Daniẹl 5 - Edo Bible (E Baibol Ẹdo) Version 1996

Evbare Eghọ E Bẹlsiaza

¹ Ọ ghi sẹ asọn ọkpa, e Bẹlsiaza keghi giee ne a tie emwa ni sẹ ekpe arriaisẹn gha die evbare eghọ nọkhua. Iran hia keghi gba gha da ayọn.

² Ehe ne iran na da ayọn ni, e Bẹlsiaza na giee wẹ ne a ya viọ ukpu kevbe avbe ọkpan igoru ne Nebukiadneza ne erha ẹe viọ ke Ọgua Osa ne ọ rre Jerusalẹm rre gha dee. Ọba giee wẹ ne a viọ iran rre ne irẹn kevbe enigie ẹre, avbe amwẹ ọnrẹn kevbe avbe egbakhian rẹn miẹn ehe na ya gha da ayọn.

³ Vbe ọwarọkpa nii, a keghi gele viọ avbe ukpu kevbe ọkpan igoru ni rre, iran na ya gha da ayọn,

⁴ iran na gha go wan avbe ẹbọ ne a ya igoru, esiliva, oze, ematọn erhan, kevbe okuta ru.

⁵ Vbe udomwurri, obọ ọkpa keghi ladian, ọ keghi gha gbẹnnẹ emwi ye egbekẹn ẹguae ne a wiẹn rẹn nii, ehe ne a vbe ukpa ne a rhu lele enii na kakabọ baa ẹse. Ọba keghi vbe bẹghe vbe obọ nii gbẹnnẹ emwi.

⁶ Ọ keghi reghe aro ua vbe uhunmwu, ohan keghi muẹn sẹrriọ wẹ igbọn rẹn kegha de gbe egbe.

⁷ Ọ keghi datuu wẹ ne a bu avbe ebo edunna yo, avbe azẹn kevbe avbe iwe uki. Iran ghi rre nẹ, ọba tama iran wẹẹ, “Ọmwaikọmwa ne ọ sẹtin tie avbe emwi ne a gbẹnnẹ na, ọ na vbe tama mwẹ emwi ne a ya ẹe kha, a gha yọ ẹre ẹwu ododo ne ọba ya kie ugie, a gha mu igoru urhu ọghe uyi ye ọre urhu, ọ ghi gha re ọzukpogieha vbe otọe arriọba na.”

⁸ Avbe iguọbaziro na keghi rre, sokpan a ma miẹn ọkpa ne ọ sẹtin tie emwi ne a gbẹnnẹ nii ra ne ọ vbe tama ọba emwi ne a ya ẹe kha.

⁹ Vbene ọ ghi daa ẹe sẹ ighe emwi na, ọba Bẹlsiaza keghi dọlegbe gha kuagha, avbe ekhaẹmwẹ ọnrẹn ma ghi rẹn emwi ne iran gha ru.

¹⁰ Iye ọba keghi họọn owogho ne ọ ke ehe ne ọba kevbe avbe ekhaẹmwẹ ọnrẹn ye rre, ọ keghi la Ọgua ne iran na rrie evbare nii, ọ keghi kha wẹẹ, “U gha tọ u kpẹre Umogun, lahọ ghẹghi fian afianma ne u wa kuagha vbe nian.

¹¹ Arhiọnkpa rre otọe arriọba ruẹ na ne orhiọn avbe ẹrinmwi nihuanrẹn rre uwu ẹre. Ẹghẹ ne erha a na gha rre agbọn, okpia na wa rhie ma ighe rẹn mwẹ ẹwaẹn, irẹnmwi kevbe ẹdẹ ne ọ gbe vbe ẹko, zẹ vbene avbe ẹbọ ye. Erha a ighe Nebukiadneza ne ọba keghi maa ẹre ọkaolotu avbe ọbiro, ebo edunna, avbe azẹn keghi avbe iweuki.

¹² Ẹtin ughaẹn ọ re ọ wa gue ẹe, ẹwaẹn gba ne ẹẹn, ẹmwẹ imina ne a rhan otọ ẹre ẹmwẹ ibo ne a san, kevbe ẹmwẹ emwi ọkpaodin ne a rhan otọ ẹre. Rhunmwuda ọnii nian, gie ne a tie okpia na ne erha a he ẹre Bẹtẹsiaza, o gha tama ruẹn emwi ne a ya ena hia kha.”

E Daniẹl Rhan Otọ Emwi Ne A Gbẹnnẹ Nii

¹³ A keghi wa zẹgiẹgiẹ rhie Daniẹl do mudia ye odaro ọba, ọba keghi tama rẹn wẹẹ, “Wẹ ọrọre Daniẹl ra, ovbi e Hibru ne ọ rre iwe, ne erha mwẹ ighe ọba mu ke Juda gha die edinran ra?

¹⁴ I họẹn ighe orhiọn avbe ẹbọ nihuanrẹn guẹ kevbe wẹ u guẹ emwi ẹsẹse, u vbe mwẹ irẹnmwi kevbe ẹwaẹn.

¹⁵ A viọ avbe iran ni gu ọmwa zẹ iro gha dee ne iran do tie emwi ne a gbẹnnẹ na kevbe ne iran vbe ta emwi ne a ya ẹe kha, sokpan, iran ma rẹn emwi ne a ya ẹe kha.

