne ọ mu ohan ne ọ rre odẹ ne a la ye ẹvbo oke emwa Amọri. Ma ghi sẹ Kedẹs Bania,

²⁰ I na tama uwa wẹẹ, ‘Wa sẹ ẹvbo oke ọghe emwa Amọri, ne Nọyaẹnmwa ne Osanobua ima mu ne ima nẹ nian.

²¹ Wa ghe, nene otọ ne Nọyaẹnmwa, ne Osanobua avbe erha uwa odede mu ne uwa ọre ọna khin, wa ya yin ẹnrẹn zẹ vbe ne ọ gie uwa, wa ghẹ gie ohan mu uwa, wa ghe; gie ẹtin fo uwa!’

²² “Sokpan, wa keghi bu mwẹ gha dee, do tama mwẹ wẹẹ, ‘Gie ima gie emwa ke odaro ima ne iran ya ghe otọe nii ghe, ne iran do tama mwa odẹ ne ọ maa sẹ na a gha la, ke egbe ore ẹvbo ni rre evba.’

²³ “Ọnii keghi wa ye vbe emwi ne ọ ma ne ọ kere ne a ru, ọ re I na hannọ arhin iweva, ọkpọkpa ke ẹwae ọkpọkpa rre.

²⁴ Iran kegha rrie ẹvbo uhunmwu oke yasẹ Iya Eskol, iran na ghe ẹre ghe.

²⁵ Iran keghi miẹn ọmọ erhan eso vba, iran na kọlọ eso bu ima gha dee, iran na do kha wẹ otọe ne Nọyaẹnmwa ne Osanobua mwa mu ne ima, otọe ne ọ ma emwi okọ ẹsẹse nọ.

²⁶ “Sokpan, wa keghi sọtẹ, wa ma họn ẹmwẹ e Nọyaẹnmwa ne Osanobua rua, wa ma ya la otọe ni.

²⁷ Wa na gha gui ẹzọ uwu unu wẹẹ, ‘E Nọyaẹnmwa khuiwu ima. Ọnii ọ sie ne ọ na viọ ima ke Igipt ladian ne ọ silo ima ku avbe emwa Amọri na obọ, ne iran gbele ima uan.

²⁸ Vbọzẹ ne ima gha na gha rrie evba. Ohan mu mwa. Emwa ne ima gie werriegbe rre do tama ima ighẹ emwa ni rre evba wegbe, iran kọnkọn sẹ ima. Iran wẹ ẹvbo ne a gbe ekẹn ne ọ yo sẹ iso gaa ọ re iran ye. Iran vbe miẹn avbe arhuanran vbe evba.’

²⁹ “Sokpan, I na tama uwa wẹẹ, ‘Wa ghẹ gie ohan emwa na mu uwa.

³⁰ Nọyaẹnmwa Osanobua rua gha ke odaro ne uwa, ọ gha vbe gbinna ne uwa vbene aro uwa vbe sọe ighẹ ọ ru ẹe vbe Igipt.

³¹ Kevbe uwu ato. Wa miẹn vbene ọ ya viọ uwa do sẹ emwa na hẹ ke odọ hia gha dee, zẹ vbene erha mu ovbi ẹre.’

³² Sokpan egbe ne I ya talọ ẹmwẹ na hia, wa ma ye mu ẹtin yan Nọyaẹnmwa.

³³ Ọmwa ne ọ gha ke odaro ne uwa vbe ẹghẹ hia ne ọ ya gha gualọ ehe ne uwa gha gbe agọ yi ye otọ khẹ uwa. Asọn gha rre, ọ ghi mu akpa orre erhẹn yọ ya ke odaro ne uwa, avan gha rre ọ ghi gha re orrẹ okuku amẹ, ne ọ miẹn ehe na ma uwa odẹ.

Osanobua Rri Ivbi Izrẹl Oya

³⁴ “E Nọyaẹnmwa ghi họn vbe uwa gui ẹzọ uwunu, ohu ke mu ẹẹn. Ọ na wa yan tae wẹẹ,

³⁵ ‘Wa ne orre dan na, ọkpa vbe uwu uwa ne ọ gha la otọ ne ọ ma emwi okọ ne I ve avbe erha uwa odede ẹre, ẹ i rrọọ.

³⁶ E Kelẹb ne ovbi e Jefunẹ ọkpa ọ re ọ gha larọ. Rẹn wa gu obọ mwẹ, otọe ne irẹn ya ghe ghe, I gha mu ẹẹn ne irẹn kevbe avbe ivbi ẹre.’

³⁷ Rhunmwuda uwa ọ ra Nọyaẹnmwa na vbe gha mu ohu mwẹ, ọ na wẹ, ‘Wẹ nene Mosis tobọ ruẹ, wẹ i ra vbe la otọe nii.

³⁸ Sokpan e Jọsua ne ovbi Nọn ne ọ yuẹ obọ gha sẹ ọe. U ghi rhie igiọdu ne Jọsua, ọ gha su ivbi Izrẹl ne iran ya yin otọe nii.’

³⁹ “Ẹre Nọyaẹnmwa na tama ima hia wẹẹ, ‘Ivbi uwa ne a miẹn wẹ ibiẹka ni ma rẹn emwi ne ọ maa hin e nẹ i maa rre, gha la otọ nii, emọ ne uwa khare ighẹ avbe eghian uwa gha munọ ẹre oghunmwu. I gha mu otọ ni ne iran, iran ghi yin ẹnrẹn.

⁴⁰ Sokpan wa na, wa fi egbe werriegbe ne uwa dọlegbe gha rrie uwu ato vbe odẹ Okun iranmwiran.’

⁴¹ “Wa keghi wanniẹn wẹẹ, ‘Mosis, ma ru orukhọ ghe Nọyaẹnmwa nẹ, sokpan ma gha ya gbinna zẹ vbene Nọyaẹnmwa Osanobua mwa khama ima.’ Ẹre dọmwadẹ ọghe ọe vbe uwu uwa na mu egbe igbinna, wa na te gha ro ighẹ ẹvbo uhunmwu oke ni i ra lọghọ ne a khọn.

⁴² “Sokpan e Nọyaẹnmwa tama mwẹ wẹẹ, ‘Tama iran ne iran ghẹ ya gbinna rhunmwuda mẹ i ra yaba iran, obọ eghian iran gha ke odukhunmwu ne iran.’

⁴³ I keghi vbe tama uwa vbene Nọyaẹnmwa kha hẹ, sokpan wa ma zẹ yọ, wa keghi sọtẹ ghe ẹre, wa na ye uhiomwẹ uwa khọn la avbe ẹvbo oke nii.

⁴⁴ Ẹre emwa Amọri ni rre avbe ẹvbo nii na vẹ rhu uwa vbe owọn, iran keghi zẹ uwa khu, ya sẹ Họma obọ iran na ke odukhunmwu ne uwa vbe evba vbe ẹvbo oke ọghe Idọm.

⁴⁵ Ẹre uwa ghi na da tie Nọyaẹnmwa ne ọ do yi uwa obọ, sokpan ọ ma danmwehọ uwa, ọ ma zẹ ye uwa re.

Ukpo Ne A Gbe Vbe Ato

⁴⁶ “Ọnii ọ siẹe ne ima na mudia kpẹe sẹrriọ vbe Kedẹs.