Asan-Ibo 5 - Edo Bible (E Baibol Ẹdo) Version 1996

Ghẹ Khirhi Yan Eyan

¹ Hẹko gha ya ẹwaẹn yo Ọgua Osa. Ọ kere ne a yo ya ruẹ emwi vbe evba sẹẹ ne a ya gha zọ ese zẹvbe avbe ọzuọ ni ma rẹn emwi ne ọ kere hin e ne ọ ma kei rre.

² Gha roro ẹmwẹ u kegha tae, ghẹ gha khirhi yan eyan ma Osanobua. Ẹrinmwi rẹn ye, agbọn ọ re uwẹ ye, rhunmwuda onii ghẹ talọ gbe.

³ Vbene u ya si osi ye emwi, erriọ ọ re u gha vbe ya mina imina dan, vbene u vbe ya talọ, erriọ ọ re u gha vbe ya guan ẹmwẹ ukọnmwẹ.

⁴ Rhunmwuda ọnii, u gha ve Osanobua emwi, zẹgiẹgiẹ ru ẹe vbene u gha sẹtin rhulẹ ru ẹe sẹ. Rẹn i mwẹ vbe ọ ya ọzuọ ru. Ru emwi ne u yanrẹn ighe u gha ru.

⁵ A ma zẹdẹ ve emwi ọ re ọ maa sẹẹ a ghi ve nẹ, a ma ghi ru ẹe.

⁶ Ghẹ gie ẹmwẹ ne unu ruẹn siọ fi orukhọ vbene u gha na ya tama ohẹn Osanobua ighe ọdẹn ọ re u gbe. Vbọzẹ ne u gha na ya Osanobua mu ohu ghe ruẹ yi? Vbọzẹ ne u gha na giee fuẹn uan, ighe emwi ne u miẹn ẹsọn yi.

⁷ Vbene ọ khọn ruẹn u mina sẹ hẹ, vbene u a rhirhi miẹn ẹsọn kua sẹ hẹ, ra ne u talọ sẹ hẹ, ọ kere ne u ye gha mu ohan Osanobua.

Ẹdagbọn I Mwẹ Esa

⁸ Ghẹ giee yan uwe unu uan adeghẹ arriọba kpokpo ovbiogue, ighe ọ ma vbe gie a bu ohiẹn ẹmwata ne iran, ra ne a rhie emwi ne ọ khẹke iran ne iran. Dọmwadẹ ọmwa iwinna, ọmwa ne irẹn rre ototọ ẹre, ọ re ọ sinmwi ne ẹẹn, ọmwa ne ukpo ẹre ghi vbe yo sẹẹ ọ re ọ sinmwi ne iran eveva.

⁹ Ọba tobọ ẹre emwiorhọ ọ re ọ hẹnhẹn egbe yan.

¹⁰ Aro ruẹ gha wu ye igho, ẹghẹ okpa ne ọ ra ya sẹ uẹ ọkẹn i rrọọ. U gha rhie aro ye ẹfe, ẹghẹ ne u ra ya miẹn emwi ne u gualọ hia gba i rrọ. Ọna i vbe maa.

¹¹ Vbene u vbe ya mwẹ igho yọ, erriọ ọ re avbe unu ne u koko vbe ya bun yọ. Ere ne uwẹ miẹn vbọ ọrọre ne u na rẹn wẹ u mwẹ igho.

¹² Ọmwa ne ọ winna sẹtin miẹn evbare gha re, ugbẹnso, ẹ i vbe miẹn re. Vbene ọ rhirhi a gha ye hẹ, asọn gha rre ọ ghi miẹn ovbe vbiẹ khuẹrhẹ. Sokpan, emwi ne ọmwa ne ọ fe mwẹ bun sẹrriọ wẹ afianma ighi gie ẹe miẹn ovbe vbiẹ.

¹³ Vbe ghe emwiọkpa ne ọ mu ọmwa ohan ne I vbe miẹn vbe agbọn na: emwa ghi gha si igho koko hinrre khẹ ẹdẹ ne a gha ho sẹ ọre egbe.

¹⁴ Vbe iyeke ọnii, ọ ghi rhia ehia a ye ẹki ne a ma do ẹse, vbene ẹ i ghi na vbe miẹn emwi okpa fi ye emọ otọ.

¹⁵ Vbe ne ima ya lao agbọn na ọ re avbe ya kọe ladian, te a fiabọ rre, vbene a gha rhe yan miẹn ẹsọn sẹ, emwiọkpa ne a rhie kpao i rrọ.

¹⁶ Ọna ma gba! Vbene ima ya rre ọ re a ya rrie. Ma ghi gha miẹn ẹsọn ẹsọn, a ghi gha ho ne a mu ẹhoho. De emwi ne ọ ghi sẹ ọmwa obọ?

¹⁷ Emwi ne a ghi miẹn vbọ ọrọre ne a gha lo ẹdẹ agbọn mwa vbe uwu ebiebi kevbe irhiaẹko, ekhọe ma sotọ, ohu kevbe emianmwẹ.

¹⁸ Emwi ne I gualọ otọ ẹre miẹn ọ re ọna khin wẹ, emwi ne ọ kei ne ọmwa sẹ ọrọre ne ọ gha re, ne ọ gha da, ne ọ ye emwi ne ọ miẹn ẹsọn yi gha zọmọ vbe ẹdagbọn kherhe ne Osanobua rhie ne ẹẹn na: uhunmwu ne ọmwa mu rre ọ re onii khin.

¹⁹ Adeghẹ Osanobua rhie ne ọmwa ne ọ gha mwẹ emwi kevbe ne ọ fe, ọna vbe rhie ẹghẹ ne ẹẹn ne ọ vbe ya ye ehia ru. ọ kere ne ọ kpọnmwẹ, ne ọ vbe ya emwi ne ọ miẹn ẹsọn yi gha zọmọ. Ẹse ne ọ ke obọ Osanobua rre nọ.

²⁰ Ugbẹn vbe Osanobua ghi kuee yọ ẹre re nẹ, ẹko gha sẹ ọre ọyẹnmwẹ, wẹ ne ọ ghẹ ghi vbe si osi ye ẹmwẹ deghẹ a tọ ra a i tọ.