Daniẹl 7 - Edo Bible (E Baibol Ẹdo) Version 1996

E DANIẸL GIEE AVBE UMIAN NE O MIẸN ( 7:1—12:13 ) Umian Aranmwẹ oha Enẹ Ne Daniẹl Miẹn

¹ Vbe ukpo ne okaro ne Bẹlsiaza rriọba e Babilọn, I minaẹn, I keghi miẹn umian vbe asọn. I gbẹn imina nii yotọ, vbene I miẹn ọẹn.

² Emwi ne I miẹn vbe asọn nii ọna khin. Ẹhoho keghi hoho ke igienenẹ rre, ọ na ghi mu aro okun rueghe.

³ Aranmwẹ oha enẹ nekhua keghi ke uwu okun ladian, iran enenẹ keghi lughaẹn ne egbe.

⁴ Nokaro vbọ keghi yevbe oduma sokpan, ọ keghi mwẹ ifuẹn zẹvbe oghohọn. Ẹghẹ ne I na wa gha ghe ẹre nii, iran keghi yannọ ẹre ifuẹn kua. A keghi tọn aranmwẹ ni mu, a na mu ẹẹn mudia zẹvbe ọmwa. A keghi vbe rhie ekhọe ọmwa nagbọn ne ẹẹn.

⁵ Aranmwẹ ne ogieva keghi yevbe akpakomiza ne ọ ye owẹ odieke ẹre mudia, ọ keghi ye akọn khuaa ifẹnmwaguẹ eha mwẹ vbe unu. Urhu ọkpa keghi tama rẹn wẹẹ, “De yan rẹn, rri emiowo vbene ẹtin ruẹn sẹ ọe sẹ.”

⁶ Vbene I wa ye ghe ẹre nii, aranmwẹ ọvbehe keghi vbe ladian ọ yevbe ubidọn, sokpan ifuẹn enẹ ni yevbe ọghe ahianmwẹ kegha rre ọre ẹkpiyeke, ọ keghi vbe mwẹ uhunmwu enẹ. Aro ẹre vbe uhunmwu keghi yevbe ọghe ọmwa ne ọ mobọ mwẹ asẹ ẹsẹse.

⁷ Ehe ne I na ye ghe ẹre nii aranmwẹ ne ogienẹ keghi ladian ọ wa mwẹ ẹtin ne ọ mu ọmwa ohan, ọ gbe orrirri. Akọn ematọn ẹnrẹn ne lẹulẹu, ọ re ọ ya piẹn emwi ne ọ miẹn gbe, ọ ghi ya owẹ mama iran ginna otọ. Ọ keghi mwẹ igho igbe ne ọ ya lughaẹn ne avbe aranmwẹ nekpa.

⁸ Ehe ne I na ghe avbe igho ẹre nii, I keghi miẹn igho ọkpa tunnẹ, ọ kegha zọ ladian vbe adesẹneva iran nekpa, ọ keghi kpannọ eha kua vbe avbe igho ni ka gha rre evba. Igho na kegha mwẹ aro ọmwa nagbọn kevbe unu ne ọ wa yan dunmwu ẹgun.

Umian Ọmwa Ne Ọ Wa Rrọ Dee Ẹdẹdẹmwẹdẹ

⁹ Ehe ne I na ye ghe ẹre nii, a keghi munọ avbe ẹkete yotọ. Ọmwa nii ne ọ wa rrọ dee ẹdẹdẹmwẹdẹ keghi tota ye ọkpa vbe avbe ẹkete nii, ukpọn rẹn keghi fuọfua vbe isonorhọ, eto ẹre keghi yevbe ititi oru ne a ma gua. Ẹkete ẹre ni ne a mu yan emwi ne ọ lẹga vbe owẹ imọto erhẹn, keghi zẹ ogidi erhẹn kua.

¹⁰ Aranmwẹ erhẹn keghi ba kọe ladian. Arhunmwu arriaisẹn nibun kegha rre evba ne iran gha gae, arhunmwu arriaisẹn arriaisẹn nibun keghi mudia ye odaro ẹre. Iko ibuohiẹn nii keghi suẹn iwinna, a na we avbe ebe.

¹¹ Ehe ne I na ye ghe ẹre nii, I keghi ye gha họn urhu igho ne tunnẹ nii, ọ gha yanma, ọ gha rhuọ. Vbene I wa ghe ẹre nii, a keghi gbe aranmwẹ ne ogienẹ nii uan, a keghi mu ikun ẹnrẹn fi uwu erhẹn, ọ na gien uan.

¹² A keghi miẹn avbe aranmwẹ nekpa ẹtin ne iran te mwẹ sokpan, a keghi ye rhie omwa ẹghẹ ne iran, ne iran ya gha rre agbọn.

