Daniẹl 4 - Edo Bible (E Baibol Ẹdo) Version 1996

Imina Ne Ogieva Ne Nebukiadneza Minaẹn

¹ E Nebukiadneza ne Ọba keghi gie uhunmwu na gie uhunmwu ẹvbo hia kevbe emwa kevbe ẹvbo ne a zẹ ni rre otọe agbọn hia wẹẹ, “I giotuẹ uwa.

² Wa danmwehọ iyẹn ọghe ama kevbe iwinna ọyunnuan ne Osanobua ne ọ Sẹehia rhie ma mwẹ.

³ “ ‘U miẹn vbe ọyunnuan ne Osanobua rhie ma mwa kpọlọ hẹ! U miẹn vbe avbe iwinna ọyunnuan rẹn ne ọ winna kọnkọn hẹ! Osanobua ọ re ọ khian gha re ọba ẹdẹdẹmwẹdẹ ọ gha rre asẹ ẹdẹ kevbe ẹdẹdẹmwẹdẹ.’

⁴ “Mẹ keghi wa gha rre ẹguae mwẹ vbene ẹkun na sẹ mwẹ otọ. I keghi miẹn ya gha ru ọwọrhọwọrhọ.

⁵ Sokpan, mẹ keghi mina imina ne ọ mu ohan, I keghi vbe miẹn umian ni kpan ọmwa udu vbe I vbiẹ.

⁶ I keghi gie ne a tie avbe iguọbaziro ni rre Babilọn hia ne iran do rhan otọ imina ne I minaẹn ma mwẹ.

⁷ Ẹre avbe ọbo hia, avbe ebo edunna hia, avbe azẹn kevbe avbe iwe uki, a na viọ ehia bu mwẹ gha dee, I na ta imina mwẹ ma iran; sokpan iran ma sẹtin rhan otọe ẹre.

⁸ Ẹghẹ nii ọ re Daniẹl ghi na rre. (Rẹn ọ re a vbe tie ẹre Bẹtẹsiaza zẹ vbe eni ne a he ẹre re gie ẹbọ mwẹ.) Orhiọn avbe ẹbọ nihuanrẹn rre uwu irẹn. I keghi ta imina ne I minaẹn ma rẹn wẹẹ:

⁹ Bẹtẹsiaza ne ogiọbo, mẹ rẹnrẹn wẹ orhiọn avbe ẹbọ nihuanrẹn rre uwu uwẹ kevbe wẹ, wẹ rẹn otọ avbe emwi ọkpaodin hia. Ọna ọrọre imina ne I minaẹn, ta emwi ne a yae kha ma mwẹ.

¹⁰ “Ugbẹn vbe I ghi vbiẹ, I keghi miẹn umian okperhan ọkpa vbe adesẹneva agbọn.

¹¹ Ọ keghi gha wanyọ wanyọ, ọ te do tan sẹ iso a na ghi vbe gha bẹghe ẹre vbe ehe hia vbe otọ agbọn.

¹² Ebe ẹre hia keghi gha mose, ọ keghi mọ gba uhunmwu hia sẹrriọ wẹ ọ gha sẹ otọe agbọn na hia re. Avbe aranmwẹ oha ghi do gha rhuẹ ye irhu ẹre, avbe ahianmwẹ kegha bọlọ oko ye abọ ẹre, a ma miẹn emwi ọkpa ne ẹ i ghi rri ọmọ rẹn.

¹³ Ugbẹn vbe I ghi wa mu ẹmwẹ umian na roro, I ghi ya ghe odibosa ọkpa tuorre ke iso dee ke irẹn kevbe aro ẹre ne ọ wa gba emwi hia.

¹⁴ Ọ keghi ya urhu ne ọ la datu wẹẹ, ‘Wa tọn erhan nii gbotọ ne uwa giagia ẹre abọ kua, wa khuọn ẹre ebe kua ne uwa duẹ avbe ọmọ rẹn kua. Wa khulo avbe aranmwẹ nii hin ototọ ẹre rre kevbe avbe ahianmwẹ nii hin abọ ẹre rre.

¹⁵ Sokpan, wa sẹ ut ukhunmwu ẹnrẹn rae ye otọ ne a ya ọgiọrọ ematọn kevbe oze rro ẹre. Wa sọrae ye uwu irunmwu vbe evba. “‘Wa gie evbu gha tuo yan ọmwa na, wa gie ẹe gha rre uwu ẹbu aranmwẹ oha kevbe irunmwu.

