Daniẹl 6 - Edo Bible (E Baibol Ẹdo) Version 1996

E Daniẹl Vbe Uwu Uvun Avbe Oduma

¹ E Dariọs keghi mwamwaẹn, ọ na zẹlẹ avbe gọvina iyehan ye ukpo vbe otọe arriọba ẹre.

² Ye vbe sẹẹ ọnii, ọ keghi zẹ e Daniẹl kevbe arhin eva ọvbehe ne iran gha gbearoghe avbe gọvina na, kevbe ne iran gha kan ukọ ọha.

³ Wanwanna, e Daniẹl rhie maa nẹ ighe rẹn guẹ iwinna sẹẹ iran ne eva ni dekẹe ra avbe gọvina nii. Rhunmwuda wẹ a i miẹn egbe irẹn, e Dariọs na zẹẹ ọe vbe iro wẹ rẹn wa mu otọe arriọba nii hia ne ẹẹn gha gbearoghe.

⁴ Rhunmwuda ọnii, avbe iran ni su ẹvbo nekpa kevbe avbe gọvina kegha gualọ ehe ne iran gha na miẹn abakuru vbe odẹ ne Daniẹl ya gbearoghe otọe arriọba nii sokpan iran ma miẹn, rhunmwuda, ọmwa ne ọ gie a mu ẹtin yan ọ re Daniẹl khin, ọ ma vbe ru emwi ne ọ ma gba ọghe ogberhu.

⁵ Iran keghi gu egbe iran zẹ ọre iro wẹẹ, “Ma i miẹn emwi ọkpa ka ye Daniẹl owẹ ne a ya gu ẹe gui vbe ẹ i re emwi ne ọ laghe ẹmwẹ iyayi ẹre.”

⁶ Iran keghi rhunmwuda ọnii bu ọba gha khian, iran taa ma rẹn wẹẹ, “E Dariọs ne ọba, u gha tọ u kpẹre, Umogun.

⁷ Ma hia fẹẹrẹ ni rre asẹ vbe otọe ruẹ na, iran ni su ẹvbo, avbe gọvina, avbe edayi e gọvina kevbe emwa ni rre ukpo nekpa, gba tae kugbe nẹ wẹ ne uwẹ ne ọba yi iyi, ne u vbe miẹn wẹ a wa kakabọ mu ẹẹn sẹ, yi ẹre iyi wẹ vbe uwu ikpẹdẹ ọgban, ne ọmwaikọmwa, ghẹ nọ emwikemwi vbe obọ ẹbọikẹbọ vbe ẹ i re vbe obọ uwẹ ne Umogun. Ọmwaikọmwa ne ọ rra iyi na, a ghi ya fi ẹe fi uwu uvun ne ọ vuọn ne oduma.

⁸ Rhunmwuda ọnii, Umogun gha yi iyi na ne ọ rhie obọ ye ebe ne a gbẹn ọẹn yi, a ghi gha lo ẹre ọ ghi gha re uhi ivbi e Medis kevbe Pẹsia ne a i fiwerriẹ.”

⁹ E Dariọs ne ọba keghi gele rhie obọ ye ebe nii.

¹⁰ E Daniẹl ghi họn ighe a rhie obọ ye ebe nii nẹ, ọ kegha rrie owa. Vbe owa egedege ne ọ ye, avbe ewindo eso ni viọ aro da e Jerusalẹm keghi rrọọ. Zẹ vbene ọ ka ru ẹe de yi, evba nii ọ re ọ na gha diguẹ vbe ewindo ne a kiere nii, ọ na gha na erhunmwu ghe Osanobua igbaeha vbe ẹdẹ.

¹¹ Ugbẹn vbe avbe eghian Daniẹl ghi miẹn ọẹn vbe ọ na erhunmwu ghe Osanobua.

¹² Iran hia keghi koko gha khian ya gu e Daniẹl gui. Iran wẹẹ, “U gha tọ u kpẹre Umogun, wẹ ọ re ọ rhie obọ ye ebe iyi ne ọ khare wẹ ọ te ya sẹ ikpẹdẹ ọgban ọmwaikọmwa ne ọ nọ ẹbọ ọvbehe ra ọmwa ọvbehe rhọkpa emwi vbe ọ gberra uwẹ, a gha fi ọmwa ni fi uwu uvun ne a viọ avbe oduma vuọn.” Ọba keghi wanniẹn wẹẹ, “Ẹmwata nọ, ọnii ọrọre uhi ni zẹ vbe uhi ivbi Medis kevbe Pẹsia ne ẹ i fiwerriẹ.”

¹³ Iran keghi wanniẹn tama ọba wẹẹ. “E Daniẹl ne ọkpa vbe avbe ivbi e Juda ni rre iwe, i zẹdẹ da ne uwẹ, Umogun ra ne ọ vbe gha ya iyi ne uwẹ yi ru emwi. Ẹ i gbe erhunmwu ne a na igba eha vbe ẹdẹ re.”