¹³ Vbe uwu u mian na vbe asọn nii, I keghi bẹghe emwi ọkpa ne ọ yevbe ọmwa. Ọ kegha bu mwẹ dee, okuku amẹ wa lẹga ẹre, ọ keghi bu ọmwa ne ọ wa rrọọ dee ẹdẹdẹmwẹdẹ nii, a na rhie ẹre ma rẹn.

¹⁴ A keghi rhie asẹ, uyi, kevbe ẹtin ọba nẹẹn, ne emwa uhunmwu ẹvbo hia, emwa, kevbe ẹvbo ne a zẹ, miẹn ehe na gha kpe gae. Asẹ ọre ghi gha rrọ rhinrin ẹdẹ, arriọba ẹre i vbe mwẹ ufomwẹ.

A Rhan Otọ Avbe Umian Nii

¹⁵ Ohan umian ne I miẹn keghi wa mu mwẹ, ọ keghi vbe mu mwẹ orhiọn rueghe ẹsẹse.

¹⁶ I keghi zẹẹ owẹ bu ọkpa vbe uwu iran ni mudia vbe evba, I na nọ rẹn wẹ ne ọ rhan otọ umian na ma mwẹ, rhunmwuda ọnii, ọ keghi ta emwi ne a ya ẹe kha ma mwẹ.

¹⁷ Ọ wẹẹ, “Avbe aranmwẹ ne lẹulẹu enẹ na kegha re arriọba enẹ ni gha guakpaọ vbe agbọn.

¹⁸ Emwa Osanobua ne ọ Sẹehia gha mwẹ ẹtin ọba iran ghi vbe dae yi ẹdẹdẹmwẹdẹ.”

¹⁹ I keghi gha ho ne I ye rẹn sayọ vbe ekpa aranmwẹ ne ogienẹ ne ọ lughaẹn ne nekpa, aranmwẹ ne ọ mu ohan nii, ọ ya ihiẹn oze ẹre, kevbe akọn ematọn ẹnrẹn piẹn emwi ne obọ ẹre vbare, ọ ghi ya owẹ mama ẹẹn ginna otọ.

²⁰ I keghi vbe gha ho ne I rẹn vbekpa igho igbe ne ọ rre ọre uhunmwu, kevbe unu ọkpa, ọ keghi wa vbe rhuọ orhuọ uhiomwẹ. Rẹn ọ re ọ wa mu ohan sẹ iran nekpa hia.

²¹ Ẹghẹ ne I na gha ghe ẹre, igho ni keghi mu okuo gie emwa Osanobua, ọ keghi khọn miẹn iran otọ.

²² Ẹre rẹn ni ne ọ wa rrọ ẹdẹdẹmwẹdẹ na rre, ọ keghi bu ase ne emwa Osanobua ne ọ Sẹehia. Ẹghẹ sẹe nẹ ne emwa Osanobua gha na gha mwẹ ẹtin ọba.

²³ Ewanniẹn ne ọ rhie mẹ ọ re ọna khin: “Aranmwẹ ne ogienẹ keghi re arriọba ogienẹ ne ọ ra rrie agbọn, ọ gha vbe lughaẹn ne avbe arriọba nekpa hia fẹẹrẹ. Ọ gha piẹn otọ agbọn na hia gbua, ọ ghi ya owẹ rrilo ẹe ginna otọ.

²⁴ Avbe igho igbe nii keghi re avbe ọba igbe ni gha rriọba vbe otọe arriọba nii. Iyekọnii, ọba ọvbehe gha vbe ladian, ọ gha wa lughaẹn ne nekpa hia ni kagha rre, ọ gha munọ avbe ọba eha gbotọ.

²⁵ Ọ gha ye ukpẹ sakan Osanobua ne ọ Sẹehia, ọ ghi gha khulo emwa Osanobua khian. Ọ gha ho ne ọ fi uhi ugamwẹ kevbe emwiukpo ne iran ru werriẹ. Emwa Osanobua ghi vbe gha rre ototọ ẹtin ẹnrẹn vbe ukpo eha vbe ukhiọnmwẹ.

²⁶ Vbe iyekọnii, iko ne ọ bu ohiẹn vbe ẹrinmwi ghi do iko, iran ghi miẹn ẹre ẹtin, iran ghi wa fuẹn ọnrẹn uan fẹẹrẹ.

²⁷ A gha mu ẹtin kevbe ukpọlọmwẹ ọghe avbe otọe arriọba agbọn hia ne emwa Osanobua ne ọ Sẹehia. Ẹtin ọba ne iran mwẹ i vbe fo ẹdẹ. Avbe iran ni khaemwisẹ vbe otọ agbọn hia gha ga, iran ghi vbe gha họn ẹmwẹ iran.”

²⁸ Ọna ọrọre ufomwẹ emwi ne I gbẹnnẹ yotọ. Ohan mu mwẹ sẹrriọ wẹ, I na wa luẹluẹ, I ma vbe tama ọmwarhọkpa.