Daniẹl 12 - Edo Bible (E Baibol Ẹdo) Version 1996

Ẹghẹ Ufomwẹ

¹ Odibosa ne ọ yọ ukpọn eto ovbiohuẹ nii keghi kha wẹẹ, “Ọ ghẹ ghi sẹ ẹghẹ nii, e Maikẹl ne ọka odibosa ne ọ gbearoghe avbe emwa ruẹn gha yegbe ladian, ẹghẹ orueghe ghi rre, egbe ne ọ he khọrhiọn sẹẹ, ke ne a ya bu agbọn tua agbọn. Ọ gha sẹ ẹghẹ nii, avbe ivbi ẹvbo ruẹ ne a gbẹnnẹ eni ẹnrẹn ye ebe Osanobua, a gha miẹn iran fan.

² Nibun vbe uwu iran ni wulo nẹ, gha dọlegbe gha rre agbọn, eso gha wa gha rrọọ ẹdẹdẹmwẹdẹ, eso ghi gha re ne a faraa ẹdẹdẹmwẹdẹ.

³ Iran ne ọkaolotu ni wan ni rrọọ ghi gha fi wainwain zẹ vbe iso. Avbe emwa ni vbe ma emwa re ne iran gha ru emwi ne ọ gbae, gha fi wainwain zẹ vbe avbe orhọnmwẹ ni rre iso.”

⁴ Ọ keghi tama mwẹ wẹẹ, “Banbanna, e Daniẹl, gue ebe nii ne u gbae rhie hin rre ọ te ya sẹ ufomwẹ agbọn. Vbe uwu ẹghẹ na nian, emwa nibun gha wa mu ẹghẹ iran rhia, iran ghi gha hia ne iran rẹn otọ emwi ni sunu khian.”

⁵ Ẹghẹ nii, I keghi ya bẹghe vbe arhin eva mudia ye ọkpẹn ẹzẹ ọkpa vbe obọ ọkpọkpa.

⁶ Ọkpa vbe uwu iran keghi nọ odibosa ne ọ mudia ye odẹ uhunmwu ẹzẹ wẹẹ, “Vbe ọ gha kpee sẹhẹ avbe emwi ọyunnuan na hia ke do sẹ ufomwẹ?”

⁷ Odibosa nii keghi viọ obọ da iso, ọ keghi ye eni Osanobua etẹbitẹ yan. I keghi họn vbe ọ khare wẹẹ, “Ukpo eha vbe ukhiọnmwẹ khian gha nọ. Emwi na hia gha sunu fo nẹ a ke dobọ emwa Osanobua ne a zẹ kpokpo yi.”

⁸ I họọn ẹmwẹ ne ọ tae sokpan I ma rẹn emwi ne a yae kha. Rhunmwuda ọnii, I keghi nọ rẹn wẹẹ, “Sokpan, vbe ena hia ra ya sẹ ufomwẹ hẹ, enọwanrẹn?”

⁹ Rẹn keghi wanniẹn wẹẹ, “E Daniẹl te u gha do rrie, rhunmwuda, avbe ẹmwẹ na, a ma ho ne ọmwarhọkpa rẹn ẹmwẹ na, a ma ho ne ọmwarhọkpa rẹn ọnrẹn, te a vbe rhie ẹre lẹre ufomwẹ te do rre.

¹⁰ A gha ye emwa nibun khian nihuanrẹn. Iran ne emwa dan i ra rẹn otọ ẹre iran ghi ye gha ru emwi dan khian. Iran ni wan ọkpa ọ re ọ gha rẹn otọ ẹre.

¹¹ “Ke ẹghẹ ne a ya dobọ ese ẹdẹgbegbe yi, ọnii nọ wẹ ke ẹghẹ Ọkhọ Nọgborrirri gha dee, ikpẹdẹ ekigbesiyisẹn yan arria ehan (1,290) gha gberra.

¹² Afiangbe nọ ne iran ni gha mudia gbain ya sẹ ẹghẹ ne ikpẹdẹ, isẹnirrọvbe ikiọkhọe yan arria ehan (1,335) gha na gberra!

¹³ “Wẹ nẹ Daniẹl mu uhunmwu ke ọe ya sẹ ufomwẹ. Ẹghẹ nii, u gha wu, sokpan u gha rhiọrre ne a san ruẹn ẹse vbe ẹdẹ okiekie.”