¹⁶ Vbe ukpo ihinrọn gbalaka, orhiọn ọghe ọmwa nagbọn i ra gha gue ẹe, gberra ekhọe aranmwẹ oha.

¹⁷ Vbene ọ khare ọnii khin ighe odibosa ne aro ẹre gba emwi hia nii. Rhunmwuda ọnii, wa gie emwa hia rẹn vbe ehe hia wẹ Osanobua ne ọ Sẹehia mwẹ ẹtin vbe uhunmwu avbe arriọba emwa nagbọn, kevbe wẹ ọ sẹtin munọ iran ne ọmwa ne ọ rhirhi khọn rẹn, uhin ya sẹ egbe ọmwa ne ẹ i mwẹ asa ne ọ gu agbọn ye.’ ”

¹⁸ E Nebukiadneza ne, ọba keghi kha wẹẹ, “Imina ne I minaẹn ọnii khin o Bẹtẹsiaza, banbanna nian, tama mwẹ emwi ne a ya ẹe kha. Ọkpa i rrọ ne ọ sẹtin ta ẹe ma mwẹ vbe uwu iran ni gunmwẹ ziro, sokpan wẹ gha sẹtin, rhunmwuda orhiọn avbe ẹbọ nihuanrẹn rre uwu uwẹ.”

E Daniẹl Rhaan Otọ Nene Imina

¹⁹ E Daniẹl ne a vbe tie ẹre Bẹtẹsiaza ghi họọn ẹmwẹ na, afianma keghi fian ẹn sẹ vberriọ wẹ ọ ma sẹtin ta ẹmwẹ rhọkpa. Ọba keghi tama rẹn wẹẹ, “Bẹtẹsiaza ghẹ gie imina na kevbe emwi ne a ya ẹe kha fian an afianma hiehiere.” E Bẹtẹsiaza keghi wanniẹn wẹẹ, “Umogun, ọ gha te yẹ mwẹ akpawẹ, imina na kevbe emwi ne a ya ẹe kha, eghian ruẹn ọ re a taa ẹe gie ighe ẹ i re uwẹ.

²⁰ Erhan nii ne ọ ya tan sẹ iso, ne emwa hia ke ehe hia bẹghe vbe otọ agbọn.

²¹ Ebe ẹre keghi wa gha mose, ọ mọẹn sẹrriọ wẹ ọ gha sẹ agbọn na hia re. Avbe aranmwẹ oha ghi ya gha rhuẹ ye ototọ irhu ẹre avbe ahianmwẹ keghi vbe gha bọlọ oko ye abọ ẹre.

²² “Umogun, wẹ ọrọre nene erhan nii ne ọ taẹn kevbe ne ọ dido. U kpọlọ sẹrriọ wẹ te u ghi sẹ iso, ẹtin ruẹn, te ọ tan obọ gba agbọn na hia.

²³ Ẹghẹ ne u na gha ghe ẹre Umogun, odibosa ọkpa keghi ke ẹrinmwi tuorre rre, ọ na do kha wẹẹ, ‘Wa tọn erhan nii gbotọ ne a fuẹn ọnrẹn uan, sokpan wa sẹ ut ukhunmwu ẹnrẹn rae yotọ. Ya ọgiọrọ ematọn kevbe oze gbalọ ẹe, ne uwa sẹ ọe rae ye uwu irunmwu vbe oha vbe evba. Wa gie evbu gha tuo yan okpia na, ne ọ gu avbe aranmwẹ oha gha rre evba vbe ukpo ihinrọn gbalaka.’

²⁴ “Emwi ne a ya ẹe kha ọ re ọnii khin Umogun, emwi ne Osanobua ne ọ Sẹehia khare ighe ọ gha sunu vbe egbe ruẹ ọ re ọna khin.

²⁵ A gha khu uwẹ fua hin uwu ẹbu emwa nagbọn rre, u gha ya deba avbe aranmwẹ oha gha rrọọ. U gha rri irunmwu zẹ vbe ẹmila la ukpo ihinrọn, u ghi gha vbiẹ adesẹ ore ehe ne evbu gha na gha tuo yan ruẹn. Ẹghẹ nii, u ghi do miẹnkue wẹ Osanobua ne ọ Sẹehia ọ re ọ khaemwisẹ yan arriọba agbọn na hia kevbe wẹ ọ sẹtin munọ iran ne ọmwa ne ọ rhirhi khọn rẹn.

²⁶ “Odibosa nii wẹ ne a sẹ ut ukhunmwu ẹnrẹn rae yotọ, ọnii rhie ma wẹ u gha ye do gha rre ọba vbe u gha ghi miẹnkue nẹ wẹ Osanobua ọ re ọ kha yan agbọn na hia.

