Daniẹl 3 - Edo Bible (E Baibol Ẹdo) Version 1996

E Nebukiadneza Wẹ Ne Emwa Hia Ya Uhunmwu Rhanmwẹ Otọ Ne Amazẹ Igoru

¹ E Nebukiadneza ne ọba keghi ya igoru ma amazẹ ne uyomwẹ ọnrẹn keve uvbẹmwẹ ọnrẹn re ibata ekigbesiyisẹn, ọ keghi mu ẹẹn ye otọe ne ọ rriẹe ọghe Dura vbe iyaẹvbo e Babilọn.

² Ọba keghi gie ne a tie avbe ekhaẹmwẹ ọnrẹn hia avbe ivbiọba, avbe e gọvina, akhọwa e gọvina, akọnmisina, olaza, enibuohiẹn ni wegbe, enibuohiẹn kẹkan kevbe avbe emwa ọvbehe ni ghi khaemwisẹ vbe otọe nii, ọ na wẹ ne iran hia gha die ehe ne a ra na kpe ga amazẹ na ne Nebukiadneza ne ọba maẹn.

³ Avbe emwa na hia ghi rre ne a do kpe gae, vbe iran hia ghi wa tẹn ye odaro amazẹ nii.

⁴ Avbiogbẹ keghi ya urhu ne ọ la datuu tama emwa wẹẹ, “Emwa ni ke dọmwadẹ otọe, ẹvbo ne a zẹ kevbe ẹwae rre.

⁵ Wa gha ghi họn vbe a kpe okpe, ẹgogo na lelẹe kevbe ighẹnghan, kevbe ukusẹ kevbe akpata, deba avbe emwi ọvbehe ne a ghi kpee hia. Wa gha wa họẹn vbe ọwarọkpa vbe ọ suẹnrẹn, wa ghi ghughẹrre ya uhunmwu rhanmwẹ otọ ne amazẹ ne ọba e Nebukiadneza maẹn.

⁶ Ọmwa ikọmwa ne ọ ma ghughẹrre ya uhunmwu rhanmwẹ otọ, a gha fiẹe fi uwu erhẹn vbe ọwarọkpa nii.”

⁷ Rhunmwuda ọnii iran ghi wa họn vbe a kpee emwi ọwarọkpa nii, avbe emwa ni ke avbe uhunmwu ẹvbo rre nii kevbe ẹwae kevbe ẹvbo ne a zẹ keghi wa ghughẹrre ya uhunmwu rhanmwẹ otọ ne amazẹ ne Nebukiadneza maẹn.

A Baa Avbe Ọse Daniẹl Eheha Ifi Ẹzọ

⁸ Ẹghẹ na nian, ivbi e Babilọn keghi miẹn ehe la la ivbi e Ju egbe.

⁹ Iran keghi ya tama e Nebukiadneza wẹẹ, “U gha tọ u kpẹre, Umogun.

¹⁰ Wẹ ne Umogun ọ re ọ tae wẹ a gha suẹn emwi gha kpee, emwa hia ghi ghughẹrre ya uhunmwu rhanmwẹ otọ, ne amazẹ igoru,

¹¹ kevbe wẹ ọmwaikọmwa ne ọ ma ghughẹrre ya uhunmwu rhanmwẹ otọ, te a ra fi ẹe fi uwu erhẹn.

¹² Ivbi e Ju eso rrọọ ne uwẹ viọ yọ ne ọ gha gbearoghe avbe otọe eso vbe Babilọn, iran na ọrọre Siedrak, Mesiak kevbe Abẹdnigo, iran na i zẹdẹ zẹ ye ẹmwẹ ne uwẹ ne ọba tae. Iran i gho avbe ẹbọ ruẹ amawẹ te iran ghi ra ya uhunmwu rhanmwẹ otọ ne amazẹ ne uwẹ maẹn.”

¹³ Ọba ghi họn ẹmwẹ na, ohu mu ẹẹn ẹsẹse ọ na wẹ ne a viọ iran eheha na bu irẹn gha dee.

¹⁴ Ọ tama iran wẹẹ, “E Siedrak, e Mesiak kevbe Abẹdnigo, ẹmwata gele nọ ra wẹ wa i gho ẹbọ mwẹ, wa ma vbe ya uhunmwu rhanmwẹ otọ ne amazẹ ne i mẹ maẹn?

¹⁵ Banbanna nian, wa gha ghi wa họn urhu avbe okpe, ẹgogo, ighẹnghan, akpata, kevbe avbe emwi ne a kpee ọvbehe, wa ghughẹrre ne u wa ya uhunmwu rhanmwẹ otọ ne amazẹ nii. Adeghẹ wa ma ru vberriọ, a gha wa viọ uwa ku uwu erhẹn ọwarọkpa nii, wa yayi we ẹbọ ọkpa rrọ ne ọ gha sẹtin miẹn uwa fan ra?”

¹⁶ E Siedrak, Mesiak kevbe Abẹdnigo keghi wanniẹn wẹẹ, “Ma i ra vbe zẹdẹ gha ta e ne unu ima Umogun.

