Asan-Ibo 8 - Edo Bible (E Baibol Ẹdo) Version 1996

¹ Ọmwa ne ọ wan okpa ọ re ọ rẹn emwi ne a mobọ ya emwi kha. Ẹwaẹn ọ re ọ ya ẹe mu ẹẹn mu ẹẹn ogiẹ, ọ ghi vbe gia ho aro ẹre ne sukusuku bẹkun.

Gha Họn Ẹmwẹ Ne Ọba

² Gha ru vbene ọba khare, ghẹ vbe tua ve Osanobua emwi.

³ Ọba wa sẹtin ru emwi ne ọ khọn rẹn, rhunmwuda ọnii, kpao hin ehe ne ọ ye rre. Ghẹ mudia ye ehe ne ẹbe ye vberriọ.

⁴ Asẹ ọ re ọba ya ru emwi, a i vbe miẹn ne ọ nọ rẹn wẹ vbe u a ru na.

⁵ U gha ni zẹ vbene ọ khare, emwi rhọkpa i ru uẹ, ọmwa ne ọ wan rẹn ẹghẹ ne ọ kere kevbe vbene ọ gha ru ẹe hẹ.

⁶ Ẹghẹ ne ọ kere ne a ya ru ẹe kevbe odẹ ne ọ kere ne a ru emwi hia la rrọ, sokpan emwi kherhe ọ re ima rẹnrẹn.

⁷ Ọkpa vbe uwu ima ne ọ rẹn emwi ne ọ gha sunu i rrọ, a i vbe miẹn ne ọ gha ta ẹe ma ima.

⁸ Ọmwa okpa ne ọ gha sẹtin wẹ rẹn i wu, ẹ i rrọ, ra ne ọ si ẹdẹ uwu ẹre ke odaro. Okuo ne ima i sẹtin lẹ fe ọ re ọnii khin. Ero ne ọ ya ban ọmwa la i rrọ.

Ọmwa Dan Kevbe Ọmwa Esi

⁹ Ẹghẹ ne I na gha roro ẹmwẹ emwi ne a ru vbe agbọn na, ọ re I na miẹn emwi na hia; agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.

¹⁰ Vbe ẹmwata, mẹ miẹn emwa dan ne a re ye idin iran, a ghẹ ghi gha vbe ke itẹ dee, emwa ghi vbe gha tian iran vbe ẹvbo okpa nii ne iran na ru avbe emwi dan hia. Ọna i zẹdẹ maa.

¹¹ Vbọzẹ ne emwa na wa rherhe ru ọkhọ vberriọ yi? Rhunmwuda, a i rherhe rria ikhi ye ọkhọ sẹ.

¹² Ọmworukhọ sẹtin wa ru orukhọ iyisẹn, ọ ghi ye gha rre agbọn. Erriọ nọ, I rẹn ẹmwẹ ne iran ta wẹẹ, “U gha ya ọghọ ne Osanobua, emwi hia ghi gha dunna nuẹn.

¹³ Sokpan ẹ i ra dunna ne ọmwa dan. Te ẹdagbọn iran ye vbe aghọnghọn, te iran ra wulo ye isẹrre, rhunmwuda iran i họn ẹmwẹ ne Osanobua.”

¹⁴ Ẹmwẹ oya ọ re ọna wa khin. Wẹ ghe emwi ne ọ sunu vbe agbọn na, ugbẹnso, emwa esi ghi ya uhunmwu hẹ oya ne ọ khẹke ọmwa dan, emwa dan, ghi ya rri ere ne ọ khẹke ọmwa esi, I wẹ ọna i maa.

¹⁵ Rhunmwuda ọnii, ekhọe mwẹ ta ẹe ma mwẹ wẹ te ọ kere ne ọmwa gha lo agbọn rẹn, rhunmwuda, ọyẹnmwẹ okpa ne ọ mwẹ vbe agbọn na ọrọre ne ọ gha re, ne ọ gha da, ne ọ vbe gha zọmọ. Ọ kere ne ọ sẹtin ru ọna vbe ẹghẹ ne ọ na winna vbe ẹdẹ ne Osanobua rhie ne ẹẹn vbe agbọn na.

¹⁶ Ẹghẹikẹghẹ ne I ya ho ne I gha wan, kevbe ne I vbe rẹn emwi ne ọ khian vbe agbọn na, I ghi miẹn wẹ ọmwa sẹtin rhan aro ua ye ukpo kevbe asọn kevbe avan.

¹⁷ Vbene ẹ i na vbe sẹtin rẹn emwi ne Osanobua ru. Vbene ọ khọn ruẹn ne u ziga sẹ, u i miẹn otọ ẹre. Emwa ni wan sẹtin kha wẹ iran miẹn ọẹn, iran ma miẹn emwi rhọkpa.