²⁷ Rhunmwuda ọnii nian, Umogun, u ghi rhie ude ne I bu ruẹ re. Da obọ orukhọ ne a ru yi, gha ru emwi ne ọ kere, vbe gha tohan avbe ivbiogue. Ẹghẹ nii, agbọn ghi gha ma ruẹn khian.”

²⁸ Avbe emwi na hia keghi gele sunu vbe egbe Nebukiadneza ne ọba.

²⁹ Ọ ghi wa rre uki iweva, ugbẹn vbe ọ ghi gọlọ vbe odukhunmwu ẹguae ẹre ne ọ rre Babilọn,

³⁰ o keghi kha wẹẹ, “Ghe vbene Babilọn kpọlọ hẹ. Mẹ ọ re ọ bọọ ẹe ya ru igiogbe otọe mwẹ ne I ya rhie ma vbene ẹtin mwẹ kpọlọ sẹ hẹ kevbe iwegbe mwẹ, kevbe ẹtin ọba mwẹ.”

³¹ Ọ ma he guan avbe ẹmwẹ na fo vbe unu, vbe urhu ọkpa ke ẹrinmwi rre wẹẹ, “E Nebukiadneza ne ọba, danmwehọ mwẹ! A miẹn ruẹn ẹtin ọba ne u te mwẹ.

³² A gha khu uẹ hin ẹbu emwa nagbọn rre, ya gha deba avbe aranmwẹ oha khian, gha rri irunmwu zẹ vbe ẹmila vbe ukpo ihinrọn. Ẹghẹ nii u gha miẹn kue ighe Osanobua ne ọ Sẹehia mwẹ ẹtin vbe uhunmwu avbe arriọba otọ agbọn, kevbe wẹ ọ sẹtin munọ iran ne ọmwaikọmwa ne ọ khọn rẹn.”

³³ Ẹmwẹ nii keghi wa sẹẹ vbe ọwarọkpa nii. A keghi khu e Nebukiadneza hin uwu ẹbu emwa nagbọn rre, ọ kegha rrii irunmwu zẹ vbe ẹmila, evbu kegha rhuẹ yan rẹn, eto ẹre keghi sọn, ọ vba ifuẹn oghohọn vbe utanmwẹ, ihiẹn ọnrẹn keghi ye vbe ọghe avbe ahianmwẹ.

E Nebukiadneza Rho Osanobua

³⁴ Ọba keghi kha wẹẹ, “Ugbẹn vbe ukpo ihinrọn nii ghi ghaa nẹ, I keghi tọn aro mu ghe iso, ẹrherhe mwẹ keghi gba vbe uhunmwu. I keghi rho Osanobua ne ọ Sẹehia, I keghi rhie ọghọ kevbe uyi ne irẹn nii ne ọ rrọ ẹdẹdẹmwẹdẹ. “ ‘Rẹn gha rriọba ẹdẹdẹmwẹdẹ otọe arriọba ẹre gha rrọ etẹbitẹghori.

³⁵ Te irẹn ghe emwi ni rre agbọn na zẹ vbe emwi kẹkan avbe odibosa ni rre ẹrinmwi avbe emwa ni rre agbọn ototọ asẹ ọre ọ re ehia ye. Ọmwa i sẹtin gbodan ye iho ẹre ra ne a nọ rẹn wẹ vbe ọ ru na.’

³⁶ “Ẹrherhe mwẹ ghi gba nẹ vbe uhunmwu mwẹ, ẹtin ọba ne I mwẹ kevbe uyi ọghe arriọba mwẹ, a keghi dọlegbe viọ ehia mẹ. Avbe ekhaẹmwẹ mwẹ kevbe avbe enigie mwẹ keghi rhaan obọ miẹn mwẹ, a keghi dọlegbe mu ẹtin ọba mwẹ mẹ, ke ẹe kevbe uyi ne ọ kpọlọ sẹẹ ne ọ te ka rrọ yi.

³⁷ “Banbanna nian, mẹ ne Nebukiadneza rho ẹre, I ya ọghọ ne ẹẹn, I keghi vbe rhie uyi ne ẹẹn ighe Ọba Ẹrinmwi. Emwi hia ne ọ gbae kevbe ne ọ hẹnhẹn, ọghọe ọ re nọ. Ọ vbe sẹtin vbokho ọmwaikọmwa ne ọ tengbemu uhunmwu rriotọ.”