Asan-Ibo 6 - Edo Bible (E Baibol Ẹdo) Version 1996

¹ I vbe miẹn ọẹn wẹ, agbọn na, uyinmwẹ a i ta ẹmwata wa rrọ.

² Osanobua ghi ya ẹfe ne ọmwa, deba ọghọ kevbe emwi ne a mwẹ, ne a wa kha wẹ emwi hia ne ọ ho, sokpan, ẹ i ghi gie ẹe ya ẹe ru, sokpan ẹrrẹe ghi do ya ẹe ru. ọna i zẹdẹ maa, ọ ma gba hiehiere.

³ Ọmwa sẹtin biẹlẹ emọ iyisẹn, ọ ghi vbe tọ ẹsẹse, sokpan, vbene ọ khọnrẹn ne ọ tọ sẹhẹ, a dẹghe ọyẹnmwẹ ma sẹ ọe vbene ọ te khẹ kẹe, a dẹghe a ma vbe re ẹre ẹse, ẹmwẹ ne I miẹn ta ye evba ọrọre wẹ, ọmọ ne okpa ma gbe ifuẹn na ọ re ọ wa maa sẹẹ.

⁴ Ẹ i ghi mwẹ asa ne ọmọ nii akpawẹ te a biẹ ọe, ọ wa la uwu ebiebi wirua a keghi mianmian ẹn.

⁵ Ọ ma bẹghe uwanmwẹ ẹdẹ ra ne ọ vbe rẹn vbene agbọn ye hẹ, sokpan, vbene ọ rhirhi a gha ye hẹ, ọ vbe miẹn ikẹtin,

⁶ ọ vbe ye onii maa sẹẹ ọmwa ne ọ ma lo agbọn rẹn, ọ gha khọn rẹn ne ọ ye ukpo arriaisẹn eva vbe agbọn. Vbe uwu ehia ihọkpa ọ re iran eveva rrie.

⁷ Ọmwa ghi winna iwinna rẹn ne ọ sẹtin miẹn evbare unu re, sokpan ẹ i mwẹ ọnrẹn sẹ ọkẹn.

⁸ De emwi ne umẹwaẹn ya maa sẹ ọzuọ yi? De ere ne ọ rrọ ne ovbiogue ne ọ sẹtin ya egbe miẹn usẹ?

⁹ Ọna i vbe maa, te ọ yevbe ne a khu ẹhoho khian. Ọ kere ne emwi ne ọmwa mwẹ sẹ ọre ọkẹn, sẹ ne ọ gha rhie aro ye ọvbehe vbe ẹghẹ hia.

¹⁰ Emwi hia ni sunu, ọ kpẹre ne a ghi mwamwa ẹn yotọ, ma tobọ mwa rẹnrẹn wẹ ọmwa i sẹtin gu ọmwa ne ọ wegbe sẹ ọre muan ẹmwẹ.

¹¹ Vbene u gha wẹ ne u ya gha muan ẹmwẹ te ọ wa vbe ya rhia yọ, u i vbe miẹn ọ maa okpa rhie vbọ.

¹² Vbe ọmwa gha na rẹn emwi ne ọ kei ne ẹẹn sẹ vbe agbọn ne tuai ne ẹ i mwẹ esa na, agbọn ne ọ rhie gberra khian vbe aghọnghọn? Vbe ọmwa gha ya rẹn emwi ne ọ gha sunu vbe irẹn a wu nẹ hẹ?