¹⁶ Banbanna nian, a tama mwẹ ighe u sẹtin rẹn otọ emwi ni rhie egbe lẹre, u ghi vbe rhan otọ emwiọkpaodin, u gha sẹtin tie emwi ne a gbẹnnẹ na, u na vbe ta emwi ne a ya ẹe kha, a gha ya ukpọn ododo ne ọba ya kie ugie mu uẹn egbe, u ghi mu emwi urhu uyi ọghe igoru ye urhu, u ghi vbe gha re azukpogieha vbe otọe arriọba na.”

¹⁷ E Daniẹl keghi wanniẹn wẹẹ, “Viọ emwi ihaoko ruẹ ye owa, ra ya ẹe ne ọmwa ne ọ khọn ruẹn ọvbehe. I gha tie emwi ne a gbẹnnẹ na ma ruẹn Umogun, I ghi vbe ta emwi ne a ya ẹe kha ma ruẹn.

¹⁸ “Osanobua ne ọ Sẹehia ọ re ọ maa erha a ọba ighe Nebukiadneza, ọba nọkhua, ọ keghi vbe rhie ọghọ vbe ẹtin ne ẹẹn.

¹⁹ Ọ kpọlọ sẹ vberriọ wẹ emwa ẹvbo hia, emwa ughughan hia kevbe ẹvbo ne a zẹ hia, kegha muohan rẹn, iran kegha guọ ne ẹẹn. Ọ gha wẹ rẹn gha gbe ọmwa, ọ ghi gbe ẹe, ọ gha wẹ rẹn gha fan ọmwa, ọ ghi fan ẹẹn. Rẹn ọ re ọ mu ọghọ ye ọmwa egbe, rẹn ọ re ọ vbe fa ọmwa an vbene ọ khọn rẹn.

²⁰ Sokpan, ugbẹn vbe ọ ghi do ze vbudu, ọ na gha hioo, ọ na do gha ru emwi dan, a keghi sii ẹe hin ẹkete ẹre rre, uyi ne ọ rre ọre egbe keghi wii.

²¹ A khu ẹe ẹe fua hin uwu ẹbu emwa nagbọn rre, ekhọe ẹre keghi do gha yevbe ọghe aranmwẹ oha. Rẹn vbe avbe emẹ ọ re ọ ghi gba gha rre oha, ọ kegha rrii irunmwu zẹ vbe ẹmila, ọ keghi gha vbiẹ uwu oha vbene emwi rhọkpa i na vbe degue ẹre egbe ne evbu ghẹ rhọ yan rẹn. Vbe okiekie ọ keghi miẹn kue wẹ Osanobua ne ọ Sẹehia khaemwisẹ yan arriọba hia, ọ ghi vbe gha munọ iran ne emwa ne ọ khọn rẹn.

²² “Sokpan, wẹ ne ovbi ẹre ne ọ vbe rẹn avbe emwi na hia, u ma mu egbe rriotọ.

²³ U keghi ru emwi ne ẹ i yẹ e Nọyaẹnmwa ẹrinmwi, u keghi ya viọ avbe ukpu kevbe avbe ọkpan ne a viọ ye Ọgua Osa. Wẹ kevbe avbe ekhaẹmwẹ ruẹn, avbe amwẹ ọn kevbe avbe egbakhian ruẹn kegha ya iran da ayọn, wa na gha go wan avbe ẹbọ ne a ya igoru esiliva, oze, ematọn, erhan kevbe okuta ru — avbe ẹbọ ni i bẹghe kevbe ni i họn ẹmwẹ kevbe ni i sẹtin ru emwi rhọkpa. Sokpan, wẹ ma da ne Osanobua ne ọ tae a deghẹ u gha rre agbọn ra u gha wu, kevbe ne ẹmwẹ emwi ne u ru hia rre ọre obọ.

²⁴ Ọnii ọ sii ẹe ne Osanobua na gie obọ rre ne ọ do gbẹnnẹ avbe ẹmwẹ na.

²⁵ “Emwi ne a gbẹnnẹ ọ re ena khin: ‘A kaa ẹe, a kaa ẹe, a kpaa ẹre ghe, a ghaa ẹre!’

²⁶ Emwi ne a yae kha ọ re ena khin: a kaa ẹe: Osanobua kaa ikpẹdẹ arriọba ruẹ nẹ, ọ na mu ufomwẹ yọ.

²⁷ A kpaa ẹre ghe: a kpaa ruẹ ghe vbe esike, a keghi miẹn wẹ u hogha gbe.

²⁸ A ghaa ẹre, a ghaa otọe arriọba ruẹ, a na viọ ne avbe Medis kevbe Pẹsia.”

²⁹ Vbe ọwarọkpa nii, e Bẹlsiaza keghi wẹ ne a vbe eguọmwadia ẹre yọ e Daniẹl ẹwu ododo ne ọba ya kie ugie, ne a mu emwiurhu igoru ọghe uyi ye ọre urhu, ọ keghi ya ẹe ru ọzukpogieha vbe otọe arriọba ẹre.

³⁰ Vbe asọn ọkpa nii, iran keghi gbe ẹe rua ighe Bẹlsiaza ne ọba e Babilọn.

³¹ E Dariọs ne ovbi e Mede ne ọ gha rre ukpo iyeha keghi ya ẹtin vbe iwegbe mu ẹkete ọba.