Daniẹl 10 - Edo Bible (E Baibol Ẹdo) Version 1996

Umian E Daniẹl Vbe Ọkpẹn Ẹzẹ Taigris

¹ Vbe ukpo ne ogieha ne Sairọs kegha re ọba Pẹsia, a keghi ya emwi eso gie uhunmwu wẹ ne a rhie ẹre ma e Daniẹl ne a vbe tie ẹre Bẹtẹsiaza. Uhunmwu ne a gie na, ẹmwata wa nọ, sokpan, ọ keghi lọghọ ẹsẹse ne a rẹn otọ ẹre, umian ọ re a na rhan otọ ẹre ma rẹn.

² Vbe ẹghẹ nii, I keghi ya izọla eha vbe aguẹ.

³ I ma rri evbare esi, I ma rri emiowo rhọkpa, I ma da ayọn, I ma salọ eto mwẹ vbe uzọla eha nii tedo gba gberra.

⁴ Vbe ikpẹdẹ eneyan ugie vbe uki ne okaro vbe ukpo, I keghi mudia ye ọkpen e Taigris ne Okpẹzẹ.

⁵ I ghi tọn aro mu, I keghi ya bẹghe ọmwa ọkpa ne ọ yọ ukpọn eto ovbiohuẹ, ọ keghi mu ugbẹkun igoru ne mose gba.

⁶ Ikinnegbe ẹre keghi fi wain wain vbe ẹrọnmwọ, aro ẹre keghi ye wainwain zẹ vbe ayan, aro ẹre kegha baa zẹ vbe erhẹn. Obọ ẹre kevbe owẹ ọre kegha fi wainwain zẹ vbe oze ne a kpe, urhu ẹre kegha ye vbe uvannọmwẹ emwa nibun ẹsẹse.

⁷ Mẹ ọkpa Ọ re ọ miẹn umian na. Emwa na ni gunmwẹ rre evba ma bẹghe emwi rhọkpa, sokpan iran runraẹn, iran keghi lẹẹ, iran na ya lẹre.

⁸ Mẹ ọkpa ọ re ọ ghi rre evba, I na gha ghe umian ọyunnuan na. Orhiọn ma ghi gha rrọ mwẹ re, aro mwẹ keghi fiwerriẹ sẹrriọ vbe uhunmwu wẹ, ọmwa ọkpa ne ọ gha ye rẹn mwẹ ighi rrọ.

⁹ I ghi họn urhu na, I keghi de fianmwẹ otọ, I ma ghi rẹn emwi ne a ru, I keghi mu aro rhu otọ.

¹⁰ Ẹghẹ nii, obọ ọkpa keghi da mwẹ yi, ọ tọn mwẹ mu ne I viọ igue kevbe obọ ye otọ, sokpan, I keghi ye gha guọ kpẹkpẹkpẹ.

¹¹ Odibosa keghi tama mwẹ wẹẹ, “E Daniẹl, Osanobua ho ẹmwẹ ruẹn, kpaegbe, gbe ehọ kotọ danmwehọ ẹmwẹ ne I ra tama ruẹn, te a gie mwẹ bu ruẹ gha dee.” Ọ ghi ta ẹmwẹ na nẹ, I keghi kpaegbe mudia, sokpan, I keghi ye gha guọ kpẹkpẹkpẹ.

¹² Ẹre irẹn na tama mwẹ wẹẹ, “E Daniẹl, ghẹ gie ohan muẹn Osanobua họọn erhunmwu ruẹn nẹ ke ikpẹdẹ ne u tae ighe u gha mu egbe ruẹ rriotọ ne u miẹn ehe na gha mwẹ irẹnmwi. Erhunmwu ne u na ọ re ọ ya mwẹ gha die emwa.

¹³ Odibosa ne ovbi ọba ne ọ re ọghe otọe arriọba e Pẹsia keghi mu aro igbinna da mwẹ la ikpẹdẹ ọkpa yan ugie, ẹre Maikẹl, ọkpa vbe uwu avbe ọka odibosa na gha dee do yọmwẹ obọ rhunmwuda mẹ ọkpa ọ re a ghi sẹrae ye Pẹsia vbe evba.

¹⁴ Te I rre do rhie ma ruẹn emwi ne ọ gha sunu vbe egbe emwa ruẹn ẹdẹnakhuẹ. Umian ọghe ẹdẹnakhuẹ ọ re ọna khin.”

¹⁵ Ọ ghi guaan ẹmwẹ na nẹ, mẹ keghi wa gha ghe otọ, I ma miẹn unu ya guan.

¹⁶ Ẹre odibosa ne ọ yevbe ọmwa, na nien obọ ẹre, ọ keghi ya kan mwẹ akhuarhamwunu, mẹ keghi tama rẹn wẹẹ, “Umian na wa wọọ mwẹ egbe sẹrriọ wẹ I i ghi sẹtin dobọ uguọmwẹ yi.

¹⁷ Te I yevbe ọviẹn ne ọ mudia ye odaro arowa ẹre. Vbe I a ghi ra sẹtin guẹ guan hẹ? Ẹtin i ghi rrọ mwẹ re, orhiọn ighi rrọ mwẹ re.”

¹⁸ Ọ keghi vbe dọlegbe ya obọ kanmwẹ, orhiọn keghi la mwẹ iwu.

¹⁹ Rẹn keghi tama mwẹ wẹẹ, “Osanobua ho ẹmwẹ ruẹn rhunmwuda ọnii, ghẹ gie emwi rhọkpa fian an afianma ra ne ọ muẹn orhiọn rueghe.” Ọ ghi ta ẹmwẹ na nẹ, orhiọn keghi dọlegbe la mwẹ iwu, I keghi kha wẹẹ. “Enọwanrẹn, ta ẹmwẹ ne u mwẹ ne u gha tama mwẹ ma mwẹ. U rhie orhiọn yọmwẹ iwu nẹ.”

^20-21 Rẹn keghi tama mwẹ wẹẹ, “U rẹn emwi ne ọ zẹe ne I na bu ruẹ gha dee ra? Te I rre do ma ruẹn emwi ne a gbẹnnẹ ye Ebe Ẹmwata. Banbanna nian, I gha werriegbe gha khian ne I ya gu odibosa ne ọ su Pẹsia gbinna. Vbe iyeke ọnii, odibosa ne ọ su e Gris gha rre. Ọmwa ọvbehe i rrọ ne ọ gha yọmwẹ obọ gberra e Maikẹl ne odibosa ne ọ su Izrẹl.