Daniẹl 11 - Edo Bible (E Baibol Ẹdo) Version 1996

¹ “Rẹn ọ re a we ne ọ gha yọmwẹ obọ kevbe ne Ọ gha wan ga mwẹ.

² Ẹmwẹ ne I ra tama ruẹn na, ẹmwata nọ.” Odibosa nii keghi kha wẹẹ, “Ọba eha gha khaemwisẹ lele egbe vbe Pẹsia, ne ogienẹ gha vbe lele iran, rẹn na gha wa fe sẹẹ iran nekpa hia. Ẹghẹ ne ẹtin ẹnrẹn gha na wa kpọlọ sẹẹ, kene ẹfe ẹre gha na vbe bu sẹẹ, ogha si arriọba e Gris evẹn.

Otọe Arriọba Igipt Kevbe Siria

³ Ẹghẹ nii ọba ne asukpekhae gha la ẹkete, ọ ghi gha khaemwisẹ yan arriọba ne ọ kpọlọ ẹsẹse, ọ ghi vbe gha da gbe da mu.

⁴ Sokpan vbe ẹghẹ ne ẹtin ẹnrẹn gha na wa kpọlọ sẹẹ, arriọba ẹre gha zagha a, a ghi vbe gha ẹre ye ihe enẹ. Avbe ọba ne ẹ i re ivbi ẹre, gha rriọba vbe ihe ẹre, sokpan, iran i ra mwẹ ẹtin zẹ vbene irẹn gha mwẹ.

⁵ “Ọba Igipt gha wegbe, sokpan ọkpa vbe uwu avbe ọkaokuo ẹre gha wegbe sẹ irẹn, ọ ghi vbe gha khaemwisẹ yan arriọba ne ọ kpọlọ sẹẹ.

⁶ Ukpo eso ghẹ ghi gberra nẹ, ọba Igipt gha gu ọba e Siria rhie obọ ye ebe, ọ ghi vbe rhie ovbi ẹre ne okhuo ne ẹẹn rhie rọnmwẹ, sokpan, a gba re ọkpa na i ra tọ vbe otọ, rẹn ighe okhuo na, ọdọ ẹre, ovbi ẹre, kevbe avbe eguọmwadia ni lele ẹe gha khian, a gha gbele ehia a.

⁷ “Vbe ọ ma he kpẹe, vbe iyeke ọnii, ọkpa vbe uwu avbe etẹn okhuo na nikpia, gha rriọba ọ gha mu okuo gie ivbiyokuo e Siria ọ ghi la otọe iran, ọ ghi khọn miẹn iran otọ.

⁸ Ọ gha viọ amazẹ avbe ẹbọ iran gha rrie Igipt, deba avbe emwi ne a ya igoru kevbe esiliva ru ne a ya gho avbe ẹbọ nii.

⁹ Vbe iyeke ukpo nii ne igbinna i ghi na rrọọ, ọba e Siria gha mu okuo gha rrie Igipt, sokpan, a gha gbẹe werriegbe.

¹⁰ “Avbe ivbi ọba Igipt gha mu egbe okuo, ọ ghi vbe si ivbiyokuo, nibun koko. Ọkpa vbe uwu iran gha wa san mwẹ ladian zẹ vbe orogho amẹ ọ ghi ya gha gu ehe ne odin eghian ye gbinna.

¹¹ Ohu ghẹghi mu ẹẹn, ọba Igipt ghi mu okuo gie ọba e Siria, ọ ghi khọn munọ avbe ivbiyokuo ẹre ne ọrhẹnrhẹn nii.

¹² Rẹn gha ye akhọnmiotọ ẹre kevbe ubunmwẹ avbe ivbiyokuo ne ọ gbele rhuọ. Sokpan, ẹ i ra wa gha khọnmiotọ khian rhinrin.