¹⁴ Ugbẹn vbe ọba họn ẹmwẹ na, ekhọe ẹre ma ghi sotọ, ọ keghi hia ne ọ gualọ odẹikodẹ ne ọ gha la fan e Daniẹl yotọ. Ọ keghi gha gualọ odẹ rhinrin ya sẹ ẹghẹ ne owẹn na defua.

¹⁵ Ẹre avbe emwa nii na bu ọba gha dee, iran tama rẹn wẹẹ, “U gha tọ u kpẹre Umogun, u rẹnrẹn wẹ zẹ vbene uhi ivbi e Medis kevbe Pẹsia khare, iyi ne ọba yii, a i fi ẹe werriẹ.”

¹⁶ Ẹre ọba ghi na wẹ ne a ya mu e Daniẹl fi uwu uvun ne a viọ avbe oduma vuọn ni. Ọ keghi tama e Daniẹl wẹẹ, “Te Osanobua ni ne u ye ekhọe ruẹ hia ga vberriọ gha miẹn ruẹn fan o.”

¹⁷ A keghi werriẹ okuta rhu unu uvun nii, ọba keghi yi ama asẹ ọghọe, kevbe ama asẹ ọghe avbe ekhaẹmwẹ ọnrẹn ye okuta nii zẹ vbene a gha na miẹn wẹ ọmwa ne ọ gha sẹtin ya fan e Daniẹl ẹ i rrọọ.

¹⁸ Ọba keghi werriegbe gha rrie ẹguae ẹre, ọ ma miẹn ovbe, ọ ma re, ọ ma da, ọ ma ku ọ ma giẹ vbe asọn nii hia.

¹⁹ Vbe owiẹ vbirrivbirri, ọba keghi zẹgiẹgiẹ kpaegbe ọ na gha rrie ehe ne uvun nii ye.

²⁰ Ọ ghi sẹ evba nii, ọ keghi ye udu ne ọ ha ọka da tu wẹẹ, “E Daniẹl ọguọmwadia Osanobua ne ọ rrọọ. Osanobua nii ne u ya ekhọe hia gha sẹtin miẹn ruẹn fan vbe obọ avbe oduma ra?”

²¹ E Daniẹl keghi wanniẹn wẹẹ, “U gha tọ u kpẹre, Umogun.

²² Osanobua giee odibo ẹre rre do ya obọ guee avbe oduma unu ne iran ghẹ sẹtin ru mwẹ emwi rhọkpa. Ọ ru ẹe vberriọ rhunmwuda ọ rẹnrẹn wẹ, I ma rẹn ọkpa, I ma rẹn eva, kevbe wẹ, I ma fidọn ghe ruẹ Umogun.”

²³ Ọba keghi ghọghọ ua, ọ na wẹ ne a si e Daniẹl ladian vbe uvun. Iran keghi siẹe ladian, iran miẹn wẹ emwirhọkpa ma ru ẹe hiehiere, rhunmwuda, ọ mu ẹtin yan Osanobua.

²⁴ Ẹre ọba na wẹ ne a munọ avbe emwa ni do gu e Daniẹl gui. Ọ na wẹ ne a viọ iran ku uwu uvun avbe oduma nii, ke iran kevbe avbe amwẹ iran kevbe ivbi iran. Vbe iran te sẹ otọe vbe uvun nii, avbe oduma guaa iran rhie nẹ, iran keghi gbẹn iran ugboloko hia.

²⁵ Ẹre Dariọs ne ọba na gbẹnnẹ ebe gie emwa ni rre uhunmwu ẹvbo hia, emwa ughughan kevbe ẹvbo ne a zẹ ni rre otọ agbọn wẹẹ, “I giotuẹ uwa hia!

²⁶ I yii ẹre iyi wẹ la ehe ne otọ arriọba mwẹ sẹe, ehe ne ọ rhanmwẹ, o kere ne emwa hia gha mu ohan ne a vbe gha ya ọghọ ne Osanobua e Daniẹl. “Osanobua ne ọ rrọọ nọ, te ọ khian gha khaemwisẹ ẹdẹdẹmwẹdẹ. A i sẹtin fuẹn arriọba ẹre ẹdẹdẹmwẹdẹ, ẹtin ẹnrẹn i vbe sẹ ufomwẹ ẹdẹdẹmwẹdẹ.

²⁷ Ọ miẹn ọmwa fan, ọ vbe fan ọmwa ye otọ ọ ru emwi vbe ẹrinmwi kevbe agbọn. Ọ miẹn Daniẹl fan ọ ma gie avbe oduma gbe ẹe re.”

²⁸ Agbọn keghi wa maa e Daniẹl vbe ẹghẹ ọba Dariọs kevbe ẹghẹ ọba e Sairọs ne ovbi e Pẹsia.