Asan-Ibo 7 - Edo Bible (E Baibol Ẹdo) Version 1996

Ẹmwẹ Ẹdẹ Agbọn

¹ Eni esi maa sẹẹ ori ne ọ winhin ighobioye ne a sa ye egbe, ẹdẹ ne ọmwa wu ọ re ọ vbe maa sẹ ẹdẹ ne a biẹ ọmwa.

² Ọ kere ne a gha rrie owa ne a na khiẹ sẹẹ ne a gha rrie owa ne a na tie ẹbu eghọ, rhunmwuda, te ọ kere ne emwa ni rre agbọn gha ye egbe iran ẹre rre wẹ, uwu diakhẹ dọmwadẹ ọghọe.

³ Akhiẹ ọ re ọ maa sẹẹ ogiẹ, ọ sẹtin ye aro ruẹ suku ua sokpan, ọ gha gie ẹdẹ gbe uẹ vbe ẹko sayọ.

⁴ Ọmwa ne ọ wa ro iro vbekpa ọyẹnmwẹ vbe ẹghẹ hia, ọzuọ nọ. Ọmwa ne ọ wan, ẹmwẹ uwu ọ re ọ mu ro.

⁵ Ọ kere ne emwa esi gha gu ọmwa gui sẹẹ ne avbe akpa do gha kpe ọbọbọ ne ọmwa.

⁶ Ọzuọ gha giẹ, ọ ghi yevbe ne igban salọ vbe uwu erhẹn. Ẹ i zẹdẹ mwẹ emwi ne a yae kha.

⁷ Ọmwa ne ọ wan gha mu ọmwa ru, uyinmwẹ ọzuọ ọ re ọ yinrin nii. U gha miẹn igho odieke, u mu eni ruẹn rhia nẹ.

⁸ Ufomwẹ emwi ọ re ọ maa sẹ omuhẹn ọnrẹn. Izin egbe ọre ọ maa sẹ itẹngbemu.

⁹ Ohu gha mu ẹẹn, ziengbe ẹre, uyinmwẹ ọzuọ nọ ne a gha rhie emwi ne ọ sọnnọ ọmwa ye ekhọe.

¹⁰ Ghẹ gha nọ wẹẹ, “A a, vbọzẹ ne emwi hia na wa maa sẹẹ ẹghẹ nẹdẹ yi?” Ẹwaẹn i zẹdẹ rre inọta nii.

¹¹ Te ọ te kei ne ọmwaikọmwa ne ọ rre agbọn na gha wan, ọ wa maa vba ukhu ne ọmwa re;

¹² ọ gha vbe ru ẹe ne ẹkun sẹ uẹ otọ zẹ vbene igho vbe ru. Ẹwaẹn sẹtin ru ẹe ne u gha rrọ vbe a i mwẹ ẹbe, erriọ ọ re irẹnmwi na maa sẹẹ.

¹³ Roro avbe emwi ne Osanobua ru nẹ. De ọmwa ne ọ gha sẹtin dia emwi ne Osanobua ru nẹ wẹ ne ọ gọ?

¹⁴ Emwi gha khian hẹnnẹhẹnnẹ ne uẹn, gha ghọghọ, orueghe gha vbe rre, u ghi ye rre wẹ Osanobua ọ re ọ rhie ọyẹnmwẹ kevbe orueghe rre, u i sẹtin kha ne ọ ghi sẹẹ ọre egbe ne ọ gha rre vbọ.

¹⁵ Te ẹdẹ agbọn mwẹ kulo, sokpan aro mwẹ miẹn emwi hia nẹ vbọ. Ọmwa esi sẹtin wa wu vbene ọmwa ọvbehe na ye tọ khian, egbe ne ọ ya re ọmwa dan.

¹⁶ Rhunmwuda ọnii, ghẹ gha re ọmwa ne ọ maa gbe ra ne ọ wan gbe. Vbọzẹ ne u gha na gbe egbe uẹ ua yi.

¹⁷ Sokpan ghẹ vbe gha re ọmwa dan ra akpa, vbọzẹ ne u i ra na tọ sẹ ẹdẹ ẹhi yi?

¹⁸ Gie emwi hia gha re oreghe. Adeghẹ u ya ọghọ ne Osanobua, ẹ i mwẹ ọ ma dunna nuẹn.

¹⁹ Ẹwaẹn gha sẹtin ru emwi ne ọmwa, sẹẹ vbene enikhaemwisẹ igbe gha sẹtin ru ne ẹvbo ọkpa.

²⁰ Orhiọnkpa i rre agbọn na ne ọ wa ru emwi ẹse khian ne ẹ i vbe mwẹ abakuru.

²¹ Ghẹ danmwehọ ẹmwẹ hia, ne emwa tae, u sẹtin wa họn vbe eguọmwadia ruẹ a gha rhovbiọ.

²² Wẹ tobọọ rẹnrẹn wẹ ẹ i re avbiẹ inugba wẹ he rhovbiẹ emwa ọvbehe.

²³ Ẹwaẹn mwẹ ọ re I ya danmwẹ avbe emwi na hia ghe, I keghi wa mu aro yọ wẹ ne I gha wan, sokpan, ọ keghi ye khian rrei mẹ.

²⁴ Vbe ọmwaikọmwa gha ya sẹtin gualọ otọ emwi ne a ya ẹdagbọn ọmwa miẹn hẹ? Ọ dinmwi ne ima gbe, ọ lọghọ gbe ne a rẹn otọ ẹre.

²⁵ Sokpan, mẹ keghi wa mu aro ye ẹmwẹ irẹnmwi kevbe emwi ne a ruẹ, I keghi wẹ te I gha gualọ ẹwaẹn miẹn, ne I vbe rhie ewanniẹn ye avbe ọta ne I nọ hia; kevbe ne I rẹn vbene ezurọ re emwi ukọnmwẹ kevbe emwi dan hẹ.

²⁶ I keghi miẹn emwiọkpa ne ọ rriara sẹẹ uwu — ọnii ọ re okhuo. Ahoẹmwọmwa ne ọ ra mwẹ ghe ruẹ sẹtin wa mu ẹn zẹ vbe ifi ra ọga, obọ ne ọ ya kinnọ ọn ghi gba a mwẹ zẹ vbe eghan. Ọmwa ne ọ ru emwi ne ọ yẹ Osanobua sẹtin lẹfe vbọ, sokpan te obọ ẹre gba ọmworukhọ.

²⁷ Erriọ nọ, erriọ ọ khare ighẹ Asan-ibo, ẹghẹ ne I na gha gualọ ewanniẹn ọ re I na gha miotọ avbe emwi na kherhe kherhe.

²⁸ I ye vbe gualọ avbe ewanniẹn ọvbehe, sokpan, I ma ghi miẹn. I miẹn okpia okpa vbe uwu ikpia arriaisẹn ne I gha ya ọghọ na, sokpan, I ma zẹdẹ miẹn vbe ikhuo hiehiere.

²⁹ Emwiọkpa ne I miẹn ruẹ ọ re ọna khin wẹ te Osanobua yi ima fiain, sokpan ma keghi ye egbe ima khian khiẹnkhiẹnkhiẹn.