Daniẹl 1 - Edo Bible (E Baibol Ẹdo) Version 1996

OKHA E DANIẸL KEVBE AVBE ESIỌRE ( 1:1—6:28 ) Avbe Igbama Na, Vbe Ẹguae Nebukiadneza

¹ Ugbẹn vbe ọ ghi rre ukpo eha ne Jehoiakim rriọba vbe Juda, e Nebukiadneza ne ọba e Babilọn keghi mu okuo gha die Jerusalẹm, ọ na ghae ga ẹvbo nii.

² E Nọyaẹnmwa keghi gie ẹe khọn mu e Jehoiakim, ọ na vbe viọ emwi eso vbe uwu emwighobioye ni rre Ọgua Osa ọ keghi viọ emwa eso oghunmwu gha rrie aro ẹbọ ọghọe vbe Babilọn, ọ keghi vbe viọ avbe emwi ne ọ viọ vbe okuo eso ye uwu aza aro ẹbọ.

³ Ọba keghi tama Aspenaz ne ọ ka ighele ẹre ne ọ hannọ igbama eso viọ yotọ vbe avbe igbama Izrẹl ni rre iwe, avbe ivbi ọba kevbe avbe ivbi ekhaẹmwẹ.

⁴ Iran ghi gha re emọ ni mose, ni mwẹ ẹwaẹn, ne a ma ẹre emwi ẹse, ni rherhe rẹn emwi ne a ma iran ẹre, ne ẹ i vbe mwẹ ehe ne emwi na ru ẹre egbe rhọkpa, ne iran miẹn ehe na gha re emwa ni gha winna vbe uwu ẹguae ọba. Aspenaz ghi vbe ma iran vbene a tie kevbe vbe a gbẹn ẹvbo ne emwa e Babilọn zẹ hẹ.

⁵ Ọba keghi vbe kha wẹ evbare ne ivbi ọba re kevbe ayọn ne ivbiọba da ọ re a gha vbe ya gha koko iran. A ghẹ ghi koko iran la ikpira nẹ vberriọ, a ghi viọ iran gie ọba ghe.

⁶ Usun avbe emwa ne a zẹe ọre iran gha ye ighe Daniẹl, Hananaia, Misiaẹl kevbe Azaraia, iran hia keghi wa gha re ivbi ẹwae Juda.

⁷ Ọka ighele na keghi he iran eni ọvbehe: Bẹtẹsiaza, Siedrak, Mesiak kevbe Abẹdnigo.

⁸ E Daniẹl keghi wa yan yọ wẹ rẹn i ra ya egbe hẹ awua vbekpa ne irẹn gha na rri evbare kevbe ne irẹn vbe gha da ayọn ẹguae, ọ keghi rhunmwuda ọnii rinmwian Aspenaz wẹ ne ọ ru iyobọ ne irẹn.

⁹ Osanobua keghi ru ẹe ne Aspenaz gha mwẹ itohan ghe Daniẹl.

¹⁰ Sokpan, ohan ọba kegha mu Aspenaz, ọ keghi rhunmwuda ọnii tama e Daniẹl wẹẹ, “Ọba tae nẹ vbene uwa gha re kevbe ne uwa gha da hẹ, a gha do miẹn wẹ wa ma maa egbe vba igbama nekpa, ọba sẹtin wa gbe mwẹ uan.”

¹¹ E Daniẹl keghi rhunmwuda ọnii bu odibo ne Aspenaz wẹ ne ọ gha gbearoghe irẹn kevbe avbe esiọre ne eha.

¹² Ọ tama rẹn wẹẹ, “Danmwẹ ima ghe la ikpẹdẹ igbe. Gha le ebe uwọnmwẹ ne ima re ne u vbe gha sa amẹ ne ima wọn.

¹³ U ghi do ya ima gie avbe igbama ni rri evbare ẹguae, vbene ima ghi ye hẹ ọ re u ghi ya rẹn emwi ne u gha ru.”

¹⁴ Ọ keghi gele kue yọ ne iran danmwẹ ọẹn ghe la ikpẹdẹ igbe.

¹⁵ Ẹdẹ ghi gba, egbe kegha maa iran, egbe wa vbe rran iran sẹ avbe emọ ni rri evbare ẹguae.

¹⁶ Ke ẹghẹ nii kpao, odibo nii keghi kue ne iran gha rri ebe uwọnmwẹ ye ihe evbare ne ọba viọ rre.

¹⁷ Osanobua keghi rhie irẹnmwi kevbe ẹwaẹn ne avbe emọ na vbe ebe ne a tie kevbe irẹnmwi ni dinmwi ọghe odun agbọn na. Ye vbe ba ẹre ọ keghi vbe rhie ẹwaẹn ne a ya rhan otọ imina kevbe umian ne Daniẹl.

¹⁸ Ukpo eha ne ọba mwa yọ ghi gba, Aspenaz keghi viọ emọ ni hia bu ọba e Nebukiadneza gha khian.

¹⁹ Ọba keghi gu iran hia fẹẹrẹ guan. Emwi ne Daniẹl, Hananaia, e Misiaẹl kevbe Azaraia ru keghi vuọn ọba aro sẹ ọghe nekpa hia fẹẹrẹ. A keghi rhunmwuda ọnii viọ iran la ẹguae ọba.

²⁰ Ẹmwẹkẹmwẹ ne ọba a rhirhi nọ, ra ọlọghọmwa ne ọ rhirhi a gha rrọ, emọ na keghi ya ukhukhu igbe rẹn sẹ avbe ebo edunna kevbe avbe ọbiro ni rre otọe arriọba nii hia.

²¹ E Daniẹl keghi wa gha rre uwu ẹguae ọba ọ te do sẹ ẹghẹ ne Sairọs ne ọba e Pẹsia na khọn e Babilọn.