¹³ “Ọba Siria gha werriegbe, ọ ghi si avbe ivbiyokuo ni bun sẹẹ ne ọ te ka mwẹ koko. Ọ ghẹghi sẹ ẹghẹ ne ọ kei yi, ọ ghi werriegbe viọ avbe ivbiyokuo nibun, ne a vbe viọ emwi igbinna esi na, mwẹ obọ gha dee.

¹⁴ Ọ ghẹghi sẹ ẹghẹ nii, emwa nibun gha sọtẹ ọba Igipt. Emwa ọkhọ eso vbe ẹvbo uwẹ, ne Daniẹl gha sọtẹ rhunmwuda umian ne iran miẹn sokpan, obọ ruẹ gha ke okhunmwu ne ọghe iran.

¹⁵ Ẹghẹ nii, ọba e Siria gha mu okuo yo ẹvbo ne a gbe odin ga, ọ ghi khọn iran. Ivbiyokuo Igipt i ra wa gha gbinna khian, orhiọn i ra vbe gha rre iran ne a wẹ ọ maa sẹ vbe uwu iran re.

¹⁶ Ivbi e Siria ni mu okuo rre gha ru iran zẹ vbene ọ khọn iran, vbe ne a i na wẹ ẹre vbe ọ ya de. Ọ gha mudia vbe Otọe Eyan nii ehia ghi wa gha rre ọre atataobọ.

¹⁷ “Ọba e Siria gha mu egbe okhian okuo urria, ọ ghi wa viọ ivbiyokuo ẹre hia mwẹ obọ. Debare, ọ gha ghi gha ho ne ọ fuẹn otọe arriọba oghian rẹn, ọ ghi kpe iku gie ẹe, ọ ghi rhie ovbi ẹre nokhuo ne ẹẹn rhie rọnmwẹ, sokpan, emwi ne ọ mwamwaẹn vbe ekhọe i ra gba.

¹⁸ Vbe iyeke ọnii, ọ gha mu okuo gie avbe ẹvbo ni rre ọkpẹn okun, ọ ghi khọn nibun vbọ miẹn iran otọ. Sokpan, ọkaolotu ne ọ re ọrriọvbe gha khọn miẹn irẹn otọ, ọ ghi dobọ uhiomwẹ ọnrẹn yi vbe ẹmwata, ọ gha gbe uhiomwẹ ọba e Siria ye ọre egbe.

¹⁹ Nene ọba ne a kha na gha werriegbe gha rrie ehe ne a gbe odin ga ọghe ẹvbo irẹn sokpan, a gha khọn miẹn ẹre otọ. ọghe irẹn ghi vbe fo ye evba.

²⁰ “Ọba ọvbehe gha vbe re lele ẹe, ne ọ gha vbe gie ọkaokuo ne ọ ya gha wọ emwa nii uhunmwu vbekpa igho uhunmwu ne a zẹ ne ọ miẹn ehe na viọ vuọn ẹfe ne ọ rre otọe arriọba ẹre. Sokpan, a gha gbe ọba nii vbe ọ ma he kpẹe, ẹ i ra gha re ne agbọn wa rẹn, ẹ i re vbe gha re vbe okuo.”

²¹ Odibosa nii keghi ye gha rhan otọ ẹre khian, ọ wẹẹ, “Ọba ọvbehe ne ọ ghẹ ghi re lele ẹe vbe Siria gha re ọmwa dan ne ọba ma khẹ ke hiehiere, sokpan, ọ gha rre vbe udomwurri, ọ gha ye ero vbe iwegbe tota ye ẹkete.

²² Ọmwaikọmwa ne ọ gbe odan ghe ẹre, ọ gha khọn rẹn ne ọ gha re Ogie Ohẹn Osanobua, a ghi wa ho ẹre bẹkun.

²³ Ọ gha ya iku ne a kpe gie ọmwa mu avbe uhunmwu ẹvbo ọvbehe ru, ọ ghi vbe gha wegbe yọ wegbe yọ, egbe ne a ya miẹn wẹ ovbi ẹvbo tuai ọ re irẹn rriọba yan.