¹⁷ Adeghẹ Osanobua ne ima ga gha sẹtin miẹn ima fan vbe erhẹn nii kevbe hin obọ ruẹ rre, ọ gha ru ẹe.

¹⁸ Sokpan, a deghẹ ọ ma ghi vbe ru vberriọ, u ghi rẹn nian Umogun wẹ ma i ra gho ẹbọ ruẹ, ma i ra vbe ya uhunmwu rhanmwẹ otọ ne amazẹ igoru ne u maẹn.”

A Buu Ohiẹn Uwu Gbe Avbe Ọse Daniẹl Eheha

¹⁹ Ẹre ohu na ghi wa kakabọ mu e Nebukiadneza, aro ẹre kegha kpannọ ugiọnmwẹ erhẹn rhunmwuda e Siedrak, e Mesiak kevbe Abẹdnigo. Ọ na ghi wẹ ne emwa rẹn koko erhẹn nii ne ọ ya ukhukhu ihinrọn sẹẹ vbene ọ te ka baa sẹ yi.

²⁰ Ọ na wẹ ne iran ni ghi wegbe sẹẹ vbe avbe ivbiyokuo irẹn gbalọ iran eheha na hẹ ku uwu erhẹn nii.

²¹ Rhunmwuda ọnii iran keghi gbalọ iran gbalọ ukpọn ne iran hẹẹ yọ hia, ẹwu ọkotọ, ẹwu ọkokhunmwu, erhu kevbe ehia, iran keghi hẹẹ iran ku uwu erhẹn ne ọ baa gidigidi nii.

²² Rhunmwuda ighe ọba ọ re ọ wẹ ne a kakabọ koko erhẹn nii ne ọ gha yo iso rre, aranmwẹ ọnrẹn keghi giẹẹn iran an ighe avbe ivbiyokuo ni ya hẹ iran ku uwu erhẹn nii.

²³ E Siedrak, Mesiak kevbe Abẹdnigo keghi kharha ku uwu erhẹn nii zẹ vbene a ya gbalọ iran nii.

²⁴ Vbe udomwurri, e Nebukiadneza keghi saan kpaegbe mudia vbe ọyunnuan. Ọ nọ avbe ekhaẹmwẹ ọnrẹn wẹẹ, “Ẹ i re arhin eha ma gbalọe hẹ ku uwu erhẹn nii?” Iran wanniẹn wẹẹ, “Erriọ nọ Umogun.” Rẹn keghi nọ wẹẹ,

²⁵ “Vbe a ghi na miẹn hẹ ighe arhin enẹ ọ re imẹ bẹghe ni khianyo khian rre vbe uwu erhẹn nii? A ma vbe gbalọ iran ọ ma vbe khọ wẹ emwirhọkpa ru iran hiehiere, nogienẹ vbe uwu iran yevbe ẹrinmwi.”

A Fannọ Iran Eheha Kua, A Viọ Iran Ye Ukpo Niyosẹ

²⁶ Ẹre Nebukiadneza na gha rrie onurho ehe ne ogidi erhẹn nii ye, ọ da tie iran wẹẹ, “E Siedrak! Mesiak! Abẹdnigo! Eguọmwadia Osanobua ne ọ kpọlọ Sẹehia! Wa ladian gha dee!” Iran keghi ladian vbe ọwarọkpa nii.

²⁷ Avbe iran ne ivbi ọba hia, avbe gọvina kevbe avbe akhọwa e gọvina, kevbe avbe ekhaẹmwẹ ọba nekpa hia, keghi vẹ rre gha ghe iran eheha na ne erhẹn nii ma giẹn. Eto iran ma vbe rara, ukpọn iran ma giẹn, ẹwia ighogho i vbe rre iran egbe.

²⁸ Ọba keghi kha wẹẹ, “Wa rho Osanobua e Siedrak, Mesiak kevbe Abẹdnigo! Ọ gie odibo ẹre gha dee ne ọ do miẹn iran ni gae kevbe ni muẹtinyan rẹn na fan. Iran fieghe uhunmwu ye iyi ne imẹ yi, iran keghi mu egbe ne iran gha ya wu, sẹẹ ne iran ghughẹrre ya uhunmwu rhanmwẹ otọ ne ẹbọ ọvbehe gberra Osanobua iran.

²⁹ “Banbanna nian, I tae wẹ adeghẹ a miẹn ovbi uhunmwu ẹvbo ọkpa ra emwa, ra ẹvbo ne a zẹ ne ọ ya ukpẹ sakan Osanobua e Siedrak, Mesiak, kevbe Abẹdnigo, te a ra yanghan ẹre obọ vbe owẹ hin egbe ẹre rre, a ghi ya owa ẹre khian otiku. Osanobua ọvbehe i rrọ ne ọ sẹtin miẹn ọmwa fan vbenian.”

³⁰ Ẹre ọba ghi na viọ Siedrak, Mesiak kevbe Abẹdnigo ye ukpo ne ọ vbe yo sẹ vbe otọe e Babilọn.