²⁴ Ọ gha mu okuo gie iyaẹvbo ne ẹfe ye vbe a ma ro a ma kọ, ọ gha vbe ru egbe ne avbe ọba ni karo ma ru. Ọ gha ghae avbe ẹfe kevbe emwi ne ọ fu viọ ke okuo ne, ne avbe ekpayẹ ọre. Ọ gha ru emwamwa vbene irẹn gha ya khọn avbe ẹvbo ne a gbe odin ga hẹ, sokpan, ẹ i kpẹe ọghọe ke fo vbotọ.

²⁵ “Ọ gha ye udinmwẹ si ivbiyokuo nibun koko ne ọ mu okuo gie ọba Igipt. Ọnii ghi vbe mu egbe ne ọ ye ivbiyokuo ọgbẹgbẹ nọkhua gu ẹe gbinna. Sokpan, a gha rẹrẹ ọba Igipt, ẹtin ẹnrẹn i ra sẹ ọe.

²⁶ Iran ni sikẹ ọre sẹẹ vbe iran ni gu ẹe ziro gha mu ẹre agbọn rhiara. A gha gbele nibun vbe uwu ivbiyokuo ẹre, a gha ho ivbiyokuo ẹre bẹkun.

²⁷ Vbe iyeke ọnii, avbe ọba eveva na gha gba tota rrie evbare vbe eteburu ọkpa sokpan, emwamwa dan ọre ọ rre iran ekhọe, iran ghi gha ta ohoghe ma egbe. Obọ iran i ra sẹ emwi ne iran ho, rhunmwuda, ẹghẹ emwi nii ma he sẹ.

²⁸ Ọba e Siria gha viọ emwi ne ọ khọn viọ vbe okuo gha rrie owa, ọ ghi wa mu aro yọ wẹẹ ne irẹn kie ẹre ukpẹ ighe ẹmwẹ ugamwẹ ẹmwẹ Osanobua. Ọ gha da gbe da mu, ọ ghi vbe werriegbe gha rrie ẹvbo ẹre.

²⁹ “Ọ gha ghi kpẹe kherhe, ọ ghi dọlegbe mu okuo gha rrie Igipt, sokpan, emwi ughaẹn ọre ọ ghi ra sunu vbe ẹghẹ na.

³⁰ Emwa e Rom gha viọ okọ rre, ohan ghi mu ẹẹn. “Iyekọni, ohu ghi mu ẹẹn ọ ghi werriegbe, ọ ghi hia ne ọ fuọn ruan ighe ẹmwẹ ugamwẹ emwa Osanobua. Ọ ghi gha ye ude ne emwa ni mu ugamwẹ nii fua nẹ bu ẹre re ru emwi.

³¹ Eso vbe ivbiyokuo ẹre gha ru awua vbe uwu Ọgua Osa, iran gha dobọ izọese ẹdẹgbegbe yi, iran ghi mu ‘Emwikhọ Ugborrirri’ gbọọ.

³² Ọba nii gha ye ero viọ iran ni mu iyayi ni fua nẹ ba egbe, sokpan, iran ni lele Osanobua gha gu iran gbinna.

³³ Avbe ọkaolotu ni wan ọghe emwa nii, gha ma emwa ọvbehe nibun ẹwaẹn. Sokpan, vbe omwa ẹghẹ eso, iran gha gbele eso ua vbọ, a gha gien iran, iran ghi wulo, a gha do eso emwi viọ, a ghi munọ iran oghunmwu.

³⁴ Ẹghẹ ne a gha na gha gbele iran an nii, emwa Osanobua gha miẹn iyobọ kherhe, a gha rhe miẹn wẹ nibun vbe uwu iran ni deba irẹn mwẹ emwi obọ iran ne iran gualọ vbọ.

³⁵ A gha gbele eso ua vbe uwu iran ne ọkaolotu ni wan nii, sokpan, a gha la ekpa emwi vberriọ khue avbe emwa nii huan. Erriọ ọ re ọ na ra wa gha khian vbe otọ, ọ te do sẹ ufomwẹ, ẹghẹ ne Osanobua mwa mwa yọ.

³⁶ Ọba e Siria ghi gha da gbe da mu, ọ ghi gha rhuọ we rẹn kpọlọ sẹẹ avbe ẹbọ, kevbe wẹ rẹn sẹ Osanobua ne ọ kpọlọ Sẹehia. Ọ gha sẹtin gha ru avbe emwi na ọ te do sẹ ẹghẹ ne Osanobua gha ya rria ẹre ikhi. Osanobua gha ru zẹ vbene ọ mwamwaẹn zẹẹ.

³⁷ Ọba na gha yangbe ẹbọ ne iran ni karo ne ẹẹn ghoro. Kevbe avbe ẹbọ ne avbe ikhuo ho ẹmwẹ ọnrẹn. Vbe ẹmwata, te ọ ra yangbe avbe ẹbọ hia rhunmwuda, rẹn wẹ, rẹn kpọlọ sẹẹ iran hia.

³⁸ Ye ihe ọnọna, ọ gha ya ọghọ ne ẹbọ ne ọ sẹtin mu odin ẹvbo mwẹ ne ẹbe ghẹ rre. Ọ ghi ya igoru, esiliva kevbe avbe ikpẹrọnmwọ, kevbe emwi ihaoko ni ghan hia gha zẹ ọhẹ gie avbe ẹbọ ne avbe erha ẹe odede ma gho.

³⁹ Avbe emwa ni gho ẹbọ ẹrrẹe ọ re ọ khian viọ yọ ne iran gha gbearoghe odin ẹvbo ne ẹbe ghẹ rre. Ọ gha kakabọ ya ọghọ ne iran ni rhan obọ miẹn rẹn zẹ vbe ọmwa ne ọ khaemwisẹ yan iran, ọ ghi viọ iran ye ukpo ni yo. Ọ ghi gha otọ mu ne iran ya san iran ẹse.

⁴⁰ “Ẹghẹ ne a rhie ne ọba e Siria ghẹ ghi gba zẹẹ, ọba Igipt ghi mu okuo gie ẹe, ọba e Siria ghi vbe ya ẹtin ẹnrẹn hia gu ẹe gbinna, ọ ghi lo avbe ikẹkẹ okuo, avbe ẹsin kevbe avbe okọ. Ọ gha mu igbinna yo agbọn ẹvbo nibun, zẹ vbene uromwẹ ẹzẹ ru.

⁴¹ Ọ gha vbe mu okuo la Otọe Eyan nii ne arẹngbe. Ọ gha gbele arriaisẹn vbe ihe igbe nibun, sokpan avbe ẹvbo zẹ vbe Idọm, e Moab, kevbe ehe ne ọ ghi kẹe vbe Amọn, gha lẹ fe vbe obọ ẹre.

⁴² Ọ ghẹ ghi mu okuo gie avbe agbọn ẹvbo na hia nẹ, Igipt tobọ ẹre i ra vbe gha re ne a sẹrae.

⁴³ Ọ gha viọ emwi ẹfe Igipt ne a hẹ lẹre gha rrie, avbe igoru esiliva kevbe avbe emwi ighobioye nekpa ne ọ mwẹ. Ọ gha khọn Libya kevbe Sudan.

⁴⁴ Ẹghẹ ni, iyẹn ne ọ ke odẹ ahọ kevbe ekẹn rre, gha ye afianma fian ẹẹn, ọ ghi wa ye ọkpankpan gha gbinna, ọ ghi gbele emwa nibun.

⁴⁵ Ọ gha ya mu avbe owa ukpọn ọba ọghọe ne tẹgbẹẹ, ye ẹkpo okun kevbe oke nọkhua, ne a bọ Ọgua Osa yi sokpan, Ọ gha wu vbene ọmwa rhọkpa i ra na gha rre evba ne ọ gha yọre obọ.”